ଶାରଜା, ୧୫।୧୦- ଇଣ୍ଡିଆନ ପ୍ରିମିୟର ଲିଗ୍ରେ ଗୁରୁବାର ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ଓ କିଙ୍ଗ୍ସ ଇଲେଭେନ ପଞ୍ଜାବ ମଧ୍ୟରେ ମ୍ୟାଚ ଅନୁଷ୍ଠିତ ହେବ। ପଞ୍ଜାବ ଏପର୍ଯ୍ୟନ୍ତ ଖେଳିଥିବା ୭ ମ୍ୟାଚରୁ ୬ ପରାଜୟଲାଭ କରି ମାତ୍ର ୨ ପଏଣ୍ଟ ପାଇଛି। ତେଣୁ ପ୍ଲେ-ଅଫ୍ ଆଶା ଉଜ୍ଜୀବିତ ରଖିବାକୁ ହେଲେ ଦଳକୁ ଅବଶିଷ୍ଟ ୭ ମ୍ୟାଚରେ ବିଜୟ ଲାଭ କରିବାକୁ ପଡ଼ିବ। ତେଣୁ ଏଣିକି ପ୍ରତି ମ୍ୟାଚ ଦଳପାଇଁ କର ଅବା ମର ସ୍ଥିତି ସୃଷ୍ଟି କରିଛି। ଅନ୍ୟପକ୍ଷରେ ଆର୍ସିବି ୭ ମ୍ୟାଚରୁ ୫ ବିଜୟ ସହ ୧୦ ପଏଣ୍ଟ ପାଇ ସାରିଛି। ଦଳ ସନ୍ରାଇଜର୍ସ ହାଇଦ୍ରାବାଦ, ମୁମ୍ବାଇ ଇଣ୍ଡିଆନ୍ସ, ରାଜସ୍ଥାନ ରୟାଲ୍ସ, ଚେନ୍ନାଇ ସୁପରକିଙ୍ଗ୍ସ ଓ କୋଲକାତା ନାଇଟ ରାଇଡର୍ସ ବିପକ୍ଷରେ ବିଜୟ ହାସଲ କରିଥିବାବେଳେ ପଞ୍ଜାବ ଏବଂ ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ପରାଜିତ ହୋଇଛି। ଏବେ ବିରାଟ କୋହଲିଙ୍କ ଦଳପାଇଁ ପଞ୍ଜାବ ବିପକ୍ଷ ରିଟର୍ନ ମ୍ୟାଚରେ ପରାଜୟର ମଧୁର ପ୍ରତିଶୋଧ ନେବା ସୁଯୋଗ ଆସିଛି। ଦଳ କ୍ରମାଗତ ୨ଟି ମ୍ୟାଚ ଜିତି ସାରିଥିବାରୁ ବିଜୟରେ ହ୍ୟାଟ୍ରିକ କରିବା ଅପେକ୍ଷରେ ଅଛି।
ଗେଲ୍ ଖେଳିବେ
ଏଥର ପଞ୍ଜାବର ପ୍ରଦର୍ଶନ ଅତ୍ୟନ୍ତ ନୈରାଶ୍ୟଜନକ ରହିଛି। ଏପରି କେତେକ ମ୍ୟାଚରେ ଦଳ ବିଜୟ ଦ୍ୱାରରେ ପହଞ୍ଚତ୍ଥିଲେ ହେଁ ଫିନିଶିଂ କରି ନ ପାରି ପରାଜୟ ସ୍ବାଦ ଚାଖିଛି। ଆର୍ସିବି ବିପକ୍ଷ ଗୁରୁତ୍ୱପୂର୍ଣ୍ଣ ମ୍ୟାଚରେ ବିସ୍ଫୋରକ ଓ୍ବେଷ୍ଟଇଣ୍ଡିଜ ବ୍ୟାଟ୍ସମ୍ୟାନ କ୍ରିସ୍ ଗେଲ୍ ଖେଳିବେ ବୋଲି ସୂଚନା ମିଳି ସାରିଛି। ଏପର୍ଯ୍ୟନ୍ତ ପଞ୍ଜାବର ଅଭିଯାନରେ ଗେଲ୍ ସାମିଲ ହୋଇପାରି ନ ଥିଲେ। ଆଗାମୀ ମ୍ୟାଚରେ ଗେଲ୍ଙ୍କ ପ୍ରଦର୍ଶନ ବଳରେ ଦଳ କ୍ରମାଗତ ୫ ମ୍ୟାଚ ପରାଜୟ ଧାରା ଭାଙ୍ଗିବା ଲକ୍ଷ୍ୟରେ ରହିଛି। ଚଳିତ ଆଇପିଏଲ୍ର ପ୍ରଥମ ପର୍ଯ୍ୟାୟରେ ଆରସିବିକୁ ହରାଇଥିଲା ପଞ୍ଜାବ। ଏହା ଦଳକୁ ମନସ୍ତାତ୍ତ୍ୱିକ ଫାଇଦାରେ ରଖିବ। ଶାରଜା ଗ୍ରାଉଣ୍ଡ ଅପେକ୍ଷାକୃତ ଛୋଟ ଥିବାରୁ ଗେଲ୍ ବଡ଼ ଶଟ୍ ଖେଳିବା ନେଇ ପଞ୍ଜାବ ପ୍ରଶଂସକ ଆଶା ରଖିଛନ୍ତି। ତେବେ ଚଳିତ ଆଇପିଏଲରେ ପ୍ରଥମଥରପାଇଁ ପଡ଼ିଆକୁ ଓହ୍ଲାଇବାକୁ ଯାଉଥିବାରୁ ୪୧ ବର୍ଷୀୟ ଗେଲ୍ଙ୍କ ପାଇଁ ହଠାତ୍ ବଡ଼ ଶଟ୍ ଖେଳିବା ସହଜ ହେବନାହିଁ ବୋଲି ବିଶେଷଜ୍ଞମାନେ ମତ ଦେଇଛନ୍ତି। ଗତ ୨ଟି ମ୍ୟାଚରେ ସେ ଖେଳିବାନେଇ ଫ୍ରାଞ୍ଚାଇଜ୍ ପକ୍ଷରୁ ସୂଚନା ଦିଆଯାଇଥିଲା। ମାତ୍ର ଫୁଡ୍ ପଏଜନିଂ ଯୋଗୁ ସେ ଚୂଡ଼ାନ୍ତ ଏକାଦଶରେ ସାମିଲ ହୋଇପାରି ନ ଥିଲେ। ତେବେ ସେ କେଉଁ ଖେଳାଳିଙ୍କ ସ୍ଥାନନେବେ ତାହା ଦେଖିବାକୁ ଉତ୍ସୁକତା ରହିଛି। ଗ୍ଲେନ ମ୍ୟାକ୍ସଓ୍ବେଲ ଏପର୍ଯ୍ୟନ୍ତ ଧୂଆଁଧାର ବ୍ୟାଟିଂ କରିପାରି ନାହାନ୍ତି। ତେଣୁ ତାଙ୍କ ସ୍ଥାନରେ ଗେଲ୍ଙ୍କୁ ନିଆ ଯାଇପାରେ। ଏହା ହେଲେ ଜଣେ ଭାରତୀୟ ବୋଲରଙ୍କୁ ନେବାକୁ ପଡ଼ିବ। ଟୁର୍ନାମେଣ୍ଟର ଦୁଇ ସର୍ବାଧିକ ରନ ସଂଗ୍ରହକାରୀ ଅଧିନାୟକ ଲୋକେଶ ରାହୁଲ(୩୮୭ ରନ) ଓ ମୟଙ୍କ ଅଗ୍ରଓ୍ବାଲ(୩୩୭ ରନ) ପଞ୍ଜାବ ଦଳର। ମାତ୍ର ଏହି ଦଳ ପଏଣ୍ଟ ଟେବୁଲର ନିମ୍ନରେ ରହି ଉପରକୁ ଉଠିବାକୁ ସଂଘର୍ଷ କରୁଛି। ମହମ୍ମଦ ସାମି ଓ ରବି ବିଷ୍ଣୋଇଙ୍କୁ ଛାଡ଼ିଦେଲେ ଅନ୍ୟ କୌଣସି ବୋଲର ପ୍ରଭାବୀ ହୋଇପାରି ନାହାନ୍ତି। ଅନେକ ପରୀକ୍ଷା ନିରୀକ୍ଷା ହୋଇ ସାରିଥିଲେ ହେଁ ଦଳର ସନ୍ତୁଳନ ଏପର୍ଯ୍ୟନ୍ତ ସଜଡ଼ା ଯାଇପାରିନାହିଁ।
