ଜଗତ୍ସିଂହପୁର ଅଫିସ, ୧୧ା୫: ୨୦୧୯ ସାଧାରଣ ନିର୍ବାଚନରେ ଜଗତ୍ସିଂହପୁର ବିଧାନସଭା ନିର୍ବାଚନମଣ୍ଡଳୀରେ କଂଗ୍ରେସ ନେତା ଚିରଞ୍ଜୀବ ବିଶ୍ୱାଳଙ୍କ ପରାଜୟ ହୋଇଥିଲା। ଏହା ପରଠାରୁ ଚିରଞ୍ଜୀବ କାଁ ଭାଁ ନିର୍ବାଚନମଣ୍ଡଳୀକୁ ଆସୁଛନ୍ତି। ସାଙ୍ଗଠନିକ କାର୍ଯ୍ୟ ହେଉ ନ ଥିବାରୁ ଦଳୀୟ ନେତା ଓ କର୍ମୀଙ୍କୁ ନିରାଶ କରୁଛି। ଏ ପରିସ୍ଥିତିରେ ଭୁବନେଶ୍ୱର ଜୟଦେବ ଭବନରେ ଅନୁଷ୍ଠିତ ‘ଜାନକୀ-ବସନ୍ତ ସ୍ବର୍ଣ୍ଣିମ ଦିନ’ ଉପରେ ଅନୁଷ୍ଠିତ ଆଲୋଚନାଚକ୍ରରେ ଚିରଞ୍ଜୀବଙ୍କ ମନ୍ତବ୍ୟକୁ ନେଇ ଜଗତ୍ସିଂହପୁରରେ ଚର୍ଚ୍ଚା ଜୋର ଧରିଛି। କେତେଜଣ ଦଳୀୟ ନେତା ଏହାକୁ ନାପସନ୍ଦ କରିଥିବା ବେଳେ ଆଉ କେତେକ ଦଳ ହିତ ଦୃଷ୍ଟିରୁ ସେ ଏଭଳି ମନ୍ତବ୍ୟ ଦେଇଥିବା କହିଛନ୍ତି।
ଏହି ଆଲୋଚନାଚକ୍ରରେ ଚିରଞ୍ଜୀବ କହିଥିଲେ, କଂଗ୍ରେସ ଦଳ ୧୯୭୭ରେ ଯେଉଁଭଳି ସ୍ଥିତିରେ ଥିଲା ଏବେ ତାହାଠାରୁ ଖରାପ ଅବସ୍ଥାରେ ଅଛି। ଯେଉଁ ଯୁବକମାନେ କଂଗ୍ରେସରେ ସକ୍ରିୟ ହୋଇ ରହିଛନ୍ତି ସେମାନଙ୍କୁ ଠିକ୍ ଭାବେ ସୁଯୋଗ ଦିଆଯାଉନାହିଁ।
ଏ ସମ୍ପର୍କରେ ପୂର୍ବତନ ଜଗତ୍ସିଂହପୁର ପୌରାଧ୍ୟକ୍ଷ ବିପ୍ଳବ ଚୌଧୁରୀ କହିଛନ୍ତି, ଚିରଞ୍ଜୀବଙ୍କ ଏହି ମନ୍ତବ୍ୟ ଦୁର୍ଭାଗ୍ୟଜନକ। ଦଳ ବଡ଼, ବ୍ୟକ୍ତି ନୁହେଁ। ଜଣେ ଆଗଧାଡ଼ିର ନେତା ହିସାବରେ ଜଗତ୍ସିଂହପୁର ବିଧାନସଭା ନିର୍ବାଚନମଣ୍ଡଳୀ ସମେତ ପ୍ରଦେଶ କଂଗ୍ରେସକୁ ମଜଭୁତ କରିବା ତାଙ୍କ ଦାୟିତ୍ୱ। ଏନେଇ କିଛି କାର୍ଯ୍ୟ କରିବା ପରିବର୍ତ୍ତେ ଦଳକୁ ଦୁର୍ବଳ କରିବାକୁ ଯେଉଁ ଷଡ଼ଯନ୍ତ୍ର କରୁଛନ୍ତି ତାହା ନିନ୍ଦନୀୟ। ପ୍ରଦେଶ କଂଗ୍ରେସ ସଭାପତି ଶରତ ପଟ୍ଟନାୟକ ଏ ଘଟଣାକୁ ଗୁରୁତ୍ୱର ସହ ନେଇ ଦଳର ହିତ ଦୃଷ୍ଟିରୁ ଯାହା କାର୍ଯ୍ୟାନୁଷ୍ଠାନ ନେବେ ତାକୁ ସ୍ବାଗତ କରାଯିବ ବୋଲି ସେ କହିଛନ୍ତି। ଜିଲା କଂଗ୍ରେସ ସଭାପତି ନଟବର ବାରିକ କହିଛନ୍ତି, କାର୍ଯ୍ୟକ୍ରମଟି ମହତ ଲକ୍ଷ୍ୟ ନେଇ ହୋଇଥିଲା। ଜାନକୀ-ବସନ୍ତଙ୍କ ସମୟରେ ସ୍ବର୍ଣ୍ଣିମ ଦିନ ଥିଲା। ତାକୁ ମନେ ପକାଇ ଦଳକୁ ମଜଭୁତ କରିବା ମୁଖ୍ୟ ଉଦ୍ଦେଶ୍ୟ ଥିଲା। ଚିରଞ୍ଜୀବ ମଧ୍ୟ ଦଳକୁ ହାନିରେ ପକାଇବା ପାଇଁ କିଛି କହିନାହାନ୍ତି। ଦଳର ବାସ୍ତବ ଚିତ୍ର କହିଛନ୍ତି। କିନ୍ତୁ ଭଲ କହୁ କହୁ ପ୍ରସଙ୍ଗ ନୂଆ ମୋଡ଼ ନେଇ ଯାଇଥିଲା। ୨୦୨୪ ସାଧାରଣ ନିର୍ବାଚନ ପୂର୍ବରୁ ଏହି ବାର୍ତ୍ତା ଦଳୀୟ ନେତା ଓ କର୍ମୀଙ୍କୁ କେତେକାଂଶରେ ପ୍ରଭାବିତ କରିଛି। କିନ୍ତୁ ଚିରଞ୍ଜୀବ ଦଳରେ ଅଛନ୍ତି ଏବଂ ଆଗକୁ କିଛି ଭଲ ହେବ ବୋଲି ଆଶା। ଜଗତ୍ସିଂହପୁର ପୌରାଧ୍ୟକ୍ଷା ଅର୍ଚ୍ଚନା ସିଂହ ମଧ୍ୟ ଚିରଞ୍ଜୀବଙ୍କ ମନ୍ତବ୍ୟ ଦଳ ସ୍ବାର୍ଥ ପାଇଁ ଥିବା ସ୍ପଷ୍ଟ କରିଛନ୍ତି। ସେ କହିଛନ୍ତି, ଦଳର ଭଲ ପାଇଁ ଚିରଞ୍ଜୀବ ଯାହା କିଛି କହିଛନ୍ତି, ତାହା ଉପନିର୍ବାଚନ ପୂର୍ବରୁ କହିଥିବାରୁ ନିଆରା ବାର୍ତ୍ତାଯାଇଛି। ଜିଲା ଯୁବ କଂଗ୍ରେସ ସଭାପତି ପ୍ରଶାନ୍ତ ମଲ୍ଲିକ ମଧ୍ୟ ଚିରଞ୍ଜୀବ ଦଳର ବାସ୍ତବ ସ୍ଥିତି ସମ୍ପର୍କରେ କହିଥିବା ସୂଚାଇଛନ୍ତି । ଆଗକୁ ଦଳର ସମସ୍ତ ନେତା ଏକତ୍ରିତ ହୋଇ କାମ କଲେ ୨୦୨୪ ସାଧାରଣ ନିର୍ବାଚନରେ ସଫଳତା ମିଳିବ ବୋଲି ସେ କହିଛନ୍ତି। କିନ୍ତୁ କେତେଜଣ ଦଳୀୟ ନେତା ନାମ ଗୋପନ ରଖି ଚିରଞ୍ଜୀବ କଂଗ୍ରେସ ସଙ୍ଗଠନଠାରୁ ଧୀରେ ଧୀରେ ଦୂରେଇ ଯାଉଥିବା କହିଛନ୍ତି।
