ନୂଆଦିଲ୍ଲୀ,୭ା୧: ବୁଲା କୁକୁର ସମସ୍ୟା ସମ୍ବନ୍ଧୀୟ ଆବେଦନଗୁଡ଼ିକର ଶୁଣାଣି କରି ସୁପ୍ରିମକୋର୍ଟ ବୁଧବାର ଗୁରୁତ୍ୱପୂର୍ଣ୍ଣ ପ୍ରଶ୍ନ କରିଛନ୍ତି। କେବଳ କୁକୁରମାନଙ୍କ ଉପରେ କାହିଁକି ତର୍କ କରାଯାଉଛି ବୋଲି ପ୍ରଶ୍ନ କରି କୋର୍ଟ କହିଛନ୍ତି, “ଅନ୍ୟ ପଶୁମାନଙ୍କ ଜୀବନର କ’ଣ ହେବ? କୁକୁଡ଼ା ଏବଂ ଛେଳିଙ୍କ ବିଷୟରେ କ’ଣ? କ’ଣ ସେମାନଙ୍କର ଜୀବନ ନାହିଁ?”
ଜଣେ ଆବେଦନକାରୀ ବୁଲା କୁକୁର ଆକ୍ରମଣରେ ମୃତ୍ୟୁବରଣ କରିଥିବା ଜଣେ ୯୦ ବର୍ଷୀୟ ବ୍ୟକ୍ତିଙ୍କ ଫଟୋ ଦେଖାଇବାକୁ ଚେଷ୍ଟା କରିଥିଲେ। ତେବେ କୋର୍ଟ ଏହାକୁ ଅଟକାଇ କହିଥିଲେ, “ଏହି ଫଟୋ ଦେଖାଇବାର କୌଣସି ଆବଶ୍ୟକତା ନାହିଁ।”
ଆହତଙ୍କ ପକ୍ଷରୁ ଓକିଲ ଯୁକ୍ତି ବାଢ଼ିଥିଲେ ଯେ ଲୋକମାନେ ବୁଲା କୁକୁରଙ୍କ ଯୋଗୁଁ ଅସୁବିଧାରେ ପଡ଼ୁଛନ୍ତି ଏବଂ ମାନବ ଅଧିକାର ସୁରକ୍ଷିତ ହେବା ଦରକାର। ସେ ଜାପାନ ଓ ଆମେରିକାର ‘ଡ୍ରାମବକ୍ସ କିଲ୍ ସେଲ୍ଟର’ ପ୍ରଥା ଉଲ୍ଲେଖ କରିଥିଲେ, ଯେଉଁଠାରେ ପୋଷା କୁକୁର ପୋଷ୍ୟ ହୋଇ ନ ପାରିଲେ ଇଉଥାନାଇଜ୍ (ଯନ୍ତ୍ରଣାମୁକ୍ତ ମୃତ୍ୟୁ) କରାଯାଏ।
ସେହିପରି ନୋଏଡାରେ ବୁଲା କୁକୁର ଆକ୍ରମଣର ଶିକାର ହୋଇଥିବା ୮ ବର୍ଷର ଝିଅର ବାପା କୋର୍ଟରେ ହାଜର ହୋଇଥିଲେ। ସେ ଅଭିଯୋଗ କରିଥିଲେ ଯେ ବାରମ୍ବାର ଅଭିଯୋଗ ସତ୍ତ୍ୱେ ନୋଏଡା ଅଥରିଟି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନାହିଁ। ଆର୍ଡବ୍ଲ୍ୟୁଏ (RWAs) ମାନଙ୍କୁ ସେମାନଙ୍କ ସୋସାଇଟିଗୁଡ଼ିକୁ “କୁକୁରମୁକ୍ତ ଅଞ୍ଚଳ” ଘୋଷଣା କରିବାକୁ ଅନୁମତି ଦିଆଯାଉ ବୋଲି ସେ ଯୁକ୍ତି ବାଢ଼ିଥିଲେ।
ବରିଷ୍ଠ ଆଇନଜୀବୀ କପିଲ ସିବଲ ଏହି ସମୟରେ କହିଥିଲେ ଯେ “ଆମେ ଏଠାକୁ କୁକୁର ପ୍ରେମୀ ଏବଂ ପରିବେଶ ପ୍ରେମୀ ଭାବରେ ଆସିଛୁ।” ‘କୁକୁଡ଼ା ଓ ଛେଳି’ ପ୍ରଶ୍ନର ଉତ୍ତରରେ ସେ କହିଥିଲେ ଯେ କୁକୁଡ଼ାମାନଙ୍କୁ ନିର୍ଦ୍ଦୟ ଭାବେ ପଞ୍ଜୁରୀରେ ରଖାଯାଉଥିବାରୁ ସେ କୁକୁଡ଼ା ଖାଇବା ବନ୍ଦ କରି ଦେଇଛନ୍ତି।
ତେବେ ସେ ମଡେଲକୁ ସମର୍ଥନ କରିଥିଲେ ଏବଂ କହିଥିଲେ ଯେ ଏହା ସଫଳ ହୋଇଛି ଓ ବୁଲା କୁକୁରଙ୍କ ସଂଖ୍ୟାକୁ ପ୍ରାୟ ଶୂନ ସ୍ତରକୁ ଆଣିଛି। ସେ ଯୁକ୍ତି ଦର୍ଶାଇଥିଲେ ଯେ ଭାରତରେ ବୁଲା କୁକୁରମାନଙ୍କୁ ହଟାଇ ଦିଆଗଲେ ଅଳିଆ ଆବର୍ଜନା ଏବଂ ମାଙ୍କଡ଼ ସମସ୍ୟା ବଢ଼ିବ।
ସେ କହିଥିଲେ ଯେ କୁକୁର କାମୁଡ଼ା ସମ୍ବନ୍ଧୀୟ ତଥ୍ୟ “ପ୍ରକୃତ ସଂଖ୍ୟା ଠାରୁ ୫ ରୁ ୭ ଗୁଣ ଅଧିକ” କାରଣ ପ୍ରତ୍ୟେକ ଇଞ୍ଜେକ୍ସନ ଡୋଜକୁ ଏକ ପୃଥକ ମାମଲା ଭାବରେ ଗଣାଯାଉଛି।
ଏଥିରେ ପ୍ରତିକ୍ରିୟା ଦେଇ କୋର୍ଟ କହିଥିଲେ, “ଆମେ ଦେଇଥିବା ନିର୍ଦ୍ଦେଶ କେବଳ ଅନୁଷ୍ଠାନିକ ଅଞ୍ଚଳ ପାଇଁ ଥିଲା, ରାସ୍ତା ପାଇଁ ନୁହେଁ। ବିଦ୍ୟାଳୟ, ଡାକ୍ତରଖାନା କିମ୍ବା କୋର୍ଟ ଭିତରେ ବୁଲା କୁକୁରଙ୍କ ଆବଶ୍ୟକତା କ’ଣ? ସେମାନଙ୍କୁ ସେହି ଅଞ୍ଚଳରୁ ହଟାଇବାକୁ କାହିଁକି ଆପତ୍ତି?”
ଏହାର ଉତ୍ତରରେ ସଲିସିଟର ଜେନେରାଲ କହିଥିଲେ ଯେ ସବୁକିଛି ପଶୁପ୍ରେମୀଙ୍କ ବଦଳରେ କୁକୁର ପ୍ରେମୀଙ୍କୁ କେନ୍ଦ୍ର କରି ରହିଛି। ଗେଟେଡ୍ କଲୋନୀରେ କୁକୁର ବୁଲିବା ଉଚିତ କି ନୁହେଁ, ତାହା ବ୍ୟକ୍ତିବିଶେଷ ନୁହେଁ, ଆରଡବ୍ଲ୍ୟୁଏ (RWA) ନିଷ୍ପତ୍ତି ନେବା ଉଚିତ।
