ଛତ୍ରପୁର,୨୮।୮(ଡି.ଏନ.ଏ.): ଗଞ୍ଜାମ ଜିଲା ବ୍ରହ୍ମପୁର ମହାନଗର ନିଗମ ସମେତ ସମସ୍ତ ସହରାଞ୍ଚଳରେ ଆହାର କେନ୍ଦ୍ର ନିର୍ମାଣ ହୋଇଛି ା ଏଠାରେ ୫ ଟଙ୍କାରେ ଭାତ, ଡାଲମା ଦିଆଯାଉଛି ା ମାତ୍ର ଏଠାରେ ଖାଦ୍ୟ ମାନଠାରୁ ଆରମ୍ଭ କରି ପାନୀୟଜଳ, ସଫେଇ ଅବ୍ୟବସ୍ଥା ମଧ୍ୟରେ ରହିଛିା ଏପରିକି ସମସ୍ତ ଆହାର କେନ୍ଦ୍ରରେ ପାଇଖାନା ନିର୍ମାଣ ପାଇଁ ରାଜ୍ୟ ଗୃହ ଓ ନଗର ଉନ୍ନୟନ ବିଭାଗ ପକ୍ଷରୁ ବାରମ୍ବାର ନିର୍ଦ୍ଦେଶନାମା ଆସୁଥିଲେହେଁ ତାହା କାର୍ଯ୍ୟକାରୀ ହେଉନି ା ଖାଦ୍ୟ ପରଶୁ ଥିବା ବେଳେ ସମ୍ପୃକ୍ତ କର୍ମଚାରୀ ଆପ୍ରୋନ୍ ଓ ମୁଣ୍ଡ ମଧ୍ୟ ଘୋଡାଉନାହାନ୍ତି ା ଗତ କିଛି ଦିନ ପୂର୍ବେ ଛତ୍ରପୁରଠାରେ ଅନୁଷ୍ଠିତ ସହରାଞ୍ଚଳ ସମୀକ୍ଷା ବୈଠକରେ ଏନେଇ ବିଭାଗର କମିଶନର ତଥା ଅତିରିକ୍ତ ପ୍ରମୁଖ ଶାସନ ସଚିବ ଓ ମ୍ୟୁନିସିପାଲ ପ୍ରଶାସନର ନିର୍ଦ୍ଦେଶକ ଉଦ୍ବେଗ ପ୍ରକାଶ କରିଥିଲେ ା ବିଭିନ୍ନ ସହରାଞ୍ଚଳ ପରିଦର୍ଶନ ବେଳେ ଜିଲାପାଳ ଓ ଡୁଡା ପିଡି ଆହାର କେନ୍ଦ୍ର ପରିଦର୍ଶନ କରିବା ସହ ଖାଦ୍ୟ ମାନ ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଛି ା
ବ୍ରହ୍ମପୁର ମହାନଗର ନିଗମ କମିଶନର ଏବଂ ହିଞ୍ଜିିଳି ଓ ଅନ୍ୟ ଏନ୍ଏସି ନିର୍ବାହୀ ଅଧିକାରୀମାନେ ନିୟମିତ ଆହାର କେନ୍ଦ୍ର ପରିଦର୍ଶନ କରି ମନିଟରିଂ କରିବାକୁ କୁହାଯାଇଛି ା ବ୍ରହ୍ମପୁର ମହାନଗର ନିଗମ ରେ ଥିବା ଆହାର କେନ୍ଦ୍ର ମାନଙ୍କ ମଧ୍ୟରୁ ବ୍ରହ୍ମପୁର ଏମ୍କେସିଜି ଓ ସିଟି ହସ୍ପିଟାଲ ଆହାର କେନ୍ଦ୍ର ପ୍ରମୁଖ ରହିଛି। ଏଠାରେ ପାଇଖାନା ଏଯାବତ ନିର୍ମାଣ ହୋଇନି ା ଉକ୍ତ ୨ କେନ୍ଦ୍ର ଉପରେ ବିଶେଷକରି ରୋଗୀଙ୍କ ସମ୍ପର୍କୀୟମାନେ ନିର୍ଭର କରିଥାନ୍ତି ା ଏଣୁ ଏଠାରେ ପାଇଖାନା ନିର୍ମାଣ କରିବାର ଜରୁରୀ ଆବଶ୍ୟକତା ରହିଛି ା ସହରାଞ୍ଚଳରେ ଥିବା ଆହାର କେନ୍ଦ୍ରଗୁଡିକରେ କିଭଳି ଖାଦ୍ୟ ମାନ ଠିକ୍ ରହିବ ଏବଂ ସଫା ଓ ସମସ୍ତ ଆନୁଷଙ୍ଗିକ ବ୍ୟବସ୍ଥା ହେବ ସେଉପରେ ଧ୍ୟାନ ଦେବାକୁ ନିର୍ଦ୍ଦେଶ ଦିଆଯାଇଥିଲା ା ଏଥିରେ ସ୍ଥାନୀୟ ମେୟର, ଅଧ୍ୟକ୍ଷ ଏବଂ କର୍ପୋରେଟର ଓ କାଉନସିଲରଙ୍କୁ ସାମିଲ କରିବାକୁ କୁହାଯାଇଛି ା ବ୍ରହ୍ମପୁର ମହାନଗର ନିଗମରେ ଥିବା ଆସ୍କା ଗେଟ୍, ପୁରୁଣା ଓ ନୂଆ ବସ୍ଷ୍ଟାଣ୍ଡ ସମେତ ୫ ଟି ଆହାର କେନ୍ଦ୍ରରେ ଅଟୋ ଡିସ୍ ୱାସର କାମ କରୁନି ା ଫଳରେ ଡିସ୍ଗୁଡିକୁ ହାତରେ ଧୁଆଯାଉଛି ା ଯାହାକି ଅସ୍ବାସ୍ଥ୍ୟକର ବୋଲି କୁହାଯାଇଛି ା ସେହିପରି ଛତ୍ରପୁର, ଗୋପାଳପୁର, ରମ୍ଭା, ସୋରଡା ଓ କୋଦଳା ଆହାର କେନ୍ଦ୍ରରେ ମଧ୍ୟ ଅଟୋ ଡିସ୍ ୱାସର କାମ କରୁନଥିବା ଜଣାପଡିଛି ା
କବିସୂର୍ଯ୍ୟନଗର ଆହାର କେନ୍ଦ୍ରରେ ୱାଟର ପ୍ୟୁରିଫାଏର କାମ କରୁନଥିବା ଉକ୍ତ ସମୀକ୍ଷା ବୈଠକରୁ ଜଣାପଡିଥିଲା ା ସେହିପରି ସହରାଞ୍ଚଳ ଗୁଡିକରେ ଆହାର କିଚେନ୍ ପାଇଁ କୋଠା ନିର୍ମାଣ ନିର୍ଦ୍ଦେଶ ଦିଆଯାଇଥିଲା ା ବର୍ତମାନ ସୁଦ୍ଧା ବ୍ରହ୍ମପୁର ମହାନଗର ନିଗମରେ ଆହାର କିଚେନ୍ ନିର୍ମାଣ ଆରମ୍ଭ ହୋଇନି ା କୋଦଳା, ପୁରୁଷୋତ୍ତମପୁର ଓ ବୁଗୁଡାରେ ଆହାର କିଚେନ୍ ନିର୍ମାଣ କାର୍ଯ୍ୟ ପାଣି ଜମିବା କାରଣରୁ ବନ୍ଦ ରହିଛି ା ପାଣି ଜମୁଥିବା ସ୍ଥାନରେ କିଭଳି ଆହାର କିଚେନ୍ ନିର୍ମାଣ ପାଇଁ ଜମି ଚିହ୍ନଟ ହେଲା ସେନେଇ ମଧ୍ୟ ରାଜ୍ୟ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗର ଅଧିକାରୀମାନେ ପ୍ରଶ୍ନ ଉଠାଇଛନ୍ତି ା ରମ୍ଭା ଆହାର କିଚେନ୍ ନିର୍ମାଣ ପାଇଁ ଜମି ଚିହ୍ନଟ ହୋଇଥିବା ସୂଚନା ଦିଆଯାଇଛି ା ଗଞ୍ଜାମ ଓ ସୋରଡାରେ କାମ ଆରମ୍ଭ ହୋଇନଥିବା ବେଳେ ଦିଗପହଣ୍ଡିରେ ଜମି ବିବାଦ ରହିଛି ା ଆହାର କେନ୍ଦ୍ର ଗୁଡିକରେ ଏଲଇଡି ଟିଭି ଲାଗିଛି ା ତେବେ ଅଧିକାଂଶ ଖରାପ ହୋଇ ବନ୍ଦ ପଡିଛି। ଉକ୍ତ ଏଲଇଡି ଟିଭିରେ ସରକାରଙ୍କ ବିଭିନ୍ନ ଯୋଜନା ସମ୍ପର୍କରେ ଡିସପ୍ଲେ ହେବା ପାଇଁ ଏହି ବ୍ୟବସ୍ଥା ହୋଇଥିଲାା ମାତ୍ର ତାହା ହୋଇପାରୁନଥିବା ଜଣାପଡିଛି ା
