ଆନନ୍ଦପୁର, ୧।୬(ସୁଶାନ୍ତ କୁମାର ସାହୁ): ରାଜ୍ୟ ସ୍ବାସ୍ଥ୍ୟସେବାର ଆଉ ଏକ ବିକଳ ଚିତ୍ର ସାମ୍ନାକୁ ଆସିଛି, ତାହା ପୁଣି ଖୋଦ ମୁଖ୍ୟମନ୍ତ୍ରୀଙ୍କ ଜିଲା କେନ୍ଦୁଝରରୁ। ଆନନ୍ଦପୁର ଉପଖଣ୍ଡ ଅନ୍ତର୍ଗତ ସାଇଁକୁଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର (CHC) ଏବେ ବୁଲା କୁକୁରଙ୍କ ଚରାଭୂଇଁ ପାଲଟିଛି। ମେଡିକାଲ ବେଡରେ ରୋଗୀଙ୍କ ବଦଳରେ ବୁଲା କୁକୁରମାନେ ନିର୍ଭୟରେ ଶୋଇ ରହୁଥିବା ଦେଖିବାକୁ ମିଳିଛି, ଯାହା ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ସୃଷ୍ଟି କରିଛି।
ସ୍ବାସ୍ଥ୍ୟକେନ୍ଦ୍ରର ଭିତର ଦୃଶ୍ୟ ଏଭଳି ହୋଇଛି ଯେ ଗୋଟିଏ ବେଡରେ ରୋଗୀ ଶୋଇ ଚିକିତ୍ସିତ ହେଉଥିବା ବେଳେ ତାହାର ଠିକ ପାଖ ବେଡରେ ବୁଲା କୁକୁରମାନେ ଆରାମରେ ଶୋଇଛନ୍ତି। ଏହାକୁ ଦେଖିଲେ ମନେହେଉଛି ସତେ ଯେମିତି ମେଡିକାଲରେ ରୋଗୀଙ୍କ ସହ କୁକୁରମାନଙ୍କର ମଧ୍ୟ ଚିକିତ୍ସା ଚାଲିଛି।
ସ୍ବାସ୍ଥ୍ୟକେନ୍ଦ୍ରରେ ଅନେକ ଡାକ୍ତର, ସ୍ବାସ୍ଥ୍ୟକର୍ମୀ ଓ ସୁରକ୍ଷାକର୍ମୀ ନିୟୋଜିତ ଥିଲେ ମଧ୍ୟ ବୁଲା କୁକୁରମାନେ ଅନାୟସରେ ମେଡିକାଲ ଭିତରକୁ ପଶି ଆସୁଛନ୍ତି। ଏହା କୌଣସି ଗୋଟିଏ ଦିନର ଘଟଣା ନୁହେଁ, ବରଂ ଏଠାରେ ପ୍ରତିଦିନ ଏଭଳି ଦୃଶ୍ୟ ଦେଖିବାକୁ ମିଳୁଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି।
ସରକାରୀ ପାଣ୍ଠିରୁ ଡାକ୍ତର, ସ୍ବାସ୍ଥ୍ୟକର୍ମୀ, ଜଗୁଆଳୀ ଏବଂ ର୍ନିମଳ ସେବକମାନେ ପ୍ରତି ମାସରେ ଲକ୍ଷ ଲକ୍ଷ ଟଙ୍କା ଦରମା ନେଉଛନ୍ତି। କିନ୍ତୁ ସେମାନଙ୍କ ବେପରୁଆ ମନୋଭାବ ଓ ଚରମ ଅବହେଳା ଯୋଗୁ ସାଇଁକୁଳ ସ୍ବାସ୍ଥ୍ୟକେନ୍ଦ୍ରର ସ୍ଥିତି ଏବେ ସମ୍ପୂର୍ଣ୍ଣ ବିପର୍ଯ୍ୟସ୍ତ ହୋଇପଡ଼ିଛି। ଉପଯୁକ୍ତ ପରିମଳ ଓ ସେବା ନମିଳିବାରୁ ସାଧାରଣ ଲୋକେ ଏହି ମେଡିକାଲକୁ ଆସିବାକୁ ନାପସନ୍ଦ କଲେଣି।
ଏହି ସମସ୍ୟାର ସମାଧାନ ପାଇଁ ଏବଂ ଚିକିତ୍ସାଳୟର ସ୍ଥିତି ସୁଧାରିବା ପାଇଁ ସାଇଁକୁଳ ବୁଦ୍ଧିଜୀବୀ ମହଲରୁ ଜିଲା ମୁଖ୍ୟ ଚିକିତ୍ସାଧିକାରୀ (CDMO) ଙ୍କୁ ବାରମ୍ବାର ଦାବି କରାଯାଇଛି। ମାତ୍ର ପ୍ରଶାସନ ତରଫରୁ ଏପର୍ଯ୍ୟନ୍ତ କୌଣସି ଦୃଢ଼ ପଦକ୍ଷେପ ନିଆଯାଇ ନାହିଁ।
ଏହି ଚରମ ଅବହେଳାର ପ୍ରତିବାଦରେ ସାଇଁକୁଳ ଅଞ୍ଚଳବାସୀ ଅତିଶୀଘ୍ର ମେଡିକାଲ ସମ୍ମୁଖରେ ଗଣ-ଧାରଣା ଦେବେ ବୋଲି ପ୍ରଶାସନକୁ ଶେଷ ଚେତାବନୀ ଶୁଣାଇ ଦେଇଛନ୍ତି। ଖବର ପ୍ରସାରଣ ପରେ ଜିଲା ସ୍ବାସ୍ଥ୍ୟ ବିଭାଗ ଏହି ସମ୍ବେଦନଶୀଳ ଘଟଣାକୁ ନେଇ କି କାର୍ଯ୍ୟାନୁଷ୍ଠାନ ଗ୍ରହଣ କରୁଛି, ତାହା ଦେଖିବାକୁ ବାକି ରହିଲା।
