ବେଜିଂ,୨।୯: ପୃଥିବୀର କକ୍ଷପଥରେ ବହୁ କିଲୋମିଟରର ବ୍ୟାପି ଏକ ବିଶାଳ ସହର ନିର୍ମାଣ ଯୋଜନା ଏବେ ଚାଇନା ପକ୍ଷରୁ କରାଯାଇଛି। ଏନେଇ ବିଶାଳକାୟ ମୂଳଦୁଆ ନିର୍ମାଣ ଲାଗି ଡ୍ରାଗନ ଜୋରସୋର୍ ପ୍ରସ୍ତୁତି ଆରମ୍ଭ କରିଛି। ଏହି ଉଡ଼ନ୍ତା ସହର ଦ୍ୱାରା ମହାକାଶ ଜୟ କରିବାକୁ ଚାଇନା ଲକ୍ଷ୍ୟ ରଖିଛି। ଏହି ସହରରେ ବିଦ୍ୟୁତ୍ ଉତ୍ପାଦନ କେନ୍ଦ୍ର, ପର୍ଯ୍ୟଟନ କମ୍ପ୍ଲେକ୍ସ, ଗ୍ୟାସ ଷ୍ଟେସନ ଠାରୁ ଆରମ୍ଭ କରି ଆଷ୍ଟେରଏଡରେ ଖଣି ଖନନ ଆଦି ସୁବିଧା ରଖାଯିବ। ଚାଇନାର ଜାତୀୟ ପ୍ରାକୃତିକ ବିଜ୍ଞାନ ଫାଉଣ୍ଡେସନ ପକ୍ଷରୁ ଏନେଇ ଏକ ୫ ବର୍ଷିଆ ଯୋଜନା ଘୋଷଣା କରିଛି। ଏହା ସହିତ ଗବେଷକଙ୍କୁ ଆବଶ୍ୟକ ଟେକ୍ନୋଲୋଜିର ବିକାଶ ପାଇଁ ନିର୍ଦ୍ଦେଶ ଜାରି ହୋଇଛି।
ସହର ନିର୍ମାଣରେ ହାଲୁକା ଓଜନ ସାମଗ୍ରୀ ବ୍ୟବହାର କରାଯିବ। ଯାହା ଦ୍ୱାରା ରକେଟ ସହାୟତାରେ ଏହାକୁ ପୃଥିବୀର କକ୍ଷପଥରେ ଅବତରଣ କରାଯାଇପାରିବ।
ସହରର ପ୍ରଥମ ପ୍ରକଳ୍ପ ପାଇଁ ୨୦୩୫ ସୁଦ୍ଧା ଚାଇନା ଏକ ବିଦ୍ୟୁତ୍ ଉତ୍ପାଦନ କେନ୍ଦ୍ର ସ୍ଥାପନ କରିବ। ଏହି କେନ୍ଦ୍ରର ୧ ମାଇଲ ପରିମିତ ମହାକାଶରେ ନିର୍ମିତ ହେବ। ଏହି ବିଦ୍ୟୁତ୍ କେନ୍ଦ୍ର ଚାଇନାର ଗ୍ରୀଡ କୁ ଶକ୍ତି ଯୋଗାଇବ। ସେହିପରି ଅନ୍ୟାନ୍ୟ ପ୍ରକଳ୍ପରେ ୧ ମାଇଲରୁ ଅଧିକ ବଡ଼ ଅର୍ବିଟାଲ ପ୍ଲାଟଫର୍ମ ନିର୍ମାଣ କରାଯିବ। ଏହା ନିକଟରେ ଅନ୍ତର୍ଜାତୀୟ ସ୍ପେସ ଷ୍ଟେସନ ରହିବ। ସ୍ପେସ୍ ଷ୍ଟେଶନର ପ୍ରସ୍ଥ ୩୫୦ ଫୁଟ ପର୍ଯ୍ୟନ୍ତ ବିସ୍ତାରିତ ହେବ।
ଏଭଳି ଯୋଜନା ମାଧ୍ୟମରେ ଚାଇନା ଆମେରିକାର ନାସାକୁ ଚ୍ୟାଲେଞ୍ଜ୍ କରିବାକୁ ଚାହୁଁଥିବା ନେଇ ଅନ୍ତର୍ଜାତୀୟସ୍ତରରେ ଚର୍ଚ୍ଚା ହେଉଛି। ନାସା ଅନ୍ୟାନ୍ୟ ୟୁରୋପୀୟ ଦେଶମାନଙ୍କ ସହଯୋଗରେ ଆନ୍ତର୍ଜାତୀୟ ସ୍ପେସ ଷ୍ଟେସନ ଚଳାଉଛି। ବର୍ତ୍ତମାନ ଏହି ସ୍ପେସ ଷ୍ଟେସନରେ ୭ ଜଣ ମହାକାଶଚାରୀ ଅଛନ୍ତି। ତେବେ ସହର ନିର୍ମାଣ ସମ୍ପର୍କରେ ଜାତୀୟ ପ୍ରାକୃତିକ ବିଜ୍ଞାନ ଫାଉଣ୍ଡେସନ ପକ୍ଷରୁ କୌଣସି ଅଧିକ ସୂଚନା ପ୍ରଦାନ କରାଯାଇ ନାହିଁ।
