ଜୋକୋଭିଚ୍‌ ବନାମ ଅଷ୍ଟ୍ରେଲିଆ

ଭାରତରେ ସରକାରୀ ବ୍ୟବସ୍ଥାରେ ନିତିଦିନିଆ ଏପଟସେପଟ ନିଷ୍ପତ୍ତି ଦେଖି ସମସ୍ତେ ବିରକ୍ତ ହେବା ସ୍ବାଭାବିକ। ରାଜନୈତିକ କିମ୍ବା ଅମଲାତାନ୍ତ୍ରିକ ଚାପରେ ସରକାରୀ କଳ ଏପାଖ ନ ହେଲେ ସେପାଖ ଛବି ଦର୍ଶାଏ। ସରକାରୀ ନୀତି ସବୁବେଳେ ଜନସାଧାରଣଙ୍କ ହିତ ନିମନ୍ତେ ହେବା କଥା। ଭାରତରେ ଏହା କ୍ୱଚିତ୍‌ ଦେଖିବାକୁ ମିଳିଥାଏ। ଦୁଇଟି ସାଧାରଣ ଉଦାହରଣ ଦେଖିଲେ ଏହାର ଅର୍ଥ ବୁଝିହେବ। ଜଣେ ଅଫିସର ଇଚ୍ଛା କଲେ ବୋଲି ଶାହରୁଖ ଖାନ୍‌ଙ୍କ ପୁଅ ଆର୍ଯ୍ୟାନଙ୍କୁ ବିନା ପ୍ରମାଣରେ ଗିରଫ କରି ଜେଲରେ ରଖାଇପାରିଲେ। ସେହିଭଳି ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ପାଇଁ ତାଙ୍କ ବାନ୍ଧବୀ ରିୟା ଚକ୍ରବର୍ତ୍ତୀଙ୍କୁ ଦୀର୍ଘଦିନ ଜେଲରେ ରଖିପାରିଲେ। ଏହି ଅମଲାତାନ୍ତ୍ରିକ କାର୍ଯ୍ୟାନୁଷ୍ଠାନ ପଛରେ ନିଶ୍ଚୟ ସକ୍ରିୟ ରାଜନୈତିକ ସମର୍ଥନ ଥିଲା। ସେହିଭଳି ରାଜନୈତିକ ଚାପରେ କେନ୍ଦ୍ରମନ୍ତ୍ରୀ ଅଜୟ ମିଶ୍ରା ‘ଟେନି’ଙ୍କ ପୁତ୍ର ଆଶିଷ ମିଶ୍ରା ତାଙ୍କ ଏସ୍‌ୟୁଭି ଗାଡ଼ିକୁ ଚାଷୀଙ୍କ ଉପରେ ମଡ଼ାଇ ଅନେକଙ୍କୁ ଜୀବନରେ ମାରିଦେବା ସତ୍ତ୍ୱେ ବହୁଦିନ ପର୍ଯ୍ୟନ୍ତ ପୋଲିସ ଦ୍ୱାରା ଗିରଫ ହେଲେ ନାହିଁ। ଏହା ହେଉଛି ‘ମୋ ଇଚ୍ଛା’ ସରକାରର କାର୍ଯ୍ୟପ୍ରଣାଳୀ।
ଅନ୍ୟପଟେ ଅଷ୍ଟ୍ରେଲିଆରେ ସର୍ବିୟା ଖେଳାଳି ତଥା ବିଶ୍ୱର ୧ ନମ୍ବର ଟେନିସ୍‌ ପ୍ଲେୟାର ନୋଭାକ୍‌ ଜୋକୋଭିଚ୍‌ଙ୍କ ବିବାଦକୁ ଦେଖାଯାଉ। ଟେନିସ୍‌ ଅଷ୍ଟ୍ରେଲିଆ ସଙ୍ଗଠନ ତରଫରୁ ଜୋକୋଭିଚ୍‌ଙ୍କୁ ଅଷ୍ଟ୍ରେଲିଆନ୍‌ ଓପନ୍‌ ଟେନିସ୍‌ ଚାମ୍ପିୟନଶିପ୍‌ରେ ଖେଳିବାକୁ ନିମନ୍ତ୍ରଣ କରାଯାଇଥିଲା। ଉଲ୍ଲେଖଯୋଗ୍ୟ, ଜୋକୋଭିଚ୍‌ ଗତଥର ଅଷ୍ଟ୍ରେଲିଆନ୍‌ ଓପନ୍‌ର ଚାମ୍ପିୟନ ହୋଇଥିଲେ। ନିଜର ସ୍ଥିତିକୁ ବଜାୟ ରଖିବା ପାଇଁ ଜୋକୋଭିଚ୍‌ଙ୍କ ସକାଶେ ଏହି ଟୁର୍ନାମେଣ୍ଟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ଗତ ଡିସେମ୍ବର ଆରମ୍ଭରେ ତାଙ୍କୁ କୋଭିଡ୍‌-୧୯ ହୋଇଥିଲା। ତେଣୁ ଜୋକୋଭିଚ୍‌ ଟିକା ନେବା ସମ୍ଭବପର ନୁହେଁ ବୋଲି କେତେକ ମହଲରୁ କୁହାଯାଉଛି। ସେଥିପାଇଁ ଯେତେବେଳେ ଅଷ୍ଟ୍ରେଲିଆର ମେଲବୋର୍ଣ୍ଣ ଉଡ଼ାଜାହାଜ ପଡ଼ିଆରେ ଜୋକୋଭିଚ୍‌ ବିମାନରୁ ଓହ୍ଲାଇ ଅଷ୍ଟ୍ରେଲିଆରେ ପ୍ରବେଶ କରିବାକୁ ଚେଷ୍ଟା କଲେ ସେତେବେଳେ ସେଠାରେ ଥିବା ସରକାରୀ ଇମିଗ୍ରେଶନ ଅଧିକାରୀ ତାଙ୍କୁ ଅଟକାଇଲେ। ଭିକ୍ଟୋରିଆ ରାଜ୍ୟରେ ଉଭୟ ଟିକା ନେଇ ନ ଥିବା ବ୍ୟକ୍ତିଙ୍କୁ ପ୍ରବେଶ ନିଷେଧ ଆଇନକୁ ଦର୍ଶାଇ ଏଭଳି କଠୋର ପଦକ୍ଷେପ ନିଆଯାଇଛି। ଉଲ୍ଲେଖଯୋଗ୍ୟ ଯେ, ଟେନିସ୍‌ ଅଷ୍ଟ୍ରେଲିଆ ଜୋକୋଭିଚ୍‌ଙ୍କୁ ଟିକା ନେଇ ନ ଥିବା ସତ୍ତ୍ୱେ ପ୍ରବେଶ ଅନୁମତିପତ୍ର ଦେଇଥିଲେ। ଏହା ସତ୍ତ୍ୱେ ଇମିଗ୍ରେଶନ ଅଧିକାରୀ ତାଙ୍କ ପ୍ରବେଶ କେମିତି ବନ୍ଦ କଲେ ବୋଲି ବିଶ୍ୱବ୍ୟାପୀ ଆଲୋଚନା ଆରମ୍ଭ ହୋଇଛି। ମନେହେଉଛି ଭାରତ ସରକାରଙ୍କ ଭଳି ଅଷ୍ଟ୍ରେଲିଆ ସରକାରର ବାମହାତ ଜାଣେ ନାହିଁ ଡାହାଣ ହାତ କ’ଣ କରୁଛି। ଉଲ୍ଲେଖ କରିବା ଠିକ୍‌ ହେବ ଯେ, ଜୋକୋଭିଚ୍‌ଙ୍କୁ ବେଆଇନ ଭାବେ ଅଷ୍ଟ୍ରେଲିଆ ପ୍ରବେଶ କରିଥିବା ଶରଣାର୍ଥୀଙ୍କ ସହିତ ରଖାଯାଇଛି।
ଅଷ୍ଟ୍ରେଲିଆ କେନ୍ଦ୍ର ସରକାର ଓ ଭିକ୍ଟୋରିଆ ରାଜ୍ୟ ସରକାରଙ୍କ ମଧ୍ୟରେ ସମନ୍ବୟ ଅଭାବ ରହିଥିଲା ଭଳି ଚିତ୍ର ପଦାକୁ ଆସୁଛି। ଏଥିସହିତ ଜୋକୋଭିଚ୍‌ଙ୍କ ସମ୍ପର୍କରେ ମଧ୍ୟ କିଛି କହିହେବ। ଏଠାରେ କୌଣସି ସନ୍ଦେହ ନାହିଁ ଯେ ଗତ କିଛି ଦଶନ୍ଧି ମଧ୍ୟରେ ବିଶ୍ୱସ୍ତରୀୟ ଟେନିସ୍‌ ଖେଳାଳିଙ୍କ ମଧ୍ୟରୁ ଜୋକୋଭିଚ୍‌ ଅନ୍ୟତମ। ତାଙ୍କର ବିଚକ୍ଷଣ ଗତି ଅଧିକାଂଶ ଦର୍ଶକଙ୍କୁ ଆକର୍ଷିତ କରିଥାଏ। ସେଥିପାଇଁ ସହଜରେ କହିହେବ ଯେ, ଏହି ଅଷ୍ଟ୍ରେଲିଆନ୍‌ ଟେନିସ୍‌ ଟୁର୍ନାମେଣ୍ଟରେ ମଧ୍ୟ ଜୋକୋଭିଚ୍‌ଙ୍କ ଜିତିବାର ଅଧିକ ସମ୍ଭାବନା ରହିଥିଲା। କିନ୍ତୁ ସ୍ଥିତି ଆମ୍ବିଳିଆ ହୋଇଯାଇଛି। ଏଠାରେ ଭାବିବା ସ୍ବାଭାବିକ ଯେ, ଜୋକୋଭିଚ୍‌ଙ୍କ ସମ୍ଭାବ୍ୟ ବିଜୟକୁ ଭଣ୍ଡୁର କରିବା ପାଇଁ ଏକ ବିରାଟ ମସୁଧା କରାଯାଇଛି। ଏଥିସହିତ ଏହା ମଧ୍ୟ କହିବାକୁ ହେବ ଯେ, ଜୋକୋଭିଚ୍‌ ତାଙ୍କ ଖେଳ ଜୀବନରେ କୌଣସି ଶୂନ୍ୟସ୍ଥାନ ଛାଡ଼ିବାକୁ ଚାହୁଁ ନାହାନ୍ତି। ଅବଶ୍ୟ ଏଠାରେ ପ୍ରବଳ ଲୋଭର ଭୂମିକା ମଧ୍ୟ ଥାଇପାରେ। କାରଣ ଟେନିସ୍‌ରେ ଜିତୁଥିବା ଅନ୍ତର୍ଜାତୀୟ ସ୍ତରର ଖେଳାଳି ଏହିଭଳି ଗୋଟେ ଟୁର୍ନାମେଣ୍ଟରୁ ଅନେକ ମିଲିୟନ ଆମେରିକୀୟ ଡଲାରର ଅଧିକାରୀ ହୋଇଥାଆନ୍ତି।
୧୦ ଜାନୁୟାରୀ (ଆଜି) ଜୋକୋଭିଚ୍‌ ଟେନିସ୍‌ କୋର୍ଟ ପରିବର୍ତ୍ତେ ଆଇନ କୋର୍ଟରେ ଖେଳିବେ। ନ୍ୟାୟାଳୟର ବିଚାର ପରେ ତାଙ୍କ ଭାଗ୍ୟ ନିର୍ଦ୍ଧାରଣ ହେବ। ଏହା କେବଳ ୨୦୨୨ ଅଷ୍ଟ୍ରେଲିଆନ୍‌ ଓପନ୍‌ ପାଇଁ ନୁହେଁ। ମାମଲାରେ ପରାଜିତ ହେଲେ ଜୋକୋଭିଚ୍‌ ଆସନ୍ତା ୩ ବର୍ଷ ପର୍ଯ୍ୟନ୍ତ ଅଷ୍ଟ୍ରେଲିଆ ପ୍ରବେଶ କରିପାରିବେ ନାହିଁ। ଅର୍ଥାତ୍‌ ଆସନ୍ତା ୩ ବର୍ଷର ଅଷ୍ଟ୍ରେଲିଆନ୍‌ ଓପନ୍‌ ମଧ୍ୟ ଖେଳିପାରିବେ ନାହିଁ। ଏହା ଫଳରେ ଜୋକୋଭିଚ୍‌ଙ୍କ ପାଇଁ ଆସନ୍ତା ୩ ବର୍ଷବ୍ୟାପୀ ଗ୍ରାଣ୍ଡ୍‌ସ୍ଲାମ ଜିତିବା ଅସମ୍ଭବ ହୋଇପଡ଼ିବ।
ମନକୁ ଚିନ୍ତା ଆସେ ଏଠାରେ ଭୂରାଜନୈତିକ ଖେଳ ମଧ୍ୟ ହୋଇଥାଇପାରେ। ଧରିନିଆଯାଉ ଜୋକୋଭିଚ୍‌ ସର୍ବିୟା ଭଳି କ୍ଷୁଦ୍ର ଦେଶର ନାଗରିକ ପରିବର୍ତ୍ତେ ବ୍ରିଟେନ, ଆମେରିକା କିମ୍ବା ରୁଷିଆର ଖେଳାଳି ହୋଇଥାଆନ୍ତେ। ସେଭଳି ସ୍ଥିତିରେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ୍‌ ମୋରିସନ୍‌ ଏଭଳି ଦମ୍ଭୋକ୍ତି ଦେଖାଇ ଜୋକୋଭିଚ୍‌ଙ୍କୁ ଅନ୍ୟ ସମସ୍ତ ସାଧାରଣ ଲୋକଙ୍କ ଭଳି ବ୍ୟବହାର କରିବାର ଆସ୍ପର୍ଦ୍ଧା ରଖିଥାଆନ୍ତେ କି? ପୃଥିବୀର ଏତେବଡ଼ ଖେଳାଳିଙ୍କୁ ଏକ ସାଧାରଣ ଶରଣାର୍ଥୀ କେନ୍ଦ୍ରରେ ରଖାଯାଇଥାଆନ୍ତା କି? ଏସବୁ ପ୍ରଶ୍ନର ଉତ୍ତର ଖୋଜିବା କଷ୍ଟକର ନୁହେଁ। ଏଥିରୁ ବୁଝିବାକୁ ହେବ ଯେ, ସବୁ ଖେଳାଳିଙ୍କୁ ନିଜ ଦେଶର ବୋଝ ଅନ୍ତର୍ଜାତୀୟ ସ୍ତରରେ ମୁଣ୍ଡାଇବାକୁ ପଡ଼ିଥାଏ।


