କେନ୍ଦ୍ରାପଡ଼ା ଅଫିସ, ୨୮।୩: ଆସନ୍ତା ସାଧାରଣ ନିର୍ବାଚନକୁ ଆଉ ଦୁଇବର୍ଷ ବାକି ଅଛି। ଏହା ପୂର୍ବରୁ ରାଜ୍ୟରେ ଲୋକଙ୍କ ମତିଗତିକୁ ପଞ୍ଚାୟତ ଓ ପୌର ନିର୍ବାଚନରେ ପରଖା ଯାଇଛି। ଏହି ଦୁଇ ନିର୍ବାଚନରେ ଯଦିଓ ବିଜେଡି ଏକପାଖିଆ ନେତୃତ୍ୱ ନେବା ସୁଯୋଗ ପାଇଛି, ତେବେ ଦଳୀୟ ବିଦ୍ରୋହ ସମସ୍ୟା ସୃଷ୍ଟି କରିଛି। ପଞ୍ଚାୟତଠାରୁ ପୌରାଞ୍ଚଳର ବିଦ୍ରୋହୀ ପ୍ରାର୍ଥୀ ସ୍ଥାନୀୟ ଅଞ୍ଚଳର ବିକାଶ ଓ ଦଳୀୟ ନେତୃତ୍ୱଙ୍କ ମନମୁଖି କାର୍ଯ୍ୟକୁ ପଦାରେ ପକାଇଛନ୍ତି। ସଦ୍ୟ ଅନୁଷ୍ଠିତ କେନ୍ଦ୍ରାପଡ଼ା ପୌର ନିର୍ବାଚନରେ ଏହାର ପ୍ରଭାବ ବିଶେଷ ଭାବେ ଦେଖିବାକୁ ମିଳିଛି। ଭୋଟ ପରେ ଅସନ୍ତୋଷର କାରଣ ଓ ଅସନ୍ତୁଷ୍ଟଙ୍କ ତାଲିକା ଆରମ୍ଭ ହୋଇଥିବା ରାଜନୈତିକ ବିଶ୍ଳେଷକ ମତ ଦେଇଛନ୍ତି।
ରାଜନୈତିକ ବିଶ୍ଳେଷକ ବାନାମ୍ବର ସାହୁ, ବିଧୁଭୂଷଣ ମହାପାତ୍ର, ଅମରବର ବିଶ୍ୱାଳ, ଗଣେଶ ଚନ୍ଦ୍ର ସାମଲ ପ୍ରମୁଖ କହିଛନ୍ତି, ରାଜ୍ୟର ୩ ପ୍ରମୁଖ ରାଜନୈତିକ ଦଳ ପାଇଁ ଏହି ଦୁଇ ନିର୍ବାଚନ ଫଳର ସମୀକ୍ଷା ଲାଗି ସୁଯୋଗ ଦେଇଛି। ଗମନାଗମନ, ସ୍ବାସ୍ଥ୍ୟ, ପାନୀୟ ଜଳ, କ୍ଷେତକୁ ଜଳ ପରିଚାଳନା ପରି ମୌଳିକ ସମସ୍ୟାରେ କେନ୍ଦ୍ରାପଡ଼ା ଜିଲା ଅଛି। ଶିଳ୍ପବିହୀନ ଏହି ଜିଲାର ଦାଦନ ସମସ୍ୟା ଉତ୍କଟ ହେବାରେ ଲାଗିଛି। କର୍ମ ନିଯୁକ୍ତି ସମସ୍ୟାକୁ କରୋନା ସଂକ୍ରମଣ ବଢ଼ାଇ ଦେଇଛି। ପ୍ରବାସୀ ଘରକୁ ଫେରିଥିଲେ ମଧ୍ୟ ଅର୍ଥନୀତି ସୁଦୃଢ଼ ନ ଥିବା, ସ୍ଥାନୀୟ ସମସ୍ୟାର ସମାଧାନ ହେଉ ନ ଥିବା ଓ ଦଳୀୟ ନେତାଙ୍କ ମନମୁଖି କାର୍ଯ୍ୟକୁ ନେଇ ଜିଲାବାସୀ ଭୋଟ ମାଧ୍ୟମରେ ଜବାବ ଦେଇଛନ୍ତି। ରାଜକନିକା ବ୍ଲକ ବରୁଣାଡିହା ପାଣି ପ୍ରକଳ୍ପ ଶାସକ ଦଳ ପାଇଁ ଭାରି ପଡିଛି। ଏଠାରେ ଥିବା ପଞ୍ଚାୟତଗୁଡିକରେ ଖରସ୍ରୋତା ନଦୀ ବଞ୍ଚାଅ ସଂଗ୍ରାମ ସମିତିର ବହୁ କର୍ମକର୍ତ୍ତା ଲୋକ ପ୍ରତିନିଧି ଭାବେ ନିର୍ବାଚିତ ହୋଇଛନ୍ତି। ପଟ୍ଟାମୁଣ୍ଡାଇ ବ୍ଲକ ଅଧ୍ୟକ୍ଷ ପଦବୀକୁ ନେଇ ଶାସକ ଦଳର ଦୁଇ ଗୋଷ୍ଠୀଙ୍କ ମଧ୍ୟରେ ରାଜନୈତିକ ହିଂସା ଘଟିଛି। ଗରଦପୁର ବ୍ଲକରେ ମଧ୍ୟ ଅଧ୍ୟକ୍ଷ ନିର୍ବାଚନରେ ଶାସକ ଦଳର ଦୁଇ ଗୋଷ୍ଠୀ ମୁହଁାମୁହିଁ ହୋଇଛନ୍ତି। ଡେରାବିଶ ବ୍ଲକ ଅଧ୍ୟକ୍ଷ ପଦ ପାଇଁ ସ୍ଥାନୀୟ ବିଧାୟକ ଓ ପୂର୍ବତନ ବ୍ଲକ ଅଧ୍ୟକ୍ଷଙ୍କ ମଧ୍ୟରେ ହୋଇଥିବା ଦ୍ୱନ୍ଦ୍ୱ ଧର୍ମଗୁଳାରେ ସମାପ୍ତ ହୋଇଛି। ଏହାବ୍ୟତୀତ ସଦ୍ୟତମ ଉଦାହରଣ ଭାବେ କେନ୍ଦ୍ରାପଡ଼ା ପୌର ନିର୍ବାଚନକୁ ନିଆଯାଇପାରେ। ରାଜ୍ୟର ସର୍ବପୁରାତନ ଏହି ପୌରାଞ୍ଚଳର ଆଶାନୁରୂପକ ବିକାଶ ହୋଇନାହିଁ। ଗତ ୨୦୦୯ରୁ ଅଦ୍ୟାବଧି ନିର୍ବାଚନରେ ଜିଲାର ବିଭିନ୍ନ ସ୍ଥାନରେ ଶିଳ୍ପ ପ୍ରତିଷ୍ଠା ଭେଳିକି ପରି ପୌରାଞ୍ଚଳରେ ଟ୍ରାଫିକ, ଜଳ ପରିମଳ, ୱାଟର ଟ୍ରିଟ୍ମେଣ୍ଟ ପ୍ଲାଣ୍ଟ, ଭେଣ୍ଡିଂ ଜୋନ୍, ଉନ୍ନତ ଖେଳପଡିଆ, ପାର୍କ, ଜଳ ନିଷ୍କାସନ ପ୍ରକଳ୍ପ ଆଦି ପ୍ରତିଶ୍ରୁତି ମିଳିଛି। ତେବେ ଏହି ପ୍ରତିଶ୍ରୁତି ସହରବାସୀଙ୍କୁ ଆକୃଷ୍ଟ କରିନାହିଁ। ଏଠାରେ ୨୧ଟି ୱାର୍ଡରୁ ଶାସକ ଦଳ ୧୧ଟି ପାଇଥିବା ବେଳେ ୪ ବିଦ୍ରୋହୀ ପ୍ରାର୍ଥୀ ବିଜୟୀ ହୋଇଛନ୍ତି। ଏଥିସହ ୫ଟିରେ କଂଗ୍ରେସ ଓ ଗୋଟିଏରେ ଭାଜପା ପ୍ରାର୍ଥୀ ଜିତିଛନ୍ତି। ସ୍ଥାନୀୟ ଦଳୀୟ ନେତାଙ୍କ ମନମୁଖି କାର୍ଯ୍ୟ ବିଦ୍ରୋହର କାରଣ ବୋଲି ଆଲୋଚନା ହେଉଛି। ସେହିପରି ଜିଲାର ସମସ୍ୟା ସମ୍ପର୍କରେ ଅବଗତ ନ ଥିବା ଲୋକଙ୍କୁ ଏମ୍ପି ଓ ବିଧାୟକ ଟିକେଟ ଦିଆଯାଉଥିବା ଯୋଗୁ ସମସ୍ୟା ନେଇ ଉପଯୁକ୍ତ ସ୍ଥାନରେ ପ୍ରତିନିଧିତ୍ୱ ହେଉ ନ ଥିବା ରାଜନୈତିକ ବିଶ୍ଳେଷକମାନେ ମତ ଦେଇଛନ୍ତି। ଦଳୀୟ ଭୋଟ ହାର ସମ୍ପର୍କରେ ସେମାନେ ପ୍ରକାଶ କରିଛନ୍ତି, ତୁଳନାତ୍ମକ ଭାବେ ଭାଜପାର ଭୋଟ ହାର ବଢ଼ିନାହିଁ। ତେବେ କଂଗ୍ରେସର ପ୍ରାୟ ୫ ପ୍ରତିଶତ ଭୋଟ ଶାସକ ବିଜେଡିକୁ ଯାଇଛି। ଆସନ୍ତା ୨୦୨୪ ସାଧାରଣ ନିର୍ବାଚନକୁ ଦୃଷ୍ଟିରେ ରଖାଯାଇ ସମସ୍ତ ଦଳର ଅସନ୍ତୁଷ୍ଟଙ୍କ ତାଲିକା ପ୍ରସ୍ତୁତ ହେଉଛି। ଏମାନଙ୍କ ମଧ୍ୟରେ କିଏ କେତେ ଉପଯୋଗୀ ବୋଲି ବିଚାରବିମର୍ଶ ଚାଲିଥିବା ବିଶ୍ଳେଷକମାନେ ପ୍ରକାଶ କରିଛନ୍ତି।
