ୱାଶିଂଟନ,୧୧ ।୧୨: ଶାସନ ଗାଦି ହାତରୁ ଯିବା ପରେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଲଗାତାର ଭାବେ ଭିନ୍ନ ଭିନ୍ନ ନେତାଙ୍କୁ ଟାର୍ଗେଟ କରୁଛନ୍ତି । ଏଥର ସେ ପୂର୍ବତନ ଇସ୍ରାଏଲ ପ୍ରଧାନମନ୍ତ୍ରୀ ବେନଜାମିନ ନେତନ୍ୟାହୁଙ୍କ ପାଇଁ କଡା ଶବ୍ଦ ବ୍ୟବହାର କରିଛନ୍ତି । ଲେଖକ ବରାକ ରୱିଦଙ୍କ ପୁସ୍ତକରୁ ଜଣାପଡିଛି କି ନେତନ୍ୟାହୁ ବାଇଡେନଙ୍କୁ ଯେଉଁଭଳି ଭାବେ ଶୁଭେଚ୍ଛା ଜଣାଇଥିଲେ ତାହା ଡୋନାଲ୍ଡ ଟ୍ରମ୍ପଙ୍କୁ ଆଦୌ ପସନ୍ଦ ନ ଥିଲା । ଏହାକୁ ନେଇ ଟ୍ରମ୍ପ ନେତନ୍ୟାହୁଙ୍କୁ ବିଶ୍ୱାସଘାତୀ ବୋଲି କହିଦେଲେ । ଟ୍ରମ୍ପ କହିଛନ୍ତି ମୁଁ ନେତନ୍ୟାହୁଙ୍କ ପାଇଁ ଏତେ କାମ କଲି ସେ ମୋତେ ଧୋକା ଦେଲେ । ଟ୍ରମ୍ପ କହିଛନ୍ତି ଯେବେଠାରୁ ନେତନ୍ୟାହୁ ରାଷ୍ଟ୍ରପତି ବାଇଡେନଙ୍କୁ ଶୁଭେଚ୍ଛା ଜଣାଇଲେ ସେବେଠାରୁ ସେ ତାଙ୍କ ସହ କଥା ହେବା ବନ୍ଦ କରିଦେଇଛନ୍ତି । ଏଥିପାଇଁ ସେ ନେତନ୍ୟାହୁଙ୍କୁ କେବେ କ୍ଷମା ଦେବେ ନାହିଁ ବୋଲି କହିଛନ୍ତି । ଟ୍ରମ୍ପ କହିଛନ୍ତି ମୁଁ ଇସ୍ରାଏଲର ବହୁତ ସେବା କରିଛି । ମୁଁ ହିଁ ସେଂଚୁରୀ ଡିଲ୍ କରିଛି, ଏହା କୌଣସି ଛୋଟମୋଟ କାମ ନ ଥିଲା, ବହୁତ ବଡ କାମ ଥିଲା ଯାହା ମୁଁ ଇସାଏଲ ପାଇଁ କରିଛି । ଏହି କାମ ମୁଁ ନିର୍ବାଚନ ପୂର୍ବରୁ କରିଥିଲି ଓ ନେତନ୍ୟାହୁଙ୍କୁ ସାହାଯ୍ୟ ବି କରିଥିଲି । ହେଲେ ନେତନ୍ୟାହୁ ଦୌଡଇ ଦୌଡି ଯାଇ ବାଇଡେନଙ୍କୁ ଶୁଭେଚ୍ଛା ଜଣାଇଥିଲେ ।
