ଟୋକିଓ,୨୬।୭: ଟୋକିଓ ଅଲିମ୍ପିକ୍ସରେ ଭାରତୀୟ ଶୁଟରମାନେ କ୍ରମାଗତ ଦ୍ୱିତୀୟ ଦିନରେ ମଧ୍ୟ ବିଫଳ ସାବ୍ୟସ୍ତ ହୋଇଛନ୍ତି। ମହିଳା ୧୦ ମିଟର ଏୟାର ପିସ୍ତଲ ଇଭେଣ୍ଟରେ ମନୁ ଭାକର ପଦକ ଜିତିବା ନେଇ ଆଶା କରାଯାଉଥିଲା। ତେବେ ପିସ୍ତଲ ଖରାପ ଥିବା କାରଣରୁ ସେ ବିଫଳ ହୋଇଛନ୍ତି।
୧୯ ବର୍ଷୀୟ ମନୁ ପ୍ରଥମଥର ପାଇଁ ଅଲିମ୍ପିକ୍ସରେ ଅଂଶଗ୍ରହଣ କରିଥିଲେ। କ୍ୱାଲିଫିକେଶନ ରାଉଣ୍ଡରେ ପିସ୍ତଲ ଖରାପ ହେବା କାରଣରୁ ସେ ୨୦ ମିନିଟ ସମୟ ହରାଇଥିଲେ। ଏହା ସତ୍ତ୍ୱେ ସେ ଦ୍ୱାଦଶ ସ୍ଥାନରେ ରହିଥିଲେ। କଟ୍ ଅଫ୍ ୫୭୭ ରହିଥିବା ବେଳେ ମନୁ ୫୭୫ ସ୍କୋର ଶୁଟ୍ କରିଥିଲେ। ଫଳରେ ସେ ଫାଇନାଲ ରାଉଣ୍ଡରେ ପ୍ରବେଶ କରିପାରି ନ ଥିଲେ। ସେହିପରି ଅଲିମ୍ପିକ୍ସରେ ପ୍ରଥମଥର ପାଇଁ ଭାଗ ନେବାର ସୁଯୋଗ ପାଇଥିବା ଯଶସ୍ବିନୀ ସିଂ ଦେଶଓ୍ବାଲ ୫୭୪ ସ୍କୋର କରି ୧୩ତମ ସ୍ଥାନରେ ରହିଥିଲେ। ୧୦ ମିଟର ଏୟାର ରାଇଫଲ ଇଭେଣ୍ଟରେ ଅଭିଜ୍ଞ ଦୀପକ କୁମାର ଓ ଟିନ୍ଏଜର ଦିବ୍ୟାଂଶ ସିଂ ପାନଓ୍ବାର ଭଲ ପ୍ରଦର୍ଶନ କରି ନ ପାରି ଯଥାକ୍ରମେ ୨୬ ଓ ୩୨ତମ ସ୍ଥାନରେ ରହିଥିଲେ।
୧୦ମି. ଏୟାର ରାଇଫଲ ଇଭେଣ୍ଟରୁ ବାଦ୍ ପଡିଥିଲେ ମଧ୍ୟ ମନୁ ପାଖରେ ପଦକ ଜିତିବାର ସୁଯୋଗ ଏବେ ମଧ୍ୟ ରହିଛି। ୨୫ ମିଟର ଏୟାର ପିସ୍ତଲ ଓ ୧୦ ମିଟର ଏୟାର ପିସ୍ତଲ ମିକ୍ସଡ ଇଭେଣ୍ଟରେ ସେ ଭାଗ ନେବେ। ଯଦି ଏଥିରେ ସେ ସଫଳ ହୁଅନ୍ତି ତେବେ ପଦକ ଜିତିବେ। ମିକ୍ସଡ ଇଭେଣ୍ଟରେ ସୌରଭ ଚୌଧୁରୀଙ୍କ ସହ ମନୁ ପ୍ରତିଯୋଗିତାରେ ଅବତୀର୍ଣ୍ଣ ହେବେ।
ଅନ୍ୟତମ ଭାରତୀୟ ଶୁଟର ଅଙ୍ଗଦ ବୀର ସିଂ ବାଜଓ୍ବା ପୁରୁଷ ସ୍କିଟ୍ କ୍ୱାଲିଫିକେଶନରେ ଆଶାନୁରୂପ ପ୍ରଦର୍ଶନ କରିପାରି ନାହାନ୍ତି। ପ୍ରଥମ ୩ଟି ସିରିଜରେ ସେ ୨୫, ୨୪, ୨୪ ସ୍କୋର କରିଥିଲେ। ସୋମବାର ସେ ଅନ୍ତିମ ଦୁଇଟି ସିରିଜରେ ଭାଗ ନେବେ। ସେହିପରି ମାଇରାଜ ଅହମ୍ମଦ ଖାଁ ୭୧ ପଏଣ୍ଟ ଶୁଟ୍ କରି ୩୦ ଜଣ ଶୁଟରଙ୍କ ମଧ୍ୟରୁ ୨୫ତମ ସ୍ଥାନରେ ରହିଥିଲେ। ଶୁଟିଂରେ ପ୍ରଥମ ଦୁଇ ଦିନର ବିଫଳତା ଭାରତୀୟ ଶୁଟିଂଜଗତକୁ ଚକିତ କରିଛି। ଦୀର୍ଘ ଦିନର ପ୍ରସ୍ତୁତି ସତ୍ତ୍ୱେ ଏଭଳି ବିଫଳତାକୁ ନ୍ୟାଶନାଲ ରାଇଫଲ ଆସୋସିଏଶନ ଅଫ ଇଣ୍ଡିଆ (ଏନ୍ଆରଏଆଇ) ସହଜରେ ଗ୍ରହଣ କରିପାରି ନାହିଁ। ଶନିବାର ୧୦ମି. କ୍ୱାଲିଫିକେଶ ରାଉଣ୍ଡରେ ଦୀପକ, ଦିବ୍ୟାଂଶ ଓ ଅପୂର୍ବୀ ଚାଣ୍ଡେଲା ଏବଂ ଏଲାଭେନିଲ ଭାଲରରିଭାନଙ୍କ ବିଫଳତା ଦ୍ୱାରା ଏନ୍ଆରଏଆଇ ନିରାଶ ହୋଇଛି।
