ମୋରଡ଼ା,୧୬ା୮(ସ୍ମାରକ ମାଜୀ): ମୟୂରଭଞ୍ଜ ଜିଲା ମୋରଡ଼ା ବ୍ଲକ ଅଧୀନ ଧଡ଼ାସାହି ପଞ୍ଚାୟତରେ ଜାତୀୟ ପତାକାକୁ ଅସମ୍ମାନ ହୋଇଥିବାର ଦେଖିବାକୁ ମିଳିଛି।
ସୂଚନାନୁଯାୟୀ, ମଙ୍ଗଳବାର ୭୭ତମ ସ୍ବାଧୀନତା ଦିବସ ପାଳନ ଅବସରରେ ଏହି ପଞ୍ଚାୟତରେ ଥିବା ମିଶନ ଶକ୍ତି ଗୃହ ସମ୍ମୁଖରେ ମିଶନ ଶକ୍ତି ମହିଳାମାନେ ଜାତୀୟ ପତାକା ଉତ୍ତୋଳନ କରିଥିଲେ। ଉତ୍ତୋଳନ ସମୟରେ ଧଡ଼ାସାହି ପଞ୍ଚାୟତର ଏମ୍ବିକେ ନମିତା ପାଟବନ୍ଧା, ସିଆରପି ଜାନକୀ ପାଟବନ୍ଧାଙ୍କ ନେତୃତ୍ୱରେ ୫୦ରୁ ଊର୍ଦ୍ଧ୍ୱ ମହିଳା ଉପସ୍ଥିତ ଥିଲେ।
କିନ୍ତୁ ଦୁର୍ଭାଗ୍ୟର ବିଷୟ ଉତ୍ତୋଳନ ହୋଇଥିବା ଉକ୍ତ ଜାତୀୟ ପତାକାକୁ ସନ୍ଧ୍ୟା ପୂର୍ବରୁ ଅବତରଣ କରାଯାଇ ନ ଥିଲା କି ଆଜି ମଧ୍ୟ ପୂର୍ବାହ୍ନ ପର୍ଯ୍ୟନ୍ତ ପତାକା ଅବତରଣ କରାଯାଇ ନ ଥିଲା। ଏନେଇ ସରପଞ୍ଚ ତିଲକା ହାଁସଦା ଦୁଃଖ ପ୍ରକାଶ କରିବା ସହିତ ଏଥିପାଇଁ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି କରିଛନ୍ତି।
