କଟକ,୨୯ା୫(ଶିଳ୍ପା ପ୍ରିୟଦର୍ଶିନୀ):କଟକ ଏସ୍ସିବି ମେଡିକାଲରେ ଅନେକ ଅବ୍ୟବସ୍ଥା ଦେଖିବାକୁ ମିଳିଛି। ମେଡିକାଲର କେତେକ ସ୍ଥାନରେ ଫ୍ୟାନ୍ ବ୍ୟବସ୍ଥା ନ ଥିବାବେଳ ଆଉ କେତେକ ସ୍ଥାନରେ ଲାଗିଥିବା ଏସିରୁ ଗରମ ପବନ ବାହାରୁଛି। ମେଡିକାଲ ପରିସରରେ ଥିବା ଥାଲାସେମିଆ ବିଭାଗ, ନେଫ୍ରାଲୋଜି, କାର୍ଡିଓଲୋଜି ବିଭାଗ, କାଜୁଆଲ୍ଟି ସମେତ ଅନ୍ୟ ବିଭାଗର ଟିକେଟ କାଉଣ୍ଟର ଓ ନିରାମୟ କେନ୍ଦ୍ରଗୁଡ଼ିକରେ ଗରମକୁ ନଜରରେ ରଖି ରୋଗୀ ଓ ସେମାନଙ୍କ ସମ୍ପର୍କୀୟଙ୍କ ପାଇଁ କୌଣସି ବ୍ୟବସ୍ଥା କରାଯାଇ ନ ଥିବା ଅଭିଯୋଗ ହୋଇଛି। ଏବେ ଗ୍ରୀଷ୍ମପ୍ରବାହ ଜାରି ରହିଥିବାବେଳେ ସେମାନେ ମେଡିକାଲ ପରିସରରେ ଅସହ୍ୟ ଗୁଳୁଗୁଳିରେ ଛଟପଟ ହେଉଛନ୍ତି। ଏପରି କି ଗରମରେ ଟିକେଟ ପାଇଁ ଘଣ୍ଟା ଘଣ୍ଟା ଧରି ରୋଗୀ ସମ୍ପର୍କୀୟଙ୍କୁ ଧାଡିରେ ଛିଡା ହେବାକୁ ପଡୁଛି। ଏହାକୁ ନେଇ ସେମାନେ ଅସନ୍ତୋଷ ବ୍ୟକ୍ତ କରିବା ସହ ତୁରନ୍ତ ମେଡିକାଲ କର୍ତ୍ତୃପକ୍ଷ ଦୃଷ୍ଟି ଦେବା ପାଇଁ ଦାବି କରିଛନ୍ତି।
ମିଳିଥିବା ସୂଚନା ଅନୁଯାୟୀ, ରାଜ୍ୟର ବିଭିନ୍ନ ସ୍ଥାନରୁ ରୋଗୀମାନେ ଏସ୍ସିବି ମେଡିକାଲକୁ ଚିକିତ୍ସା ପାଇଁ ଆସିଥାନ୍ତି। ହେଲେ ଏଠାରେ ରୋଗୀଙ୍କୁ ଠିକ୍ ଭାବେ ଚିକିତ୍ସା ସୁବିଧା ମିଳୁ ନ ଥିବାବେଳେ ଅନେକ ବ୍ୟବସ୍ଥା ରହିଛି। ବିଶେଷକରି ବିଭିନ୍ନ ପରୀକ୍ଷା ଓ ଔଷଧ ଆଣିବା ପାଇଁ ଟିକେଟ୍ କରିବାକୁ ଅସହ୍ୟ ଗରମରେ ଦୀର୍ଘ ସମୟ ଧରି ଲମ୍ବାଧାଡିରେ ଛିଡାହେବାକୁ ପଡୁଛି। ବାରିପଦା ବାଲିଡିହା ଅଞ୍ଚଳର ପାର୍ବତୀ ବେହେରା କିଡ୍ନୀ ରୋଗରେ ଆକ୍ରାନ୍ତ ହୋଇ ସୋମବାର ଏସ୍ସିବି ମେଡିକାଲର ନେଫ୍ରୋଲୋଜି ବିଭାଗକୁ ଆସିଥିଲେ। ତାଙ୍କର ପରୀକ୍ଷା ପାଇଁ ନେଫ୍ରୋଲୋଜି ବିଭାଗରୁ ରଞ୍ଜନରଶ୍ମି ବିଭାଗକୁ ଆସିବାକୁ ବ୍ୟାଟେରି ଗାଡି କିମ୍ବା ଷ୍ଟ୍ରେଚରର ଆବଶ୍ୟକତା ଥିଲା। ହେଲେ ତାହା ନ ମିଳିବାରୁ ପାର୍ବତୀଙ୍କୁ ତାଙ୍କ ସ୍ବାମୀ, ପୁଅ ଓ ଜ୍ୱାଇଁ ଟେକିନେଇ ପରୀକ୍ଷା କରାଇଥିଲେ। ଏପରି ଗରମରେ ମଙ୍ଗଳବାର ୩ ଘଣ୍ଟାରୁ ଅଧିକ ସମୟ ଧରି ପାର୍ବତୀ ତଳେ ପଡି ରହିଥିଲେ। ଏନେଇ ପାର୍ବତୀଙ୍କ ସ୍ବାମୀ ପ୍ରେମ୍ଚାନ୍ଦ ବେହେରା କହିଛନ୍ତି, ଏସ୍ସିବିରେ ଷ୍ଟେଚର କିମ୍ବା ବ୍ୟାଟେରି ଗାଡି ଥାଇ ମଧ୍ୟ ଠିକ୍ ସମୟରେ ତାହା ରୋଗୀ ସେବାରେ ଲାଗିପାରୁନାହିଁ। ଏଠାରେ ଦୁଇଦିନ ହେବ ରହିଛୁ। ପାଣି ଟିକିଏ ମିଳୁ ନ ଥିବାବେଳେ ଫ୍ୟାନ୍ ବ୍ୟବସ୍ଥା ନ ଥିବା ସେ କହିଛନ୍ତି।
ସେହିପରି ନିଆଳିରୁ ଏସ୍ସିବି ମେଡିକାଲକୁ ଆସିଥିବା ରୋଗୀ ସମ୍ପର୍କୀୟ ପିଣ୍ଟୁ ବାରିକ କହିଛନ୍ତି, ନିଶୁଳ୍କ ଚିକିତ୍ସା ଓ ଔଷଧ ପାଇଁ ବାପାଙ୍କୁ ନେଇ ଏସ୍ସିବି ଆସିଛି। ନିରାମୟ କେନ୍ଦ୍ରରୁ ଔଷଧ ନେବା ପାଇଁ ଏକ ଘଣ୍ଟାରୁ ଅଧିକ ସମୟ ଧରି ଧାଡିରେ ଛିଡ଼ା ହୋଇଛି। ଏଠାରେ ଫ୍ୟାନ୍ ବ୍ୟବସ୍ଥା ନ ଥିବାବେଳେ ଏସିର ଗରମ ପବନ ମାଡ଼ ହେଉଛି। ସାଲେପୁର ଅଞ୍ଚଳରୁ ଏସ୍ସିବିକୁ ଆସିଥିବା ରୋଗୀ ସମ୍ପର୍କୀୟ ସଞ୍ଜୟ ଦାସ କହିଛନ୍ତି, ଏସ୍ସିବି ମେଡିକାଲରେ ବହୁ ବିଳମ୍ବରେ ଡାକ୍ତର ଦେଖାଇବା ପରେ ଔଷଧ ପାଇଁ ନିରାମୟ କେନ୍ଦ୍ରରେ ଦୀର୍ଘ ସମୟ ଧରି ଧାଡ଼ିରେ ଛିଡା ହୋଇଛି। ମେଡ଼ିକାଲ କର୍ତ୍ତୃପକ୍ଷ ଏସିରେ ବସି ଏଭଳି ଅବ୍ୟବସ୍ଥାକୁ ଅଣଦେଖା କରିବା ନିନ୍ଦନୀୟ ବୋଲି ସେ କହିଛନ୍ତି। ଅପରପକ୍ଷରେ ମେଡିକାଲ ସୁପରିଣ୍ଟେଣ୍ଡେଣ୍ଟ ପ୍ରଫେସର ଡା. ସୁଧାଂଶୁ ଶେଖର ମିଶ୍ର କହିଛନ୍ତି, ଗ୍ରୀଷ୍ମପ୍ରବାହକୁ ଦୃଷ୍ଟିରେ ରଖି ମେଡିକାଲ ପରିସରରେ ପାନୀୟ ଜଳ ସହ ଅନ୍ୟାନ୍ୟ ବ୍ୟବସ୍ଥା କରାଯାଇଛି। ମେଡିକାଲର ଯେଉଁସ୍ଥାନରେ ଫ୍ୟାନ୍ ନାହିଁ ତୁରନ୍ତ ସେଠାରେ ଲଗାଯିବା ପାଇଁ ବ୍ୟବସ୍ଥା କରାଯିବ। ରଞ୍ଜନରଶ୍ମୀ ବିଭାଗ ପରିସରରେ ଥିବା ରୋଗୀ ପାର୍ବତୀ ସମ୍ପର୍କରେ ଗଣମାଧ୍ୟମରୁ ଖବର ଜାଣିବାକୁ ପାଇଲି। ପରେ ତାଙ୍କୁ ବ୍ୟାଟେରି ଗାଡି ଯୋଗେ ଅନ୍ୟ ବିଭାଗକୁ ନିଆଯାଇଥିବା ମିଶ୍ର କହିଛନ୍ତି।
