ନୂଆଦିଲ୍ଲୀ,୧।୧୨: ଭେନେଜୁଏଲା ସହ ବଢ଼ୁଥିବା ଉତ୍ତେଜନା ମଧ୍ୟରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭେନେଜୁଏଲାର ରାଷ୍ଟ୍ରପତି ନିକୋଲସ୍ ମାଦୁରୋଙ୍କୁ ଫୋନ୍ରେ ଦେଶ ଛାଡ଼ି ପଳାଇଯିବାକୁ ଧମକ ଦେଇଛନ୍ତି।
ମିଆମି ହେରାଲ୍ଡର ରିପୋର୍ଟ ଅନୁଯାୟୀ, ଟ୍ରମ୍ପ ଫୋନ୍ରେ ମାଦୁରୋଙ୍କୁ ଚେତାବନୀ ଦେଇ କହିଥିଲେ ଯେ, “ଯଦି ଆପଣ ନିଜକୁ ଏବଂ ଆପଣଙ୍କ ପରିବାରକୁ ବଞ୍ଚାଇବାକୁ ଚାହାଁନ୍ତି, ତେବେ ତୁରନ୍ତ ଭେନେଜୁଏଲା ଛାଡ଼ି ପଳାଇଯାଆନ୍ତୁ।”
ଟ୍ରମ୍ପ, ମାଦୁରୋ, ତାଙ୍କ ପତ୍ନୀ ସିଲିଆ ଫ୍ଲୋରେସ୍ ଏବଂ ତାଙ୍କ ପୁଅଙ୍କୁ ସୁରକ୍ଷିତ ଭାବେ ଦେଶରୁ ବାହାରି ଯିବାର ପ୍ରସ୍ତାବ ଦେଇଥିଲେ। ତେବେ ତୁରନ୍ତ ଦେଶ ଛାଡ଼ିବାକୁ ଥିବା ସର୍ତ୍ତକୁ ଭେନେଜୁଏଲା ପ୍ରତ୍ୟାଖ୍ୟାନ କରିବାରୁ ଆଲୋଚନା ବିଫଳ ହୋଇଥିଲା।
ଆମେରିକାରେ ଭେନେଜୁଏଲା ଦେଇ ହେଉଥିବା ଡ୍ରଗ୍ସ ଚାଲାଣ ଉପରେ କଠୋର ଆଭିମୁଖ୍ୟ ଗ୍ରହଣ କରି ଟ୍ରମ୍ପ ନିକଟରେ ଭେନେଜୁଏଲାର ଏୟାରସ୍ପେସ୍ ବନ୍ଦ କରିବାକୁ ଘୋଷଣା କରିଥିଲେ। ମାଦୁରୋ ସରକାର ଏହାକୁ ଆନ୍ତର୍ଜାତୀୟ ମାନଦଣ୍ଡ ବିରୁଦ୍ଧରେ ଏକ ସ୍ୱାଧୀନ ରାଷ୍ଟ୍ରର ସାର୍ବଭୌମତ୍ୱ ପ୍ରତି ସିଧାସଳଖ ଧମକ ବୋଲି କହିଥିଲେ। ଏହି ଘୋଷଣା ପରେ ଆମେରିକା ଭେନେଜୁଏଲା ଉପରେ ଆକ୍ରମଣ ପାଇଁ ପ୍ରସ୍ତୁତି କରୁଛି କି ବୋଲି ଅଟକଳ ବୃଦ୍ଧି ପାଇଛି।
ଆମେରିକା ଲଗାତାର ଅଭିଯୋଗ କରୁଛି ଯେ ଭେନେଜୁଏଲା ମାଧ୍ୟମରେ ଆମେରିକାକୁ ଡ୍ରଗ୍ସ ଯୋଗାଣ ହେଉଛି। ଏହି କାରଣରୁ କ୍ୟାରିବିଆନ୍ ସାଗରରେ ଆମେରିକା ଗତ କିଛି ସପ୍ତାହ ମଧ୍ୟରେ ଆକ୍ରମଣ ବଢ଼ାଇଛି, ଯେଉଁଥିରେ ୨୦ରୁ ଅଧିକ ଜାହାଜ ଉପରେ ଆକ୍ରମଣ ହୋଇଛି ଏବଂ ୮୦ରୁ ଅଧିକ ଲୋକଙ୍କର ମୃତ୍ୟୁ ଘଟିଛି।
ରାଷ୍ଟ୍ରପତି ଟ୍ରମ୍ପ ଗୁରୁବାର ‘ଥ୍ୟାଙ୍କସ୍ଗିଭିଂ ଡେ’ ଅବସରରେ ସୈନିକମାନଙ୍କୁ ସମ୍ବୋଧିତ କରି କହିଥିଲେ: “ଆମେ ସେମାନଙ୍କୁ ସୀମାରେ ଅଟକାଇବା ଆରମ୍ଭ କରିବୁ। ସୀମାରେ କାର୍ଯ୍ୟାନୁଷ୍ଠାନ ସହଜ ଏବଂ ଖୁବ୍ ଶୀଘ୍ର ଆରମ୍ଭ ହେବାକୁ ଯାଉଛି।” ଏହି ଅଞ୍ଚଳରେ ଏୟାରକ୍ରାଫ୍ଟ କ୍ୟାରିୟର ‘ୟୁଏସ୍ଏସ୍ ଗେରାଲ୍ଡ ଫୋର୍ଡ’ ସମେତ ବହୁ ସଂଖ୍ୟକ ଆମେରିକୀୟ ନୌସେନା ଜାହାଜ ଏବଂ ୧୫,୦୦୦ ମିଲିଟାରୀ କର୍ମଚାରୀଙ୍କୁ ମୁତୟନ କରାଯାଇଛି।
