କେନ୍ଦୁଝର,୧୬ା୧(ସ୍ବ.ପ୍ର.): କେନ୍ଦୁଝର ସହର ୧ନଂ. ଓ୍ବାର୍ଡ ଦୀର୍ଘ ବର୍ଷ ହେଲା ଅବହେଳିତ ହୋଇରହିଛି। ଓ୍ବାର୍ଡରେ ଜିଲାର ଆରାଧ୍ୟ ଶ୍ରୀଶ୍ରୀ ବଳଦେବଜୀଉ ରହିଛନ୍ତି। ପ୍ରତିଦିନ ଏଠାକୁ ବହୁ ଭକ୍ତଙ୍କ ଆଗମନ ହୋଇଥାଏ। ଏନେଇ ପ୍ରଶାସନ ପକ୍ଷରୁ ମୁଖ୍ୟ ରାସ୍ତାକଡ଼ ସବୁ ଚକାଚକ କରାଯାଇଥିବା ବେଳେ ସାହିଗୁଡ଼ିକର ବିକାଶ ହୋଇପାରୁନାହିଁ। ସାହିରେ ବସବାସ କରୁଥିବା ବହୁ ଗରିବ ପରିବାର ଘର ଖଣ୍ଡେରୁ ବଞ୍ଚତ୍ତ ରହିଛନ୍ତି। ଏମାନଙ୍କୁ ଦେଖିଲେ ଲାଗୁଛି ସହରାଞ୍ଚଳ ଆବାସ ଯୋଜନା ଏଠାରେ ଦିଗହରା ହୋଇଯାଇଛି। ଲୋକେ ଭାଗ୍ୟକୁ ଆଦରି ପଲିଥିନ ଘରେ ଆଶ୍ରିତ ହୋଇ ରହିଛନ୍ତି। ପାହାଡ଼ ତଳେ ଏହି ଓ୍ବାର୍ଡଟି ରହିଥିବାରୁ ଶୀତର ପ୍ରକୋପ ଅଧିକ ରହିଥାଏ। ଏଣୁ ଏଭଳି ଭଙ୍ଗାଦଦରା ଘରେ ଲୋକଙ୍କ ଦୁଃଖ କଷ୍ଟକୁ ଶୀତ ଦ୍ୱିଗୁଣିତ କରିଦେଉଛି।
ସୂଚନା ମୁତାବକ, ସ୍ଥାନୀୟ ମାଘୁସାହି ତଥା ଚକ୍ରବାଳି ବନ୍ଧସାହିରେ ଘର ନ ଥିବାରୁ ପଲିଥିନ ଘୋଡ଼ା ଘରେ ଅନେକ ପରିବାର ରହୁଛନ୍ତି। ଏଥି ମଧ୍ୟରୁ ସନ୍ତୋଷ ନାଏକଙ୍କ ପରିବାର ଦାରିଦ୍ର୍ୟ ମଧ୍ୟରେ ରହୁଥିବା ବେଳେ ବାପା ଓ ମା’ଙ୍କ ଦେହାନ୍ତ ପରେ ୫ ଭାଇ ଭଉଣୀଙ୍କୁ ଘର ମିଳିନାହିଁ। ଏଣୁ ପଲା ମାରି ରହିବାକୁ ବାଧ୍ୟ ହେଉଛନ୍ତି। ଏକ ଘରେ ଦୁଇ ଭାଇ ରହୁଥିବା ବେଳେ ୩ଭଉଣୀ ଅନ୍ୟ ଜଣଙ୍କ ଘରେ ରହୁଥିବା ସେ କହିଛନ୍ତି। ସନ୍ତୋଷ ଏବେ ବାଂଶପାଳ ବ୍ଲକ୍ ଶୁଆକାଟିସ୍ଥିତ ଉଚ୍ଚ ବିଦ୍ୟାଳୟରେ ଯୁକ୍ତ ୨ ବାଣିଜ୍ୟର ପ୍ରଥମ ବର୍ଷ ଛାତ୍ର। ଆର୍ଥିକ ଅନଟନରୁ ତାଙ୍କ ବଡ଼ଭାଇ ସୁରେନ୍ଦ୍ର ନାଏକ, ବଡ଼ ଭଉଣୀ ସରସ୍ବତୀ ନାଏକ ଅଧାରୁ ପାଠ ଛାଡ଼ି ପରଘରେ କାମ କରି ପରିବାର ଚଳାଉଥିବା ସନ୍ତୋଷ କୁହନ୍ତି। ସାନଭଉଣୀ ପ୍ରତିମା ନାଏକ ଏବେ ଅଷ୍ଟମ ଶ୍ରେଣୀରେ ପଢୁଛନ୍ତି। ସେମାନଙ୍କୁ ରାଶନ କାର୍ଡ ମିଳିଥିଲେ ହେଁ ସେଥିରେ ତିନି ଜଣଙ୍କ ନାମ ରହିଥିବାରୁ ମିଳୁଥିବା ଚାଉଳ ନିଅଣ୍ଟ ହେଉଛି। ଏଣୁ ପାଠପଢ଼ା ପାଇଁ ସହାୟତା ସହ ଘର ଓ ରାଶନର ସୁବ୍ୟବସ୍ଥା କରାଗଲେ ସେମାନେ ଭଲରେ ଚଳିପାରନ୍ତେ ବୋଲି କହିଛନ୍ତି।
ଉକ୍ତ ସାହିରେ ଦୀର୍ଘ ୭୨ ବର୍ଷ ଧରି ରହୁଥିବା ଦିନବନ୍ଧୁ ଦେହୁରୀ ଘର ନ ଥିବାରୁ ଭଙ୍ଗାଦଦରା ଅସୁରକ୍ଷିତ ଘରେ ପୁଅ ଓ ବୋହୂଙ୍କ ସହ ରହୁଛନ୍ତି। ବଞ୍ଚତ୍ ଥାଉ ଥାଉ ଘର ଖଣ୍ଡେ ମିଳିବ ସେ ଆଶା ବାନ୍ଧି ରହିଛନ୍ତି। ସେହିପରି ବୀର ନାଏକ ମଧ୍ୟ ଭଙ୍ଗା ଦଦରା ଘରେ ପରିବାର ସହ ରହୁଛନ୍ତି। ଏଭଳି ସହରାଞ୍ଚଳରେ ଅନେକ ପରିବାର ଆବାସରୁ ବଞ୍ଚତ୍ତ ରହିଛନ୍ତି। ଉକ୍ତ ପରିବାରଗୁଡ଼ିକୁ ଘର ଯୋଗାଇଦୋବକୁ ସାଧାରଣରେ ଦାବି ହୋଇଛି। ସ୍ଥାନୀୟ କାଉନ୍ସିଲର ଶରତ ସାହୁ କହିଛନ୍ତି, ଯେଉଁମାନଙ୍କ ପଟ୍ଟା ଜମି ରହିଛି ସେମାନଙ୍କୁ ଘର ଦିଆଯାଇଛି। ସେହିପରି ଜାଗା ମିଶନରେ ପାଇଥିବା ଲୋକମାନେ ମଧ୍ୟ ଘର ପାଇଛନ୍ତି। ଯେଉଁମାନଙ୍କ ଜାଗା ନାହିଁ ସେମାନଙ୍କୁ ସାମିଲ କରିବାକୁ ଦାବି କରାଯାଇଛି। ଏଣୁ ସମସ୍ତେ ଘର ପାଇବେ।
