ରାଞ୍ଚି,୨୪।୧୧: ବିହାର କ୍ରିକେଟ ଆସୋସିଏସନର ଉପାଧ୍ୟକ୍ଷ ଦେବଲ ସହାୟଙ୍କ ମଙ୍ଗଳବାର ନିଧନ ଘଟିଛି। ମୃତ୍ୟୁ ବେଳକୁ ତାଙ୍କୁ ୭୩ ବର୍ଷ ହୋଇଥିଲା। ଝାଡ଼ଖଣ୍ଡ ରାଞ୍ଚି ସ୍ଥିତ ଏକ ହସ୍ପିଟାଲରେ ମଙ୍ଗଳବାର ସେ ଅନ୍ତିମ ନିଶ୍ୱାସ ତ୍ୟାଗ କରିଥିଲେ। ଗତ ୩ମାସରୁ ସେ ଅସୁସ୍ଥ ଥିଲେ। ତାଙ୍କ ବିୟୋଗରେ ଖେଳ ଜଗତରେ ଶୋକର ଛାୟା ଖେଳିଯାଇଛି। ଦେବଲଙ୍କୁ ରାଞ୍ଚି କ୍ରିକେଟର ଭୀଷ୍ମପିତାମା ବୋଲି କୁହାଯାଉଥିବା ବେଳେ ଭାରତର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନୀଙ୍କ ସେ ମେଣ୍ଟର ମଧ୍ୟ ଥିଲେ। କ୍ରିକେଟରେ ଜଗତରେ ଧୋନୀଙ୍କ ସଫଳତା ପଛରେ ଦେବଲଙ୍କ ବେଶ୍ ଗୁରୁତ୍ୱପୂର୍ଣ୍ଣ ଭୂମିକା ରହିଛି। କ୍ରିକେଟ ଓ ଫୁଟବଲର ଜଣେ ଅଗ୍ରଣୀ ଖେଳାଳି ଭାବେ ଜଣାଶୁଣା ଦେବଲ ୨୦୦୬ରେ ସେଣ୍ଟ୍ରାଲ କୋଲଫିଲ୍ଡସ୍ ଲିମିଟେଡ (ସିସିଏଲ୍)ର କର୍ମଚାରୀ ନିର୍ଦ୍ଦେଶକ ଭାବେ ଅବସର ନେବା ପରେ କ୍ରୀଡା ପ୍ରଶାସନରୁ ସେ ନିଜକୁ ଦୂରେଇ ରଖିଥିଲେ। କ୍ରିକେଟରେ ସେ ଏଭଳି ଏକ ପରିବେଶ ସୃଷ୍ଟି କରିଥିଲେ ଯେ, ତାଙ୍କ ଅଧିନରେ ଅନେକ ଖେଳାଳି ବର୍ତ୍ତମାନ ଦେଶ ତଥା ରାଜ୍ୟକୁ ପ୍ରତିନିଧିତ୍ୱ କରୁଛନ୍ତି।
