ନୂଆଦିଲ୍ଲୀ,୭।୧: ବିଶ୍ୱର ସମସ୍ତ ଦେଶ ଉପରେ ଆମେରିକାର ଟାରିଫ୍ ପ୍ରଭାବ ଦେଖିବାକୁ ମିଳିଥିବା ବେଳେ ଭାରତ ଉପରେ ଏହାର କୌଣସି ପ୍ରଭାବ ପଡ଼ିନାହିଁ। ରାଷ୍ଟ୍ରପତି ଟ୍ରମ୍ପ୍ଙ୍କ ଟାରିଫ୍ ଚାପ ସତ୍ତ୍ୱେ, ୨୦୨୫-୨୬ ପାଇଁ ଦେଶର ଅର୍ଥନୈତିକ ଅଭିବୃଦ୍ଧି ହାର ୭.୪ ପ୍ରତିଶତ ରହିବ ବୋଲି ଭାରତ ସରକାର ଆକଳନ କରିଛନ୍ତି। ଯାହା ଏସିଆର ତୃତୀୟ ବୃହତ୍ତମ ଅର୍ଥନୀତିର ଦୃଢ଼ତାକୁ ଦର୍ଶାଉଛି।
ଏହି ଅଭିବୃଦ୍ଧି ପୂର୍ବାନୁମାନ ଭାରତୀୟ ରିଜର୍ଭ ବ୍ୟାଙ୍କ (RBI)ର ୭.୩ ପ୍ରତିଶତ ଆକଳନ ଠାରୁ ଅଧିକ ଏବଂ ପୂର୍ବ ବର୍ଷର (୨୦୨୪-୨୫) ୬.୫ ପ୍ରତିଶତ ଅଭିବୃଦ୍ଧି ଠାରୁ ଯଥେଷ୍ଟ ଅଧିକ ଅଟେ। ଏହି ତଥ୍ୟ ଆସନ୍ତା ଫେବୃଆରୀ ୧ ରେ ଉପସ୍ଥାପନ ହେବାକୁ ଥିବା କେନ୍ଦ୍ରୀୟ ବଜେଟ୍ ପାଇଁ ଆଧାର ହେବ। ଆର୍ଥିକ ବର୍ଷ ୨୦୨୬ରେ ୭.୩ ପ୍ରତିଶତ ବୃଦ୍ଧି ପାଇବ ବୋଲି ଆଶା କରାଯାଉଛି, ଯାହା ପୂର୍ବ ବର୍ଷ ୬.୪ ପ୍ରତିଶତ ଥିଲା।
ବିଶ୍ୱବ୍ୟାପୀ ଅନିଶ୍ଚିତତା ସତ୍ତ୍ୱେ ଭାରତୀୟ ଅର୍ଥନୀତି ଦୃଢ଼ ରହିଛି। ଏହାର ମୁଖ୍ୟ କାରଣଗୁଡ଼ିକ ହେଲା, ସେବା କ୍ଷେତ୍ରର ଦୃଢ଼ତା, ପୁଞ୍ଜି ନିବେଶରେ ବୃଦ୍ଧି, ଲକ୍ଷ୍ୟଭିତ୍ତିକ ସରକାରୀ ଖର୍ଚ୍ଚ, ଶିଳ୍ପ ଉତ୍ପାଦନରେ ବୃଦ୍ଧି ଆଦି ସାମିଲ ରହିଛି।
ସେହିପରି ଆର୍ଥିକ ବର୍ଷ ମଧ୍ୟରେ ସରକାରଙ୍କ ଦ୍ୱାରା ନିଆଯାଇଥିବା ନିମ୍ନଲିଖିତ ପଦକ୍ଷେପଗୁଡ଼ିକ ଖାଉଟି ଚାହିଦା ବଢ଼ାଇବାରେ ସହାୟକ ହୋଇଛି। ମଧ୍ୟବିତ୍ତ ବର୍ଗଙ୍କ ପାଇଁ ଆୟକର ରିହାତି ଏବଂ ସେପ୍ଟେମ୍ବର ୨୨ରୁ ଅନେକ ସାମଗ୍ରୀ ଉପରେ ଜିଏସଟି ହ୍ରାସ କରାଯାଇଛି। ଯାହା ଖୁଚୁରା ସ୍ତରରେ ଦର ହ୍ରାସ କରିବାରେ ସାହାଯ୍ୟ କରିଛି।
ଏହି ଦୁଇଟି ପଦକ୍ଷେପ ଯୋଗୁଁ ଖାଉଟିଙ୍କ ହାତରେ ଅଧିକ ଖର୍ଚ୍ଚଯୋଗ୍ୟ ଆୟ ରହିବା ସହ ଦୈନନ୍ଦିନ ବ୍ୟବହାର୍ଯ୍ୟ ସାମଗ୍ରୀର ମୂଲ୍ୟ ହ୍ରାସ ପାଇଛି, ଫଳରେ FMCG, କଞ୍ଜ୍ୟୁମର ଡ୍ୟୁରେବଲ୍ସ ଏବଂ ସେବା କ୍ଷେତ୍ରରେ ଚାହିଦା ବୃଦ୍ଧି ପାଇଛି।
