ଆସିକା, ୮।୪ (ଡି.ଏନ୍.ଏ.):ଆସିକା ସମବାୟ ଚିନିଶିଳ୍ପରେ ଲାଗିରହିଥିବା ଅବ୍ୟବସ୍ଥାର ପ୍ରତିକାର ହୋଇପାରୁନଥିବାରୁ ଚିନିଶିଳ୍ପ ପରିଚାଳନା ପରିଷଦର କେତେକ ସଦସ୍ୟ ଅସନ୍ତୋଷ ପ୍ରକାଶ କରିଛନ୍ତି ା ଗୁରୁବାର ପରିଚାଳନା ପରିଷଦର ୭ଜଣ ସଦସ୍ୟ ଭୁବନେଶ୍ୱରଠାରେ ସମବାୟ ବିଭାଗର ରେଜିଷ୍ଟ୍ରାର ଡ. ଉଦୟ ମାଝୀଙ୍କୁ ସାକ୍ଷାତ କରି ଆଲୋଚନା କରିଛନ୍ତି। ଏହି ପ୍ରତିନିଧି ଦଳ ରାଜ୍ୟ ଶ୍ରମମନ୍ତ୍ରୀ ଶ୍ରୀକାନ୍ତ ସାହୁ, ମୁଖ୍ୟମନ୍ତ୍ରୀଙ୍କ ଯୁଗ୍ମ ଶାସନ ସଚିବ ଶୁଭ୍ରାଶୁଂ ମିଶ୍ର ଏବଂ ମୁଖ୍ୟମନ୍ତ୍ରୀଙ୍କ ଯୁଗ୍ମ ପରାମର୍ଶଦାତାଙ୍କୁ ସାକ୍ଷାତ କରି ଚିନିଶିଳ୍ପରେ ଲାଗି ରହିଥିବା ସମସ୍ୟାର ସମାଧାନ ଦିଗରେ ଦୃଷ୍ଟି ଦେବା ଲାଗି ନିବେଦନ କରିଥିବା ନିର୍ଦ୍ଦେଶକ ପୂର୍ଣ୍ଣଚନ୍ଦ୍ର ବରାଡ ସୂଚନା ଦେଇଛନ୍ତି। ବରାଡଙ୍କ ସମେତ ପରିଚାଳନା ପରିଷଦର ସଦସ୍ୟ ବସନ୍ତ ଦଳାଇ, ଉଦୟନାଥ ପ୍ରଧାନ, ସନ୍ତୋଷ ପ୍ରଧାନ, ରତ୍ନାକର ସାହୁ, ନିରଞ୍ଜନ ପ୍ରଧାନ, ଧରମୁ ପ୍ରଧାନ ଓ ଶତୃଘନ ଭୂୟାଁଙ୍କ ଏହି ପ୍ରତିନିଧି ଦଳ ଅଧିକାରୀ ଓ ମନ୍ତ୍ରୀଙ୍କୁ ଚିନିଶିଳ୍ପରେ ଦୀର୍ଘଦିନ ଧରି ଖାଲିପଡିଥିବା ପରିଚାଳନା ନିର୍ଦ୍ଦେଶକ, ପର୍ଶନାଲ ମ୍ୟାନେଜର, ସେଫ୍ଟି ଅଫିସର, ଆଖୁ ପରିଚାଳକ ଭଳି ମୁଖ୍ୟ ପଦବୀରେ ନିଯୁକ୍ତି, ଚିନିଶିଳ୍ପର ବିଭିନ୍ନ ଉନ୍ନୟନ କାର୍ଯ୍ୟକୁ ନିୟମାନୁଯାୟୀ ପରିଚାଳନା ପରିଷଦର ବୈଠକରେ ଆଲୋଚନା କରି ନିଷ୍ପତ୍ତି, ଚିନିଶିଳ୍ପ ମଦ ପ୍ରସ୍ତୁତି କାରଖାନାରୁ ବାହାରୁଥିବା ଆସିକା ୪୦ ପ୍ୟାକିଂ ବଦଳାଇ ପଲି ପ୍ରପୋଲିନ ମାଧ୍ୟମରେ ପ୍ୟାକିଂ କରି ପରିବେଶ ସୁରକ୍ଷା ସହ ଖର୍ଚ୍ଚ କମାଇବା ଆଦି ବିଭିନ୍ନ ବିଷୟ ଉପରେ ଆଲୋଚନା କରି ଏକ ସ୍ମାରକପତ୍ର ପ୍ରଦାନ କରିଛନ୍ତି।
ସୂଚନା ଯୋଗ୍ୟ ଗତ ଡିସେମ୍ବର ୧୩ ତାରିଖରେ ଚିନିଶିଳ୍ପ ପରିଚାଳନା ପରିଷଦର ପ୍ରଥମ ବୈଠକ ବସିଥିଲା। ତା ପରବର୍ତ୍ତି ଅବସ୍ଥାରେ ଆଉ ବୈଠକ ବସିପାରିନାହିଁ। ଏଥିରେ ଅସନ୍ତୋଷ ବ୍ୟକ୍ତ କରି ଗତ ମାର୍ଚ୍ଚ ୨୩ରେ ପରିଚାଳନା ପରିଷଦର ଉପସଭାପତି ସ୍ନେହଲତା ଚଣ୍ଡଙ୍କ ଅଧ୍ୟକ୍ଷତାରେ ୯ଜଣ ଡାଇରେକ୍ଟରଙ୍କ ଏକ ବୈଠକ ବସିଥିଲା। ଏହି ବୈଠକରେ ପରିଚାଳନା ପରିଷଦର ସଭାପତିଙ୍କୁ ତୁରନ୍ତ ବୈଠକ ଡକାଇ ସମସ୍ୟା ବିଷୟରେ ଆଲୋଚନା କରିବା ସହ ବ୍ୟବସାୟିକ ନୀତି ନିର୍ଦ୍ଧାରଣ ସମ୍ପର୍କରେ ନିଷ୍ପତ୍ତି ନେବା ଲାଗି ଏକ ସ୍ମାରକପତ୍ର ଦିଆଯାଇଥିଲା ା ତଥାପି ସମସ୍ୟାର କୌଣସି ସମାଧାନ ନହେବାରୁ ନିର୍ବାଚିତ ନିର୍ଦ୍ଦେଶକମାନେ ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିବା ଲାଗି ବାଧ୍ୟ ହେଲେ ବୋଲି ବରାଡ଼ ପ୍ରକାଶ କରିଛନ୍ତି ା
