ଅନୁଗୋଳ ଅଫିସ୍, ୨୪ା୭
ଅନୁଗୋଳ ଜିଲା ସାତକୋଶିଆ ଅଭୟାରଣ୍ୟରେ ବନ୍ୟପ୍ରାଣୀଙ୍କ ସୁରକ୍ଷା ପାଇଁ ବନ ବିଭାଗ ଯୋଜନା ପରେ ଯୋଜନା କରୁଛି। ମହାବଳ ବାଘ ‘ମହାବୀର’ର ମୃତ୍ୟୁ ପରେ ବ୍ୟାଘ୍ର ପ୍ରକଳ୍ପ ସ୍ଥଗିତ ରହିଥିଲେ ମଧ୍ୟ ଭବିଷ୍ୟତକୁ ଦୃଷ୍ଟିରେ ରଖି ଅଭୟାରଣ୍ୟ ମଧ୍ୟରେ ଥିବା କେତେକ ଗଁାକୁ ବିସ୍ଥାପନ କରିବାକୁ ବିଭାଗ ଉଦ୍ୟମ ଜାରି ରଖିଛି। ମଧ୍ୟପ୍ରଦେଶରୁ ବାଘ ଆଣିବା ପୂର୍ବରୁ ଅର୍ଥାତ୍ ଡିସେମ୍ବର ୨୦୧୭ରେ ରାଇଗୁଡ଼ା ଗ୍ରାମବାସୀଙ୍କୁ ବିସ୍ଥାପିତ କରାଯାଇସାରିଛି। ଆଗାମୀ ଦିନରେ ସାତକୋଶିଆ ବନ୍ୟପ୍ରାଣୀ ବନଖଣ୍ଡର ଆଉ ୩ଟି ଗଁାକୁ ହଟାଯିବା ଯୋଜନା ରହିଛି। ଏହା ସଫଳ ହେଲେ ଉକ୍ତ ୩ ଗ୍ରାମବାସୀ ରହୁଥିବା ୫୦ ଏକର ଜାଗା ଖାଲି ହୋଇଯିବ। ଫଳରେ ଜୀବଜନ୍ତୁଙ୍କ ଅବାଧ ବିଚରଣରେ ଏହା ସହାୟକ ହେବ ବୋଲି ବନଖଣ୍ଡ ପକ୍ଷରୁ କୁହାଯାଇଛି।
ସୂଚନା ଅନୁଯାୟୀ, ସାତକୋଶିଆ ବନଖଣ୍ଡରେ ପୁରୁଣାକୋଟ, ପମ୍ପାସର, ଟିକରପଡ଼ା, ରାଇଗୁଡ଼ା ଓ ଜିଲିଣ୍ଡା ରେଞ୍ଜ ରହିଛି। ତେବେ ପୁରୁଣାକୋଟ, ଜିଲିଣ୍ଡା ଓ ପମ୍ପାସର ରେଞ୍ଜ ଅଧୀନରେ ଥିବା ୩ଟି ଗ୍ରାମକୁ ହଟାଇ ଅନ୍ୟତ୍ର ଥଇଥାନ କରାଯିବାର ଯୋଜନା କରାଯାଇଛି। ଏ ନେଇ ୨୦୧୯ରେ ଉକ୍ତ ୩ ଗ୍ରାମବାସୀଙ୍କ ସହ ବନଖଣ୍ଡର ଅଧିକାରୀମାନେ ଆଲୋଚନା କରିଥିଲେ। ଚଳିତବର୍ଷ ମଧ୍ୟ ଦୁଇ ଥର କଥାବାର୍ତ୍ତା କରିସାରିଛନ୍ତି। କିନ୍ତୁ ଗ୍ରାମବାସୀ ରାଜି ହେଉ ନ ଥିବାରୁ ସମସ୍ୟା ଉପୁଜୁଛି। ଯଦି ଗ୍ରାମବାସୀ ବିସ୍ଥାପିତ ହେବାକୁ ସମ୍ମତି ପ୍ରଦାନ କରିବେ ତା’ହେଲେ ସେମାନଙ୍କୁ ଭଲ ପ୍ୟାକେଜ ପ୍ରଦାନ କରାଯିବ। ରାଇଗୁଡ଼ା ଗ୍ରାମବାସୀଙ୍କୁ ଯେପରି ନୂଆ ରାଇଗୁଡ଼ାରେ ଜମି, ଘର, ଲକ୍ଷ ଲକ୍ଷ ଟଙ୍କା ଦିଆଯାଇ ଥଇଥାନ କରାଯାଇଛି ଠିକ୍ ସେହିପରି ପଦକ୍ଷେପ ନିଆଯିବ। ସେମାନଙ୍କ ପାଇଁ ପାନୀୟ ଜଳ, ସ୍ବତନ୍ତ୍ର ବିଦ୍ୟୁତ୍ ବ୍ୟବସ୍ଥା କରାଯିବ। ଅନ୍ୟପକ୍ଷରେ ଗ୍ରାମବାସୀ ପୂର୍ବସ୍ଥାନରୁ ହଟିଗଲେ ବନ୍ୟପ୍ରାଣୀଙ୍କ ସୁରକ୍ଷା ପାଇଁ ଅଧିକ ୫୦ ଏକର ଜାଗା ମିଳିପାରିବ ବୋଲି ବନଖଣ୍ଡ ଅଧିକାରୀ ପ୍ରକାଶ କରିଛନ୍ତି।
ବନ୍ୟଜନ୍ତୁଙ୍କ ସୁରକ୍ଷା ପାଇଁ ପଦକ୍ଷେପ
ସାତକୋଶିଆ ଅଭୟାରଣ୍ୟର ବନ୍ୟଜନ୍ତୁଙ୍କ ସୁରକ୍ଷା ପାଇଁ ବିଭାଗ ପକ୍ଷରୁ ଏପରି ଯୋଜନା ଚାଲିଛି। ବନଖଣ୍ଡରୁ ୩ଟି ଗ୍ରାମବାସୀଙ୍କୁ ବିସ୍ଥାପନ କରାଯିବା ନିମନ୍ତେ ସେମାନଙ୍କ ସହ ଆଲୋଚନା କରାଯାଉଛି। ଉକ୍ତ ଗ୍ରାମବାସୀଙ୍କୁ ନୂଆ ରାଇଗୁଡ଼ାବାସୀଙ୍କ ଭଳି ସୁବିଧା ଦିଆଯିବ। ସରକାରଙ୍କ ପକ୍ଷରୁ ପ୍ରତି ପରିବାରକୁ ୧୦ ଲକ୍ଷ ଟଙ୍କାର ସହାୟତା ସହ ଘର ଯୋଗାଇ ଦିଆଯିବ।
-ରାମାସ୍ବାମୀ.ପି, ଡିଏଫ୍ଓ, ସାତକୋଶିଆ ବନଖଣ୍ଡ
ବିଫଳତାରୁ ଶିକ୍ଷା ନେବା ଉଚିତ
ପୂର୍ବରୁ ବିସ୍ଥାପିତ ହୋଇଥିବା ଲୋକଙ୍କୁ ଏଯାଏ ଭଲଭାବେ ଥଇଥାନ କରାଯାଇ ନାହିଁ। ଏବେ ପୁଣି ୩ଟି ଗାଁ ଉଚ୍ଛେଦ ପାଇଁ ଯୋଜନା କରାଯାଉଛି। ଜଙ୍ଗଲ ମଧ୍ୟରେ ଗଁ। ରହିଲେ ବନ୍ୟପ୍ରାଣୀ ସୁରକ୍ଷିତ ରହିପାରିବେ। ବିଫଳ ବ୍ୟାଘ୍ର ପ୍ରକଳ୍ପରୁ ବିଭାଗ ଶିକ୍ଷା ନେବା ଉଚିତ।
-ସ୍ବପ୍ନା ଷଡ଼ଙ୍ଗୀ, ପରିବେଶବିତ
ବିସ୍ଥାପିତ ହେବାକୁ ଚାହୁଁ ନାହୁଁ
ବିସ୍ଥାପିତ ହେବାକୁ ଗ୍ରାମବାସୀ ଚାହୁଁ ନାହାନ୍ତି। ସରକାର ତାଙ୍କ ଯୋଜନା ବନ୍ଦ କରନ୍ତୁ। ଖଣି ଖାଦାନ ପାଇଁ ବିସ୍ଥାପନ ନୀତି ଅଲଗା ଥିବାବେଳେ ଜଙ୍ଗଲ ବିଭାଗ ଏହି ଜଙ୍ଗଲୀ ଲୋକଙ୍କୁ ଭୁଅଁ। ବୁଲାଉଛି। ପୁରୁଣା ଗଁ। ବଦଳରେ କିଛି ଟଙ୍କା ମିଳିବ ସତ ହେଲେ ତାହା ସରିଗଲେ ଭିକାରୀ ହୋଇ ସେମାନେ ଦାଣ୍ଡରେ ବୁଲିବେ।
-ଜନାର୍ଦ୍ଦନ ସାହୁ, ସଭାପତି, ସାତକୋଶିଆ କ୍ଷତିଗ୍ରସ୍ତ ପ୍ରଜା ସୁରକ୍ଷା ସମିତି
