ଜଗତ୍ସିଂହପୁର ଅଫିସ,୨୬।୭: ଭାରତ ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଦ୍ୱାରା ଜାତୀୟ ଗୁଣାବତ୍ତା ଉନ୍ନତି କାର୍ଯ୍ୟକ୍ରମ ଚାଲିଛି। ଏନେଇ ନ୍ୟାସନାଲ କ୍ବାଲିଟି ଆସୁରାନ୍ସ ଷ୍ଟାଣ୍ଡାର୍ଡସ୍ ପାଇଁ ଜାତୀୟ ସ୍ବାସ୍ଥ୍ୟ ମିଶନ (ଏନ୍ଏଚ୍ଏମ୍) ପ୍ରସବ ଯନ୍ତ୍ରଣା ସମୟରେ ଉନ୍ନତ ସୁବିଧା, ସୁଯୋଗ ଓ ଯତ୍ନ ଯୋଗାଇଦେଉଥିବା ସ୍ବାସ୍ଥ୍ୟକେନ୍ଦ୍ରଗୁଡ଼ିକୁ ‘ଲକ୍ଷ୍ୟ’ ସାର୍ଟିଫିକେଟ୍ ପ୍ରଦାନ କରାଯାଉଛି। ଏଥିପାଇଁ ମୁଖ୍ୟତଃ ପ୍ରସବ ସମୟରେ ଜଟିଳତା ହ୍ରାସ, ଲେବର ରୁମ୍ ଏବଂ ଓଟି (ଅପରେଶନ୍)ରେ ଥିବା ବ୍ୟବସ୍ଥାକୁ ଗୁରୁତ୍ୱ ଦିଆଯାଉଛି। ଏହି ସାଟିର୍ଫିକେଟ୍ ଦୌଡରେ ଜଗତ୍ସିଂହପୁର ଜିଲା ମୁଖ୍ୟ ଚିକିତ୍ସାଳୟ ରହିଛି। ଏହି ଚିକିତ୍ସାଳୟ ସାଟିର୍ଫିକେଟ୍ ପାଇଁ ଯୋଗ୍ୟ କି ନୁହେଁ, ସେନେଇ ଜାତୀୟସ୍ତରରୁ ଡାକ୍ତର ମୃଣାଳିନୀ ମାନି ଏବଂ ଡା. ଜେ. ଏଲ୍. ମିନା ଭର୍ଚୁଆଲ ମାଧ୍ୟମରେ ଅନ୍ତିମ ମୂଲ୍ୟାୟନ କରିଛନ୍ତି। ମୂଲ୍ୟାୟନ ପୂର୍ବରୁ ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ ଡା. ବିଜୟା ପଣ୍ଡା ଉଭୟଙ୍କୁ ସ୍ବାଗତ କରିବା ସହ ‘ଲକ୍ଷ୍ୟ’ କାର୍ଯ୍ୟକ୍ରମ ପାଇଁ ସମସ୍ତ ପ୍ରସ୍ତୁତି ଭଲ ଭାବେ ହୋଇଛି ବୋଲି କହିଥିଲେ। ପରେ ଏଡିଏମ୍ଓ (ମେଡିକାଲ) ଡା. ଅଜୟ କୁମାର ସ୍ବାଇଁ ଗତବର୍ଷ ଏବଂ ଚଳିତବର୍ଷର ତଥ୍ୟ ଉପସ୍ଥାପନ କରିଥିଲେ। ବିଶେଷକରି ଜିଲାର ମାତୃ ମୃତ୍ୟୁ ହାର, ଶିଶୁ ମୃତ୍ୟୁ ହାର ଏବଂ ସଂକ୍ରମଣ ହାର ରାଜ୍ୟ ତୁଳନାରେ କମ୍ ଥିବା କହିଥିଲେ। ଏହାପରେ ଭର୍ଚୁଆଲ ମାଧ୍ୟମରେ ଜିଲା ମୁଖ୍ୟ ଚିକିତ୍ସାଳୟର ପ୍ରବେଶ ଦ୍ୱାରରୁ ଚିକିତ୍ସାଳୟ ପରିସର, କାଜୁଆଲଟି ଏବଂ ସମସ୍ତ ଅଞ୍ଚଳ ଦେଖାଇ ଦିଆଯାଇଥିଲା। ତା’ପରେ ଓଟି ରୁମ୍ ଏବଂ ଲେବର ରୁମ୍ରେ ଥିବା ବ୍ୟବସ୍ଥା ସମ୍ପର୍କରେ ସୂଚନା ଦିଆଯାଇଥିଲା। ଏହି ଅବସରରେ ଷ୍ଟାଫ ନର୍ସ, ସ୍ତ୍ରୀ ଓ ପ୍ରସୂତି ବିଭାଗର ଡାକ୍ତର, ଝାଡୁଦାର, ଆଟେଣ୍ଡାଣ୍ଟ ଏବଂ ସୁରକ୍ଷା କର୍ମୀଙ୍କଠାରୁ ଉଭୟ ମୂଲ୍ୟାୟନକାରୀ ସ୍ବାସ୍ଥ୍ୟକେନ୍ଦ୍ର ସମ୍ପର୍କିତ ବିଭିନ୍ନ ବିଷୟରେ ବୁଝିଥିଲେ। ସମସ୍ତ କାଗଜପତ୍ର ଓ ପ୍ରାକ୍ଟିକାଲ (ଚଟାଣ ସଫା ଓ ହାତ ଧୁଆ), ସିଜରିଆନ୍ ସେକ୍ସନର ସମସ୍ତ ଯନ୍ତ୍ରପାତି, ଲେବର ଟେବୁଲ, ଓଟି ଟ୍ରଲି, ଔଷଧ ଓ ନୀତିନିୟମ ବିଷୟରେ ପୁଙ୍ଖାନୁପୁଙ୍ଖ ଆଲୋଚନା କରିଥିଲେ। ଏହି ସମୟରେ ରାଜ୍ୟ ସରକାରଙ୍କ ତରଫରୁ ମଧ୍ୟ ମୂଲ୍ୟାୟନକାରୀମାନେ ଉପସ୍ଥିତ ଥିଲେ। କାର୍ଯ୍ୟକ୍ରମରେ ଓଟି ଦାୟିତ୍ୱରେ ଥିବା ଡା. ହିମାଂଶୁ କର, ନିଶ୍ଚେତକ ଡାକ୍ତର ପ୍ରଜ୍ଞା ନନ୍ଦ, ଡା. ସ୍ବର୍ଣ୍ଣଲତା ଦେବୀ, ଡା. ଦୀପ୍ତିରଞ୍ଜନ ଭୂୟଁା ପ୍ରମୁଖ ଉପସ୍ଥିତ ଥିଲେ। ଲେବର ରୁମ୍ରେ ଡା. ରବୀନ୍ଦ୍ରନାଥ ପାଲ, ଡା. ପ୍ରମୋଦ କୁମାର ନାୟକ, ଷ୍ଟାଫ ନର୍ସ ଇନଚାର୍ଜ ଖୁଲଣା ବାରିକ ଓ ସୁଧାଂଶୁ ମାଳିନୀ ଦାଶ ପ୍ରମୁଖ ଅଂଶଗ୍ରହଣ କରି ସମସ୍ତ ତଥ୍ୟ ପ୍ରଦାନ କରିଥିଲେ। ଏମାନଙ୍କ ବ୍ୟତୀତ ଡା. ବସନ୍ତ କୁମାର ବାରିକ, ଡିପିଏମ୍ ଚକ୍ରଧର ଜେନା ପ୍ରମୁଖ ଟେକ୍ନିକାଲ ସପୋର୍ଟ ଦେଇଥିଲେ। ଅନ୍ୟମାନଙ୍କ ମଧ୍ୟରେ ଡେପୁଟି ମ୍ୟାନେଜର ସୁକାନ୍ତ କୁମାର ପ୍ରଧାନ, ଆସିଷ୍ଟାଣ୍ଟ ମ୍ୟାନେଜର ସୁଜାତା ପ୍ରିୟମ୍ବଦା ଦାସ ଓ ଏଡିଏମ୍ଓ ପ୍ରମୋଦ କୁମାର ବାରିକଙ୍କ ସମେତ ଲେବର ରୁମ୍ ଏବଂ ଓଟିର ୪ର୍ଥ ଶ୍ରେଣୀ କର୍ମଚାରୀ ସହଯୋଗ କରିଥିଲେ।
