ମଥୁରା, ୨୨।୯: ଉତ୍ତର ପ୍ରଦେଶର ମଥୁରାରୁ ଏକ ଆଶ୍ଚର୍ଯ୍ୟଜନକ ଘଟଣା ସାମ୍ନାକୁ ଆସିଛି। ଯେଉଁଠାରେ ଜଣେ ଡାକ୍ତର ଟାର୍ଗେଟ୍ ପୂରଣ କରିବା ଲାଗି ୧୫ଥରରୁ ଊର୍ଦ୍ଧ୍ୱ ନିଜର କରୋନା ଟେଷ୍ଟ କରାଇଛନ୍ତି। ଏଭଳି ଭାବେ କରୋନା ଟେଷ୍ଟ କରାଉଥିବା ଡାକ୍ତରଙ୍କ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି। ଏହି ଭିଡିଓରେ ଦେଖିବାକୁ ମିଳିଛି ଯେ, ବଳଦେବ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ଜଣେ ସ୍ବାସ୍ଥ୍ୟକର୍ମୀ ରାଜକୁମାର ସାରସ୍ବତ ନାମକ ଏହି ଡାକ୍ତରଙ୍କ ସ୍ବାବ ସଂଗ୍ରହ କରୁଛନ୍ତି। ଏହାପରେ ଏହି ନମୁନାର ନକଲି ନାମ କରଣ କରାଯାଇ ତାହାକୁ ସିଏମ୍ଓ କାର୍ଯ୍ୟାଳୟକୁ ପଠାଗଲା।
ସାରସ୍ବତ ନିଜେ ମଧ୍ୟ ସ୍ବୀକାର କରି କହିଛନ୍ତି, ସେ ଏଥିଲାଗି ନିଜର ସ୍ବାବ୍ ଦେଇଛନ୍ତି କାରଣ ସଂଗୃହିତ ନମୁନା ସଂଖ୍ୟା ମୁଖ୍ୟ ଚିକିତ୍ସା ଅଧିକାରୀ (ସିଏମ୍ଓ)ଙ୍କ କାର୍ଯ୍ୟାଳୟ ପକ୍ଷରୁ ଧାର୍ଯ୍ୟ ଟାର୍ଗେଟ୍ଠାରୁ କମ୍। ଅବଶ୍ୟ ଏହି ସମୟରେ ଜଣେ ସ୍ବାସ୍ଥ୍ୟକର୍ମୀ ଡାକ୍ତରଙ୍କୁ ଅନେକଥର ଟେଷ୍ଟ ନ କରାଇବା ଲାଗି ପରାମର୍ଶ ଦେଇଛନ୍ତି। ଏହି ଘଟଣାକୁ ନେଇ ଅତିରିକ୍ତ ସିଏମ୍ଓ ରାଜୀବ ଗୁପ୍ତା କହିଛନ୍ତି, ଘଟଣାର ଅନୁସନ୍ଧାନ କରାଯାଉଛି। ଯଦି ସ୍ବାସ୍ଥ୍ୟ ଅଧିକାରୀ ଦୋଷୀ ସାବ୍ୟସ୍ତ ହୁଅନ୍ତି ତେବେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
