ପୁରୁଷୋତ୍ତମପୁର,୧୦।୧ (ସବିତା ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ଏବିଡିଓ ନିରାକାର ଯେନାଙ୍କ ବିରୋଧରେ ଦୀର୍ଘ ଦିନଧରି ଲାଗିରହିଥିବା ଜନ ଅସନ୍ତୋଷ ଓ ଅଭିଯୋଗ ପରେ ଶେଷରେ ଜିଲାପାଳ ତାଙ୍କୁ ବଦଳି କରିଛନ୍ତି। ତାଙ୍କ ସ୍ଥାନରେ ନୂତନ ଏବିଡିଓ ଭାବରେ ଜୟଶ୍ରୀ ନାୟକଙ୍କୁ ନିଯୁକ୍ତି ଦେଇଛନ୍ତି। ସେ ପୂର୍ବରୁ ଛତ୍ରପୁର ଏବିଡିଓ ଭାବରେ କାର୍ଯ୍ୟକରୁଥିଲେ। ଏବିଡିଓ ନିରାକାର ଯେନାଙ୍କ ବିରୋଧରେ ବିବାହ ପଞ୍ଜୀକରଣଲାଗି ଲାଞ୍ଚ ମାଗିବା ଅଭିଯୋଗରେ ଦୀର୍ଘ ଦିନହେଲା ଜନ ଅସନ୍ତୋଷ ଲାଗିରହିଥିଲା। ପୂର୍ବରୁ ମହିଳାମାନଙ୍କ ସହ ଜନସାଧାରଣ ଆନ୍ଦୋଳନକୁ ଓହ୍ଲାଇ ତାଙ୍କ କୁଶପୁତ୍ତଳିକା ଦାହକରିଥିବା ବେଳେ ଗତ ୫ ତାରିଖରେ ପୁରୁଷୋତ୍ତମପୁର ଓକିଲସଂଘ ମଧ୍ୟ ଲାଞ୍ଚମାଗିବା ଓ ଅସଦ୍ବ୍ୟବହାର କରୁଥିବା ଅଭିଯୋଗ ଆଣି ଜିଲାପାଳଙ୍କ ପାଖରେ ଫେରାଦ ହୋଇ ଏବିଡିଓଙ୍କ ବଦଳି ଲାଗି ଦାବି କରିଥିଲେ । ଓକିଲଙ୍କଏହି ଅଭିଯୋଗକୁ ଜିଲାପାଳ ଗୁରୁତରସହ ନେଇଇ ଚିଠିନଂ ୨୨୨/ ୮.୧.୨୦୨୬ରେ ଏବିଡିଓ ଯେନାଙ୍କୁ ଶେରଗଡ ବ୍ଲକକୁ ବଦଳି କରିଛନ୍ତି। ଏହାକୁ ନେଇ ଓକିଲସଂଘ ଓ ଜନସାଧାରଣ ଜିଲାପାଳଙ୍କୁ ଧନ୍ୟବାଦ ଜଣାଇଛନ୍ତି।
