ଜେନେଭା, ୫।୧ : ପୃଥିବୀରେ କରୋନା ମହାମାରୀର ନୂଆ ଭାରିଆଣ୍ଟ୍ ଓମିକ୍ରନ୍ ଯୋଗୁ ସଙ୍କଟ ସୃଷ୍ଟି ହେବାରେ ଲାଗିଛି। ଓମିକ୍ରନ୍ ଭାରତ ସମେତ ପୃଥିବୀର ବହୁ ଦେଶରେ ରେକର୍ଡ ଭାଙ୍ଗିବାରେ ଲାଗିଛି। କରୋନାର ସବୁଠାରୁ ବିପଜ୍ଜନକ ଭାରିଆଣ୍ଟ୍ ଓମିକ୍ରନ ସଂକମ୍ରଣ ଯୋଗୁ ସାରା ପୃଥିବୀର ବିଭିନ୍ନ ଦେଶରେ ଏହାକୁ ରୋକିବା ପାଇଁ ପ୍ରତିବନ୍ଧକ ମଧ୍ୟ ଲଗାଇବା ଆରମ୍ଭ ହୋଇଛି।
ଏପରିସ୍ଥଳେ, ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ପକ୍ଷରୁ ଓମିକ୍ରନକୁ ନେଇ ଏକ ନୂତନ ଚେତାବନୀ ଜାରି ହୋଇଛି। ଡବ୍ଲ୍ୟୁଏଚ୍ଓ କହିଛି ଯେ ଓମିକ୍ରନ ଭାରିଆଣ୍ଟ୍ ଯୋଗୁ ଦେଖାଦେଉଥିବା ଥଣ୍ଡା ଏବଂ କାଶକୁ ସାଧାରଣ ସମସ୍ୟା ଭାବି ଏହାର ଚିକିତ୍ସା କରିବାରେ ଅଣଦେଖା କରନ୍ତୁ ନାହିଁ। ଓମିକ୍ରନ ଯୋଗୁ ଶରୀର ସମସ୍ତ ଅଙ୍ଗ ଅକାମୀ ହେବାର ଆଶଙ୍କା ରହିଛି। ତେଣୁ ଥଣ୍ଡା ଅବା କାଶ ହେଲେ ଯାଥାଶୀଘ୍ର ଏହାର ଚିକିତ୍ସା କରିବା ଆବଶ୍ୟକ ବୋଲି ଡବ୍ଲ୍ୟୁଏଚ୍ଓ କହିଛି।
ଡବ୍ଲ୍ୟୁଏଚ୍ଓର ବରିଷ୍ଠ ଜରୁରୀକାଳୀନ ଅଧିକାରୀ କ୍ୟାଥରିନ ସ୍ମଲଉଡ କହିଛନ୍ତି ଯେ ବର୍ତ୍ତମାନ ସତର୍କତା ଅବଲମ୍ବନ କରିବା ଅତ୍ୟନ୍ତ ଜରୁରୀ। ନଚେତ ଓମିକ୍ରନ ସଂକ୍ରମଣର ବୃଦ୍ଧି ହାର ବିପରୀତ ପ୍ରଭାବ ପକାଇବାର ଆଶଙ୍କା ରହିଛି। ଓମିକ୍ରନ ଡେଲ୍ଟା ଭାରିଆଣ୍ଟ ଅପେକ୍ଷା କମ ସାଂଘାତିକ, କିନ୍ତୁ ଅଣଦେଖା କଲେ ଏହା ମୃତ୍ୟୁର କାରଣ ହୋଇପାରେ। ସେ କହିଛନ୍ତି ଯେ ଆମେ ଏକ ବିପଜ୍ଜନକ ଅବସ୍ଥାରେ ଅଛୁ। ପଶ୍ଚିମ ୟୁରୋପରେ ଓମିକ୍ରନ୍ ସଂକ୍ରମଣ ହାର ବଢ଼ିବାରେ ଲାଗିଛି। ଏହାର ସମ୍ପୂର୍ଣ୍ଣ ପ୍ରଭାବ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ।
ପୂର୍ବରୁ ଡବ୍ଲ୍ୟୁଏଚ୍ଓ ମହାନିର୍ଦ୍ଦେଶକ ଟେଡ୍ରାସ ଅଧାନାମ ଘେବ୍ରେୟସସ କହିଥିଲେ ଯେ ଡେଲଟା ସଂକ୍ରମଣ ସମୟରେ ଓମିକ୍ରନ ଯୋଗୁ ଅଧିକ ଲୋକ ସଂକ୍ରମିତ ହୋଇ ସ୍ଥିତି ଅସମ୍ଭାଳ ହେବାର ଆଶଙ୍କା ରହିଛି।
କରୋନାର ଓମିକ୍ରନ ଭାରିଆଣ୍ଟ ଗତ ୨୦୨୧ ବର୍ଷ ନଭେମ୍ବରରେ ଦକ୍ଷିଣ ଆଫ୍ରିକା ଏବଂ ବୋଷ୍ଟୱାନାର ଏକ ଫାର୍ମରେ ଚିହ୍ନଟ କରାଯାଇଥିଲା। ସେବେଠାରୁ ଓମିକ୍ରନ ଇତିମଧ୍ୟରେ ୧୦୦ ଟି ଦେଶକୂ ବ୍ୟାପିଛି। ଫଳରେ ବହୁଦେଶ ପକ୍ଷରୁ ଅନ୍ତର୍ଜାତୀୟ ବିମାନ ଉଡ଼ାଣକୁ ବାତିଲ କରାଯାଇଛି।
