ଭୁବନେଶ୍ୱର/ନୂଆଦିଲ୍ଲୀ,୨୫।୧୦: ଗତ ସେପ୍ଟେମ୍ବର ୨୪ରୁ କ୍ରମାଗତ ଭାବେ ପେଟ୍ରୋଲ ଓ ଡିଜେଲ ଦର ବଢ଼ି ଚାଲିଛି। ଗତ ମାସକ ମଧ୍ୟରେ ଭୁବନେଶ୍ୱରରେ ପେଟ୍ରୋଲ ଲିଟର ପିଛା ୬.୫୧ ଟଙ୍କା ଏବଂ ଡିଜେଲ ୮.୪୬ ଟଙ୍କା ବୃଦ୍ଧି ପାଇଥିବା ଉତ୍କଳ ପେଟ୍ରୋଲିୟମ ଡିଲର ଆସୋସିଏଶନ ପକ୍ଷରୁ ସୂଚନା ଦିଆଯାଇଛି। ଦେଶର ପ୍ରମୁଖ ତୈଳ ବିପଣନ କମ୍ପାନୀ ଭାରତୀୟ ତୈଳ ନିଗମ (ଆଇଓସିଏଲ୍) ର ସୂଚନା ଅନୁସାରେ ରବିବାର ଭୁବନେଶ୍ୱରରେ.. ଡିଜେଲ ୩୯ ପଇସା ଏବଂ ପେଟ୍ରୋଲ ୩୬ ପଇସା ବୃଦ୍ଧି ପାଇଛି। ଫଳରେ ଏଠାରେ ଡିଜେଲ ଲିଟର ପିଛା ୧୦୫.୦୭ ଟଙ୍କା ଏବଂ ପେଟ୍ରୋଲ ୧୦୮.୫୫ ଟଙ୍କାରେ ବିକ୍ରି ହେଉଛି। ସେହିଭଳି କଟକ ସହରରେ ଡିଜେଲ ଲିଟର ପିଛା ୧୦୫.୪୧ ଟଙ୍କା ଓ ପେଟ୍ରୋଲ ୧୦୮.୯୦ ଟଙ୍କାରେ ପହଞ୍ଚତ୍ଛି।
ଅପରପକ୍ଷରେ ରାଜ୍ୟରେ ସର୍ବାଧିକ ତୈଳ ଦର ମାଲକାନଗିରିରେ ପେଟ୍ରୋଲ ୧୧୪.୧୩ ଟଙ୍କା ଥିବାବେଳେ ଡିଜେଲ ୧୧୦.୪୭ ଟଙ୍କାରେ କାରବାର ହେଉଥିବା ଆସୋସିଏଶନ ପକ୍ଷରୁ ସୂଚନା ଦିଆଯାଇଛି।
ସାରାଦେଶରେ ଲଗାତର ୫ମ ଦିନ ପାଇଁ ତୈଳ ଦର ବୃଦ୍ଧି ଘଟିଛି। ଏହି ପରିପ୍ରେକ୍ଷୀରେ ନୂଆଦିଲ୍ଲୀରେ ମଧ୍ୟ ଉଭୟ ପେଟ୍ରୋଲ ଓ ଡିଜେଲ ମୂଲ୍ୟ ୩୫ ପଇସା ବୃଦ୍ଧି ଘଟିଥିବା ତୈଳ ନିଗମ ପକ୍ଷରୁ ସୂଚନା ମିଳିଛି। ଏହା ଫଳରେ ସେଠାରେ ଡିଜେଲ ଲିଟର ପିଛା ୯୬.୩୨ ଟଙ୍କା ଏବଂ ପେଟ୍ରୋଲ ୧୦୭.୫୯ ଟଙ୍କାରେ ପହଞ୍ଚତ୍ଛି। ଗତ ୫ସପ୍ତାହ ମଧ୍ୟରେ ଦିଲ୍ଲୀରେ ପେଟ୍ରୋଲ ୬.୪୦ ଟଙ୍କା ଏବଂ ଡିଜେଲ ୭.୭୦ ଟଙ୍କା ବଢ଼ିଥିବା ନିଗମ ପକ୍ଷରୁ ସୂଚନା ଦିଆଯାଇଛି।
