ସିଂହପୁର,୨୪ା୪(ଡି.ଏନ.ଏ.): ଗ୍ରାମାଞ୍ଚଳ ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ପାଇଁ ବିଭିନ୍ନ ଯୋଜନାରେ ସରକାରଙ୍କ ପକ୍ଷରୁ ପ୍ରକଳ୍ପ ନିର୍ମାଣ କରାଯାଇଛି। ମାତ୍ର କେତେକ ପଞ୍ଚାୟତରେ ବିଭାଗୀୟ ଅଧିକାରୀ ଓ ସ୍ଥାନୀୟ ରାଜନେତାଙ୍କ ଦୂରଦୃଷ୍ଟି ଅଭାବରୁ ଲୋକେ ପାନୀୟ ଜଳ ପାଇଁ ହୀନସ୍ତା ଭୋଗୁଛନ୍ତି। ବିଞ୍ଝାରପୁର ବ୍ଲକ ଅନ୍ତର୍ଗତ ଜରି ଓ ବାଙ୍ଗରା ପଞ୍ଚାୟତରେ ଏପରି ଚିତ୍ର ଦେଖିବାକୁ ମିଳିଛି।
ଜରି ପଞ୍ଚାୟତ ୧୨ନଂ. ୱାର୍ଡର ସମସ୍ତ ପରିବାର ନିକଟରେ ପାନୀୟ ଜଳ ପ୍ରକଳ୍ପ ପାଣି ପହଞ୍ଚତ୍ ପାରୁନାହିଁ। ଫଳରେ ବାଧ୍ୟ ହୋଇ ଲୋକେ ନଳକୂଅ ଉପରେ ନିର୍ଭର କରୁଛନ୍ତି। ମାତ୍ର ଏଠାରେ ଥିବା ଏକ ନଳକୂପ ଦୀର୍ଘଦିନ ହେଲା ଅଚଳ ହୋଇ ପଡ଼ିଥିବାରୁ ଲୋକେ ପାନୀୟ ଜଳ ପାଇଁ ହୀନସ୍ତା ଭୋଗୁଛନ୍ତି। କେତେ ଜଣ ଲୋକ ବାଧ୍ୟ ହୋଇ ଖରସ୍ରୋତା ନଦୀର ଜଳକୁ ପାନୀୟ ରୂପେ ବ୍ୟବହାର କରୁଛନ୍ତି। ଏହିପରି ବାଙ୍ଗରା ପଞ୍ଚାୟତ ବାଙ୍ଗରା ଗ୍ରାମର ୫ନଂ. ୱାର୍ଡରେ ମଧ୍ୟ ପାନୀୟ ଜଳ ପାଇଁ ସମାନ ଅବସ୍ଥା ଭୋଗିବାକୁ ପଡୁଛି। ପାନୀୟ ଜଳ ପ୍ରକଳ୍ପରୁ ଲୋକେ ପାଣି ପାଇବାରୁ ବଞ୍ଚତ୍ତ ହେଉଛନ୍ତି। ତେଣୁ ପାନୀୟ ଜଳ ସମସ୍ୟା ଦୂରକରିବା ପାଇଁ ନଳ କୂଅ ଏକମାତ୍ର ମାଧ୍ୟମ ପାଲଟିଛି। ମାତ୍ର ନଳକୂଅଟି ବହୁ ଦିନ ଅଚଳ ହୋଇ ରହିଥିବାରୁ ପାନୀୟ ଜଳ ସମସ୍ୟା ଉତ୍କଟ ହୋଇଛି। ଗ୍ରୀଷ୍ମ ଋତୁରେ ପାନୀୟ ଜଳ ସମସ୍ୟା ଲୋକଙ୍କ ଜଳକଷ୍ଟକୁ ଦୁଇଗୁଣିତ କରୁଛି। ତେଣୁ ତୁରନ୍ତ ଅଚଳ ନଳକୂପଗୁଡ଼ିକୁ ସଚଳ କରିବା ଓ ପାନୀୟ ଜଳ ପ୍ରକଳ୍ପର ପାଣି ସମସ୍ତ ପରିବାର ନିକଟରେ ପହଞ୍ଚାଇବାକୁ ଜିଲାପାଳଙ୍କ ନିକଟରେ ସ୍ଥାନୀୟ ଲୋକେ ଦାବି କରିଛନ୍ତି।
