ଭୋଗରାଇ, ୨୬ା୧୨(ଡି.ଏନ.ଏ.) କରୋନା ବିପଦ ଟଳି ନ ଥିବା ବେଳେ ନୂଆ ଭାରିଆଣ୍ଟ ଓମିକ୍ରନ ସଂକ୍ରମଣକୁ ଦୃଷ୍ଟିରେ ରଖି ରାଜ୍ୟ ଓ କେନ୍ଦ୍ର ସ୍ବାସ୍ଥ୍ୟ ବିଭାଗ ପରାମର୍ଶକ୍ରମେ ରାଜ୍ୟ ସରକାର ବଡ଼ଦିନ ଏବଂ ନବବର୍ଷ ନିମନ୍ତେ କେତେକ ନିର୍ଦ୍ଦେଶନାମା ଜାରି କରିଛନ୍ତି। ହେଲେ ପର୍ଯ୍ୟଟକମାନେ କଟକଣାକୁ ଭୁଲି ବଡ଼ଦିନକୁ ଆନନ୍ଦ ଉଲ୍ଲାସରେ ବିତାଇଛନ୍ତି।
ବାଲେଶ୍ୱର ଜିଲା ଉଦୟପୁର, ତାଳସାରୀ, ବିଚିତ୍ରପୁର, ଇକୋ ଟୁରିଜିମ୍, କୀର୍ତ୍ତନିଆ, ଚୌମୁଖ, ଡଗରା, ବାହାବଳପୁର ଓ ଚାନ୍ଦିପୁର ବେଳାଭୂମିରେ ଅସଂଖ୍ୟ ପର୍ଯ୍ୟଟକ କରୋନା କଟକଣାକୁ ବେଖାତିର କରି ଭିଡ଼ ଜମାଇଥିଲେ। ଦୀଘା ବିସ୍ତୀର୍ଣ୍ଣ ଝାଉଁ ଜଙ୍ଗଲରେ ଦଳେ ଦଳେ ପିକନିକ୍ ପାର୍ଟି ଭୋଜିଭାତ ମସଗୁଲ୍ ରହିବା ସହ ସମୁଦ୍ରରେ ଗାଧୋଇବାର ମଜା ନେଇଥିଲେ। ବଡ଼ଦିନ ଉପଲକ୍ଷେ ଚର୍ଚ୍ଚଗୁଡିକରେ ପ୍ରଭୁ ଯୀଶୁଖ୍ରୀଷ୍ଟଙ୍କ ଜନ୍ମଦିନରେ ଖ୍ରୀଷ୍ଟାଧର୍ମାଲମ୍ବୀମାନେ ପ୍ରାର୍ଥନା କରିଥିଲେ। ଭୋଗରାଇ ସୀମାନ୍ତ ପଶ୍ଚିମବଙ୍ଗ ଦୀଘା, ଶଙ୍କରପୁର, ତାଜପୁର, ମନ୍ଦାରମଣୀ ପର୍ଯ୍ୟଟନସ୍ଥଳୀରେ ଥିବା ହୋଟେଲ ଓ ରେଷ୍ଟୁରାଣ୍ଟଗୁଡ଼ିକ ରଙ୍ଗୀନ ଆଲୋକମାଳାରେ ସଜ୍ଜିତ କରାଯାଇ ପର୍ଯ୍ୟଟକମାନଙ୍କୁ ଆକୃଷ୍ଟ କରାଯାଇଥିଲା। ଦୀଘାରେ ଲକ୍ଷାଧିକ ପର୍ଯ୍ୟଟକଙ୍କ ଭିଡ଼ ହୋଇଥିବା ବେଳେ ଚନ୍ଦନେଶ୍ୱର-ତାଳସାରୀ, ଚନ୍ଦନେଶ୍ୱର ବର୍ଡ଼ର ରାସ୍ତା ଚାରିଚକିଆ ଯାନର ଲମ୍ବାଲାଇନ ଲାଗିଥିବାରୁ ଭୋଗରାଇ ଥାନା, ତାଳସାରୀ ମେରାଇନ ଥାନା ଓ ଚନ୍ଦନେଶ୍ୱର ଫାଣ୍ଡି ପୋଲିସକୁ ନାକେଦମ୍ ହେବାକୁ ପଡ଼ିଥିଲା। ପ୍ରସିଦ୍ଧ ଶୈବପୀଠ ଚନ୍ଦନେଶ୍ୱର ଓ ଭୂଷଣ୍ଡେଶ୍ୱର ମହାଦେବଙ୍କଠାରେ ପର୍ଯ୍ୟଟକଙ୍କ ପ୍ରବଳ ଭିଡ଼ ହୋଇଥିଲା।
