ଢେଙ୍କାନାଳ ଅଫିସ, ୩୧।୧୨ ସ୍ବାସ୍ଥ୍ୟ ଭିତ୍ତିଭୂମି ଏବଂ ସ୍ମାର୍ଟ ହେଲ୍ଥ କାର୍ଡ କାର୍ଯ୍ୟକାରିତା ପରଖିବାକୁ ଗୁରୁବାର ଢେଙ୍କାନାଳ ଜିଲାପାଳ ସରୋଜ କୁମାର ସେଠୀ ଅଚାନକ ଜିଲା ମୁଖ୍ୟ ଚିକିତ୍ସାଳୟ ଏବଂ କଳିଙ୍ଗ ଚକ୍ଷୁ ଚିକିତ୍ସାଳୟ ପରିଦର୍ଶନ କରିଛନ୍ତି। ଜିଲା ସ୍ବାସ୍ଥ୍ୟକେନ୍ଦ୍ରରେ ଅବ୍ୟବସ୍ଥିତ ପାର୍କିଂ, ଡ୍ରେନେଜ୍ ବ୍ୟବସ୍ଥା ଦେଖି ସେ ଅସନ୍ତୋଷ ବ୍ୟକ୍ତ କରିବା ସହିତ ଏହି ସମସ୍ୟାର ସମାଧାନ କରିବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି।
ଜିଲା ଚିକିତ୍ସାଳୟ ସଂଲଗ୍ନ ରାସ୍ତାରେ ଇତସ୍ତତଃ ଭାବେ ଯାନବାହନ ପାର୍କିଂ କରାଯାଉଛି। ଏଥିରେ ରୋଗୀ ଏବଂ ସେମାନଙ୍କ ସମ୍ପର୍କୀୟ ସମସ୍ୟା ଭୋଗୁଛନ୍ତି। ଏହାର ପ୍ରତିକାର କରିବା ସହିତ ସ୍ବତନ୍ତ୍ର ଭାବେ ପାର୍କିଂ ବ୍ୟବସ୍ଥା କରିବାକୁ ଜିଲାପାଳ ସିଡିଏମ୍ଓ ଡା. ଅଶୋକ କୁମାର ଦାସଙ୍କୁ ନିର୍ଦ୍ଦେଶ ଦେଇଛନ୍ତି। ଏହାର କାର୍ଯ୍ୟକାରିତା ଯାଞ୍ଚ କରିବାକୁ ପୋଲିସ ଅଧିକାରୀଙ୍କୁ ପରାମର୍ଶ ଦିଆଯାଇଛି। ସେହିପରି ସ୍ବାସ୍ଥ୍ୟକେନ୍ଦ୍ର ପରିସରରେ ଥିବା ଡ୍ରେନେଜ୍ ବ୍ୟବସ୍ଥିତ କରିବାକୁ ଜିଲାପାଳ ଗୁରୁତ୍ୱାରୋପ କରିଛନ୍ତି। ଏହି ଅବସରରେ ସେ ବହିର୍ବିଭାଗରେ ଜରୁରିକାଳୀନ ସେବା, ରେଡ୍କ୍ରସ୍ ଜେନେରିକ ଔଷଧ ଦୋକାନ, ଜରୁରୀ ରୋଗୀ ସ୍ଥିରୀକରଣ କକ୍ଷ, ମ୍ୟାଲେରିଆ ପରୀକ୍ଷାଗାର, କଣ୍ଟ୍ରୋଲରୁମ୍ ବୁଲି ଦେଖିଥିଲେ।
ମେଡିକାଲ ସୁପରିଟେଣ୍ଡେଣ୍ଟ ଜୟକୃଷ୍ଣ ନାୟକ, ଏଡିଏମ୍ଓ ଡା. ଜ୍ୟୋତିଷ ଚନ୍ଦ୍ର ମହାପାତ୍ର, ସ୍ବାସ୍ଥ୍ୟ ମିଶନ ପରିଚାଳିକା ସୋନାଲି ପ୍ରିୟଦର୍ଶିନୀ ପ୍ରମୁଖ ବିଭିନ୍ନ ବିଭାଗର କାର୍ଯ୍ୟକାରିତା ସମ୍ପର୍କରେ ଅବଗତ କରାଇଥିଲେ। ଏହାପରେ ଜିଲାପାଳ ଦକ୍ଷିଣକାଳୀ ରୋଡ୍ସ୍ଥିତ କଳିଙ୍ଗ ଚକ୍ଷୁ ଚିକିତ୍ସାଳୟ ପରିଦର୍ଶନ କରି ସ୍ମାର୍ଟ ହେଲଥ୍ କାର୍ଡଧାରୀମାନେ କିଭଳି ସେବା ପାଉଛନ୍ତି, ସେ ସମ୍ପର୍କରେ ପରିଚାଳକ ସୁନୀଲ ମିଶ୍ରଙ୍କ ସହିତ ଆଲୋଚନା କରିଥିଲେ।
