ଭୁବନେଶ୍ୱର, ୨୬।୮: ରାଜ୍ୟରେ ଟ୍ରାଫିକ୍ ନିୟମ ଉଲ୍ଲଂଘନକାରୀଙ୍କୁ ଏବେ ଆଉ ନିସ୍ତାର ନାହିଁ। ପ୍ରଥମଥର ପାଇଁ ନିୟମ ଉଲ୍ଲଂଘନ କରିଥିଲେ ମଧ୍ୟ ଚାଳକଙ୍କ ଡ୍ରାଇଭିଂ ଲାଇସେନ୍ସ (ଡିଏଲ୍) ସର୍ବନିମ୍ନ ୩ମାସ ପାଇଁ ରଦ୍ଦ କରାଯିବ। ଏଭଳି କଡ଼ା ପଦକ୍ଷେପ ଗ୍ରହଣ କରିଛି ରାଜ୍ୟ ପରିବହନ ବିଭାଗ।
ସଡ଼କ ସୁରକ୍ଷା ନେଇ ଗଠିତ ସୁପ୍ରିମକୋର୍ଟ କମିଟି ଦେଇଥିବା ନିର୍ଦ୍ଦେଶକୁ କାର୍ଯ୍ୟକାରୀ କରିବାକୁ ପରିବହନ କମିଶନର ତଥା ରାଜ୍ୟ ପରିବହନ କର୍ତ୍ତୃପକ୍ଷ ଅଧ୍ୟକ୍ଷ ଅରୁଣ ବୋଥ୍ରା ସମସ୍ତ ଆଞ୍ଚଳିକ ପରିବହନ ଅଧିକାରୀ(ଆର୍ଟିଓ)ଙ୍କୁ ପତ୍ର ମାଧ୍ୟମରେ ଅବଗତ କରାଇଛନ୍ତି। ୨୦୧୫ ଅଗଷ୍ଟ ୧୮ ତାରିଖରେ କମିଟି ଦେଇଥିବା ମତ ଅନୁସାରେ ଦ୍ରୁତ ଗାଡ଼ିଚାଳନା, ଧାର୍ଯ୍ୟଠାରୁ ଅଧିକ ମାଲ୍ ପରିବହନ କରିବା, ମାଲ୍ବାହୀ ଗାଡ଼ିରେ ଯାତ୍ରୀ ପରିବହନ, ମଦ୍ୟପାନ କରି ଗାଡ଼ି ଚଳାଇବା, ଗାଡ଼ି ଚଳାଇବାବେଳେ ମୋବାଇଲ ଫୋନ୍ ବ୍ୟବହାର କରିବା ଆଦି ଅଭିଯୋଗରେ ମୋଟର ଭେଇକିଲ ଆକ୍ଟ ୧୯୮୮ର ଦଫା ୧୯ ଏବଂ ସେଣ୍ଟ୍ରାଲ ମୋଟର ଭେଇକିଲ ରୁଲ୍ର ୨୧ ଅନୁସାରେ ଡ୍ରାଇଭିଂ ଲାଇସେନ୍ସ ରଦ୍ଦ କରିବାକୁ ପରିବହନ କମିଶନର ବୋଥ୍ରା ନିର୍ଦ୍ଦେଶ ଦେଇଛନ୍ତି। କ୍ରାଇମ୍ବ୍ରାଞ୍ଚ ରିପୋର୍ଟ ଅନୁସାରେ, ୨୦୨୧ ଜାନୁୟାରୀରୁ ଜୁନ୍ ମଧ୍ୟରେ ଦ୍ରୁତ ଗାଡ଼ି ଚାଳନା କରିଥିବା ଅଭିଯୋଗରେ ୪୦,୧୩୯ ଚାଲାଣ କଟାଯାଇଥିବାବେଳେ ମାତ୍ର ୪,୦୨୭(୧୦%) ଚାଳକଙ୍କ ଡ୍ରାଇଭିଂ ଲାଇସେନ୍ସ ରଦ୍ଦ କରାଯାଇଛି। ୨୦୨୦ ବର୍ଷରେ ଦ୍ରୁତ ଗାଡ଼ିଚାଳନା ଯୋଗୁ ୭୨% ଦୁର୍ଘଟଣା ଘଟିଥିଲା ଏବଂ ଏହା ମୋଟ ମୃତ୍ୟୁର ୭୩% ଅଟେ। ଏଥିରୁ ସଡ଼କ ନିୟମ ଉଲ୍ଲଂଘନକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା ଅନୁଭବ ହେଉଛି। କଠୋର ପଦକ୍ଷେପ ନେଲେ ହିଁ ସଡ଼କ ଦୁର୍ଘଟଣାର ମାତ୍ରାକୁ କମାଇବା ସହ ମୃତ୍ୟୁକୁ ମଧ୍ୟ ରୋକାଯାଇପାରିବ। ତେଣୁ ମୋଟର ଯାନ ଆଇନକୁ କଡ଼ାକଡ଼ି ପାଳନ କରିବାକୁ ସମସ୍ତ ଆର୍ଟିଓଙ୍କୁ ନିର୍ଦ୍ଦେଶ ଦିଆଯିବା ସହ ଉଲ୍ଲଂଘନକାରୀ ଚାଳକଙ୍କ ଶତପ୍ରତିଶତ ଡ୍ରାଇଭିଂ ଲାଇସେନ୍ସ ରଦ୍ଦ କରିବାକୁ ଲକ୍ଷ୍ୟ ରଖାଯାଇଥିବା ବୋଥ୍ରା କହିଛନ୍ତି।
ଟ୍ରାଫିକ୍ ଉଲ୍ଲଂଘନକାରୀଙ୍କ ବିରୋଧରେ କ’ଣ ସବୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ତା’ର ପ୍ରତି ୩ମାସରେ ଏକ ସମୀକ୍ଷା ରିପୋର୍ଟ ଆଞ୍ଚଳିକ ପରିବହନ ଅଧିକାରୀଙ୍କ ସ୍ତରରେ କରିବାକୁ ସୁପ୍ରିମକୋର୍ଟ କମିଟି ନିର୍ଦ୍ଦେଶ ଦେଇଥିଲେ। ସେହି ଅନୁସାରେ ୨୦୨୧ ଜାନୁୟାରୀରୁ ମାର୍ଚ୍ଚ ମଧ୍ୟରେ ୨୭,୨୬୪ ଏବଂ ଏପ୍ରିଲରୁ ଜୁନ୍ ମଧ୍ୟରେ ୧୦,୭୨୪ ବେପରୁଆ ଚାଳକଙ୍କ ଡ୍ରାଇଭିଂ ଲାଇସେନ୍ସ ରଦ୍ଦ କରାଯାଇଥିବା ସାରଥି ଡାଟାବେସରୁ ଜଣାପଡ଼ିଛି।