ସେହିପରି ଦେଶର ପ୍ରମୁଖ ମେଟ୍ରୋ ସହର ଚେନ୍ନାଇ, କୋଲକାତା ଏବଂ ମୁମ୍ବାଇରେ ମଧ୍ୟ ଡିଜେଲ ଦର ୩୪ରୁ ୩୮ ପଇସା ବଢ଼ି ଯଥାକ୍ରମ ୧୦୦.୫୯ ଟଙ୍କା, ୯୯.୪୩ ଟଙ୍କା ଏବଂ ୧୦୪.୩୮ ଟଙ୍କାରେ ରହିଛି। ଏହିସବୁ ମେଟ୍ରୋ ସହରରେ ପେଟ୍ରୋଲ ଲିଟର ପିଛା ୩୦ରୁ ୩୪ ପଇସା ବଢ଼ି ଯଥାକ୍ରମେ ୧୦୪.୫୨ ଟଙ୍କା, ୧୦୮.୧୧ଟଙ୍କା ଏବଂ ୧୧୩.୪୬ ଟଙ୍କାରେ ରହିଛି। ସାରା ଦେଶରେ ସର୍ବାଧିକ ତୈଳ ଦର ରାଜସ୍ଥାନରେ ପେଟ୍ରୋଲ ଲିଟର ପିଛା ୧୧୯.୭୯ ଟଙ୍କା ଥିବାବେଳେ ଡିଜେଲ ୧୧୦.୬୩ ଟଙ୍କାରେ କାରବାର ହେଉଛି ବୋଲି ସୂଚନା ମିଳିଛି।
ଗତ କିଛିଦିନ ହେବ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ଆଶାତୀତ ଭାବେ ବୃଦ୍ଧି ପାଉଛି; ଯାହାର ପ୍ରଭାବ ଭାରତ ବଜାର ଉପରେ ପଡୁଛି ବୋଲି ତୈଳ କମ୍ପାନୀ ଓ କେନ୍ଦ୍ର ସରକାର ମତ ଦେଇଆସୁଛନ୍ତି। ହେଲେ ଯେତେବେଳେ ଅଶୋଧିତ ତେଲର ମୂଲ୍ୟ ହ୍ରାସ ପାଉଥିଲା ସେ ସମୟରେ ସରକାର କିଭଳି ଭାବେ ଦର ସ୍ଥିର ରଖିଥିଲେ ବୋଲି ବିରୋଧୀ ପ୍ରଶ୍ନ କରିଛନ୍ତି। ଜିଏସ୍ଟି ମଧ୍ୟକୁ ତୈଳ ଦର କିପରି ଆସିବ ସେ ବିଷୟରେ ସରକାର ପୂର୍ବରୁ ଚିନ୍ତା କରିଥିଲେ ଦର ଆଜି ଏଳଭଳି ସ୍ଥିତିରେ ନ ଥାନ୍ତା ବୋଲି ବଜାର ବିଶେଷଜ୍ଞମାନେ ମତ ଦେଇଛନ୍ତି। ପେଟ୍ରୋଲ ଦରକୁ ଲୋକେ ଦେଶର ହିତ ପାଇଁ ସହ୍ୟ କରିପାରିବେ ହେଲେ ଡିଜେଲ ଦର ଅହେତୁକ ଭାବେ ବୃଦ୍ଧି ପାଇବା ଯୋଗୁ ତା’ର ପ୍ରଭାବ ସମସ୍ତ ଅତ୍ୟାବଶ୍ୟକ ସାମଗ୍ରୀ ସାଙ୍ଗକୁ ପହିବହନ ସେବା ଉପରେ ପଡୁଛି। ଫଳରେ ସବୁବର୍ଗର ଲୋକ କରୋନା ମାନ୍ଦାବସ୍ଥା ସମୟରେ ଅତିରିକ୍ତ ଆର୍ଥିକ ବୋଝ ବହନ କରୁଛନ୍ତି ବୋଲି ଖାଉଟି ଅଭିଯୋଗ କରିଛନ୍ତି।