ଆର୍ସିବି ଏବେ ମଜଭୁତ ସ୍ଥିତିରେ ରହିଛି। ଗତ କିଛିବର୍ଷର ପ୍ରଦର୍ଶନକୁ ଦେଖିଲେ ଏଥର ବୋଲିଂ ବିଭାଗକୁ ନେଇ ଥିବା ଚିନ୍ତା ଦୂର ହୋଇଥିବା ପରିଲକ୍ଷିତ ହୋଇଛି। ଦୁଇ ସ୍ପିନର ଓ୍ବାଶିଂଟନ ସୁନ୍ଦର ଓ ୟୁଜବେନ୍ଦ୍ର ଚହଲ ଅତ୍ୟନ୍ତ ପ୍ରଭାବୀ ସାବ୍ୟସ୍ତ ହୋଇଛନ୍ତି। ଆହତ ସମସ୍ୟାରୁ ମୁକୁଳି କ୍ରିସ୍ ମୋରିସ ଦଳରେ ଯୋଗଦେବାପରେ ପେସ୍ ବିଭାଗ ମଧ୍ୟ ଶାଣିତ ହୋଇଛି। ଆରସିବି ଗତ ମ୍ୟାଚରେ ଏହି ଗ୍ରାଉଣ୍ଡରେ କୋଲକାତାକୁ ଭେଟିଥିଲା। ତେଣୁ ମ୍ୟାଚ ଆଗେଇବା ସହିତ ଗ୍ରାଉଣ୍ଡ କଣ୍ଡିଶନରେ କିପରି ପରିବର୍ତ୍ତନ ହେଉଛି ତାହା ଦଳକୁ ଭଲଭାବେ ଜଣାଅଛି। କୋଲକାତା ବିପକ୍ଷରେ ଆରୋନ ଫିଞ୍ଚ୍ ଭଲ ବ୍ୟାଟିଂ କରିଥିବାରୁ ତାଙ୍କ ସହ ଦେବଦତ୍ତ ପଡିକାଲ, ଅଧିନାୟକ ବିରାଟ କୋହଲି ଓ ଏବି ଡିଭିଲର୍ସଙ୍କୁ ନେଇ ଗଠିତ ଆରସିବିର ଟପ୍ ଅର୍ଡର ଯେ କୌଣସି ଦଳପାଇଁ ଚିନ୍ତାର କାରଣ ହୋଇପାରନ୍ତି।
ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର: ବିରାଟ କୋହଲି(ଅଧିନାୟକ), ଏବି ଡି’ଭିଲର୍ସ, ଗୁରକୀରଟ ମାନ, ଦେବଦତ୍ତ ପଡିକଲ, ଆରୋନ ଫିଞ୍ଚ୍, ୟୁଜବେନ୍ଦ୍ର ଚହଲ, ମହମ୍ମଦ ସିରାଜ, ଉମେଶ ଯାଦବ, ନବଦୀପ ସଇନୀ, ଡେଲ ଷ୍ଟେଇନ୍, ଇସୁରୁ ଉଡାନ, ମୋଇନ ଅଲୀ, ପଓ୍ବନ ନେଗୀ, ଶିବମ୍ ଦୁବେ, ଓ୍ବାଶିଂଟନ ସୁନ୍ଦର, କ୍ରିସ୍ ମୋରିସ, ପବନ ଦେଶପାଣ୍ଡେ, ପାର୍ଥିବ ପଟେଲ, ଜୋଶୁଆ ଫିଲିପ୍, ଶାହାବାଜ ଅହମଦ, ଆଡାମ ଜାମ୍ପା।
କିଙ୍ଗ୍ସ ଇଲେଭେନ ପଞ୍ଜାବ: ଲୋକେଶ ରାହୁଲ(ଅଧିନାୟକ), କ୍ରିସ୍ ଗେଲ୍, ମୟଙ୍କ ଅଗ୍ରଓ୍ବାଲ, କରୁଣ ନାୟାର, ସର୍ଫରାଜ ଖାଁ, ମନଦୀପ ସିଂ, ଶେଲଡନ କୋଟ୍ରେଲ, ଇଶାନ ପୋରେଲ, ରବି ବିଷ୍ଣୋଇ, ମହମ୍ମଦ ସାମି, ମୁଜିବୁର ରହମନ, ଅର୍ଶଦୀପ ସିଂ, ହର୍ଡୁସ ଭିଲଜନ, ମୁରୁଗାନ ଅଶ୍ୱିନ, ଜଗଦୀଶ ସୁଚିଥ, ହରପ୍ରୀତ ବ୍ରାର, ଦର୍ଶନ ନଲକନ୍ଦେ, ଗ୍ଲେନ ମ୍ୟାକ୍ସଓ୍ବେଲ, ଜେମ୍ସ ନୀଶାମ, କ୍ରିସ୍ ଜୋର୍ଡାନ, କ୍ରିଷ୍ଣାପ୍ପା ଗୋଥାମ, ଦୀପକ ହୁଦା, ତାଜିନ୍ଦର ସିଂ ଧିଲୋନ, କିକୋଲାସ ପୁରନ, ପ୍ରଭସିମରନ ସିଂ।
