ଜଳନ୍ଦର,୨୬ା୧୨: ଦେଶର ଅଗ୍ରଣୀ ଶିକ୍ଷାନୁଷ୍ଠାନ ଲଭ୍ଲି ପ୍ରୋଫେସନାଲ ୟୁନିଭର୍ସିଟି (ଏଲ୍ପିୟୁ)ର ବିଟେକ୍ (ଇସିଇ) ୨ୟ ବର୍ଷ ଛାତ୍ରୀ ଜାହ୍ନବୀ ଡାଙ୍ଗେଟି ବିଶ୍ୱବିଦ୍ୟାଳୟ ପାଇଁ ସୁନାମ ଆଣିଛନ୍ତି। ସେ ପ୍ରଥମ ଭାରତୀୟ ଛାତ୍ରୀ ଭାବେ ନାସା ଅଧୀନ ଇଣ୍ଟରନ୍ୟାଶନାଲ ଏୟାର ଆଣ୍ଡ ସ୍ପେସ୍ ପ୍ରୋଗ୍ରାମ (ଆଇଏଏସ୍ପି)କୁ ଯିବା ପାଇଁ ମନୋନୀତ ହୋଇଛନ୍ତି। ନାସାର ପରୀକ୍ଷଣ ସ୍ଥଳ ଆଲବାମ (ୟୁଏସ୍ଏ)ର କେନେଡି ସ୍ପେସ୍ ସେଣ୍ଟରକୁ ଯାଇ ସେଠାରୁ ଜ୍ଞାନ ଆରୋହଣ କାର୍ଯ୍ୟକ୍ରମରେ ସାମିଲ ହେବା ଯୋଜନା ରହିଛି। ଏଭଳି ଏକ ମହତ୍ତ୍ୱପୂର୍ଣ୍ଣ ଶିକ୍ଷାଭିତ୍ତିକ କାର୍ଯ୍ୟକ୍ରମ ପାଇଁ ସାରା ବିଶ୍ୱରୁ ଆଇଏଏସ୍ପି ମୋଟ ୨୦ଜଣ କୃତୀ ବିଦ୍ୟାର୍ଥୀଙ୍କୁ ଚୟନ କରିଥିବା ଜଣାପଡ଼ିଛି। ଆନ୍ଧ୍ରପ୍ରଦେଶରେ ଜନ୍ମିତ ଜାହ୍ନବୀ ପ୍ରଥମ ଭାରତୀୟ ତଥା ଭାରତୀୟ ଛାତ୍ରୀ ଭାବେ ଏହି ସୁନାମ ଅର୍ଜନ କରିଛନ୍ତି। ଏହି ଅବସରରେ ସେ କେନେଡି ସ୍ପେସ୍ ସେଣ୍ଟର ଆଲବାମରେ ରହି ଅନ୍ତରୀକ୍ଷ ଯାତ୍ରା ସମ୍ପର୍କିତ ବିଶେଷ ଜ୍ଞାନ ଆରୋହଣ ସାଙ୍ଗକୁ ଆବଶ୍ୟକ ବିଷୟବସ୍ତୁ ଉପରେ ମଧ୍ୟ ଶିକ୍ଷାପ୍ରାପ୍ତ କରିବେ ବୋଲି ଜଣାପଡ଼ିଛି। କଠିନ ପରିଶ୍ରମ ସାଙ୍ଗକୁ ଏଲ୍ପିୟୁର ସହଯୋଗ ଓ ଏହାର ଶିକ୍ଷକଙ୍କ ତତ୍ତ୍ୱାବଧାନରେ ଜାହ୍ନବୀ ନାସାର ଉକ୍ତ ପରୀକ୍ଷାରେ ଦକ୍ଷତା ପ୍ରଦର୍ଶନ କରି ସଫଳତା ହାସଲ କରିଥିଲେ। ଏହି ପରିପ୍ରେକ୍ଷୀରେ ଜାହ୍ନବୀଙ୍କୁ ଟିମ୍ କେନେଡିର ମିଶନ ଡାଇରେକ୍ଟର ଭାବେ ନିଯୁକ୍ତ କରାଯାଇଛି। ତାଙ୍କର ଏହି ସଫଳତା ସମ୍ପର୍କରେ ଏଲ୍ପିୟୁର କୁଳପତି ଅଶୋକ ମିତ୍ତଲ କହିଛନ୍ତି, ସେ ଆମ ପାଇଁ ଯେତିକି ଗର୍ବ ଭାରତ ପାଇଁ ମଧ୍ୟ ଗୌରବ ଲାଭ କରିଛନ୍ତି। ବିଶ୍ୱବିଦ୍ୟାଳୟର ଶିକ୍ଷକଙ୍କ ସହଯୋଗ ସହ ତାଙ୍କ କଠିନ ପରିଶ୍ରମର ଫଳ ମିଳିଛି। ସେ କଳ୍ପନା ଚାଓ୍ବାଲା ଓ ସୁନିତା ଉଇଲିିୟମ୍ସଙ୍କ ଭଳି ହେବାକୁ ଚେଷ୍ଟା ଜାରି ରଖିଛନ୍ତି। ସେ ତାଙ୍କ ଲକ୍ଷ୍ୟପଥରେ ସଫଳ ହୁଅନ୍ତୁ ବୋଲି ଏଲ୍ପିୟୁ ପରିବାର ପକ୍ଷରୁ କାମନା କରାଯାଉଛି ବୋଲି ମିତ୍ତଲ କହିିଛନ୍ତି।
