ନୂଆଦିଲ୍ଲୀ: ଦିନେଶ କୁମାର ଖାରା ଏସ୍ବିଆଇର ନୂଆ ଅଧ୍ୟକ୍ଷ ଭାବେ ଅବସ୍ଥାପିତ ହୋଇଛନ୍ତି। ବର୍ତ୍ତମାନର ଅଧ୍ୟକ୍ଷ ରଜନୀଶ କୁମାରଙ୍କ କାର୍ଯ୍ୟକାଳ ସରିବା ପରେ ଖାରା ନୂଆ ଦାୟିତ୍ୱ ଗ୍ରହଣ କରିଛନ୍ତି। ଖାରା ବର୍ତ୍ତମାନ ଏସ୍ବିଆଇରେ ପରିଚାଳନା ନିର୍ଦ୍ଦେଶକ ଭାବେ କାର୍ଯ୍ୟକରୁଛନ୍ତି। ତାଙ୍କୁ ଆଗାମୀ ୩ ବର୍ଷ ଲାଗି ନିଯୁକ୍ତି ପ୍ରଦାନ କରାଯାଇଛି। ସେହିଭଳି ଏସ୍ବିଆଇ ଏମ୍ଡି ପଦବୀ ଲାଗି ବ୍ୟାଙ୍କସ ବୋର୍ଡ ବ୍ୟୁରୋ ସ୍ବାମୀନାଥନ ଜାନକୀରମନ ଏବଂ ଅଶ୍ୱିନୀ କୁମାର ତିଓ୍ବାରୀଙ୍କ ନାମକୁ ସୁପାରିସ କରିଛି। ଖାରା ବ୍ୟାଙ୍କର ଏମ୍ଡିଙ୍କ ମଧ୍ୟରେ ସବୁଠାରୁ ବରିଷ୍ଠ। ୧୯୮୪ରେ ସେ ଏସ୍ବିଆଇରେ ପ୍ରୋବେସନାରି ଅଧିକାରୀ ଭାବେ ଯୋଗଦେଇଥିଲେ। ସେ ବାଣିଜ୍ୟରେ ସ୍ନାତକ ଏବଂ ଦିଲ୍ଲୀ ବିଶ୍ୱବିଦ୍ୟାଳୟରୁ ମ୍ୟାନେଜମେଣ୍ଟ ଡିଗ୍ରୀ ହାସଲ କରିଛନ୍ତି। ସେ ଦିଲ୍ଲୀ ଏବଂ ଭୋପାଳ ସର୍କଲରେ ବିଭିନ୍ନ ଗୁରୁତ୍ୱପୂର୍ଣ୍ଣ ପଦପଦବୀରେ କାର୍ଯ୍ୟ କରି ଆସିଛନ୍ତି। ଏସ୍ବିଆଇ ସହ ଏହାର ୫ ସହଯୋଗୀ ଏବଂ ଭାରତୀୟ ମହିଳା ବ୍ୟାଙ୍କ ମିଶ୍ରଣ କ୍ଷେତ୍ରରେ ତାଙ୍କର ବିଶେଷ ଯୋଗଦାନ ରହିଛି। ଏସ୍ବିଆଇ ମ୍ୟୁଚୁଆଲ ଫଣ୍ଡ ଏବଂ ଏସ୍ବିଆଇ ଜେନେରାଲର ସେ ଏମ୍ଡି ଭାବେ ମଧ୍ୟ କାର୍ଯ୍ୟ କରିଛନ୍ତି। ଏସ୍ବିଆଇ ମ୍ୟୁଚୁଆଲ ଫଣ୍ଡ ବାଣିଜ୍ୟକୁ ନୂଆ ଦିଗନ୍ତ ଦେବାରେ ସେ ବେଶ୍ ଜଣାଶୁଣା। ୫୯ ବର୍ଷୀୟ ଖାରାଙ୍କୁ ୨୦୧୬ରେ ବ୍ୟାଙ୍କରେ ଏମ୍ଡି ଭାବେ ନିଯୁକ୍ତି କରାଯାଇଥିଲା। ପରେ ତାଙ୍କ କାର୍ଯ୍ୟକାଳକୁ ୨ ବର୍ଷ ବଢ଼ାଯାଇଛି।