Enter your email to get our daily news in your inbox.

All Right Reserved By Dharitri.Com

ଆମ ରାଜଧାନୀ: ଅତୀତ ଓ ବର୍ତ୍ତମାନ

ପ୍ର. ନୀହାର ରଞ୍ଜନ ପଟ୍ଟନାୟକ   ଆମ ରାଜ୍ୟର ରାଜଧାନୀ ଭୁବନେଶ୍ୱର ଗୋଟିଏ ଦିନରେ ନିର୍ମିତ ହୋଇନାହିଁ। ଏହାର ବିଗତ ଦୁଇହଜାର ବର୍ଷର ଗୌରବମୟ ଇତିହାସ...

ବିବାହ ବନାମ ବାଣ-ରୋଶଣି

ଡ. ସିଦ୍ଧାର୍ଥ କାନୁନ୍‌ଗୋ ବିବାହ ଋତୁ ଆସିଲେ ପ୍ରାୟ ପ୍ରତ୍ୟେକ ଦିନ ଅନ୍ତତଃ ଗୋଟାଏ ଦି’ଟା ଜାଗାରୁ ନିମନ୍ତ୍ରଣ ପତ୍ର ମିଳେ। ବନ୍ଧୁରକ୍ଷା କରିବାକୁ ଆମକୁ...

ଗରିବଙ୍କୁ ବିପଦ ଆଧାର

ସମୀତ ପଣ୍ଡା ଓ ବିପୁଲ କୁମାର ଧନକର ବେମାଲ, ବୟସ ଅଶୀ। କଳାହାଣ୍ଡି ଜିଲାର ଗୋଲାମୁଣ୍ଡା ବ୍ଲକ୍‌ ଅନ୍ତର୍ଗତ ବଡ଼ଚେରଗଁା ଗ୍ରାମପଞ୍ଚାୟତର କର୍ଲା ଗ୍ରାମରେ ବସବାସ...

ମେୟରରୁ ମୁଖ୍ୟମନ୍ତ୍ରୀ

ପିତା ଏମ. କରୁଣାନିଧିଙ୍କ ଫାଉଣ୍ଟେନ୍‌ ପେନ୍‌ରେ ରାଜ୍ୟବାସୀଙ୍କ କଲ୍ୟାଣ ନିମନ୍ତେ ଉଦ୍ଦିଷ୍ଟ କେତେକ ଫାଇଲ୍‌ରେ ଦସ୍ତଖତ କରି ତାମିଲନାଡୁର ମୁଖ୍ୟମନ୍ତ୍ରୀ ଏମ୍‌. କେ. ଷ୍ଟାଲିନ୍‌ ୭...

ବିଦାୟ ଗୋଧୂଳି

ଡ. ରମେଶ ଚନ୍ଦ୍ର ପରିଡ଼ା ସା କାଳକୁ ଆମେ ଗୋଧୂଳି ସମୟ ବୋଲି କହୁ। କାରଣ ଆଗେ ଏହି ସମୟରେ ଗ୍ରାମାଞ୍ଚଳରେ ଗୋରୁଗାଈ ଗୋଠରୁ ଫେରୁଥିଲେ...

ମୁଁ ଓଡ଼ିଶାକୁ ଜଗିଛି

ଦିଲୀପ ଦାଶଶର୍ମା ୧୯୦୩ ମସିହା ଆଜିର ଦିନରେ ମୋର ଜନ୍ମ ହୋଇଥିଲା। ମୋ ଜନ୍ମର ମୁଖ୍ୟ କାରଣ ଥିଲା ଓଡ଼ିଆ ଭାଷାଭାଷୀ ଅଞ୍ଚଳକୁ ଏକତ୍ରିତ କରି...

ବିଶ୍ୱବ୍ୟାଙ୍କର ପ୍ରଥମ ମହିଳା ଏମ୍‌ଡି

ବ୍ୟକ୍ତିତ୍ୱ/ଜିତେନ୍ଦ୍ର କୁମାର ନାୟକ ଅନ୍ତର୍ଜାତୀୟ ଆର୍ଥିକ ସଂସ୍ଥା ଭାବେ ବିଶ୍ୱ ବ୍ୟାଙ୍କ ଗରିବ ରାଷ୍ଟ୍ରଗୁଡ଼ିକୁ ସୁଧମୁକ୍ତ ଋଣ ଓ ଅନୁଦାନ ଦେଇ ବିକାଶମୂଳକ ପ୍ରକଳ୍ପ ତ୍ୱରାନ୍ବିତ...

ଏଇ ଭାରତରେ

କର୍ପୋରେଟ ବିଶ୍ୱରେ ୧୬ ବର୍ଷ କଟାଇବା ପରେ ୨୦୧୬ରେ ଚାକିରି ଛାଡି କୃଷିକୁ ଆଦରି ନେଇଛନ୍ତି ମହାରାଷ୍ଟ୍ରର ଅନିଶ ଶାହା। ବର୍ଷକୁ ପାଖାପାଖି ୬୦ ଲକ୍ଷ...

Advertisement
Archives

Model This Week