ଚେନ୍ନାଇ, ୧।୫: ଭାରତୀୟ କ୍ରିକେଟର ମହାନାୟକ ତଥା ଚେନ୍ନାଇ ସୁପର କିଙ୍ଗସ (ସିଏସକେ)ର ପୂର୍ବତନ ଅଧିନାୟକ ଏମଏସ ଧୋନୀଙ୍କ ଆଇପିଏଲ ଭବିଷ୍ୟତକୁ ନେଇ ଚର୍ଚ୍ଚା ଜୋର ଧରିଛି। ଆଇପିଏଲ ୨୦୨୫ରେ ସିଏସକେର ଭାଗ୍ୟ ଖରାପ ରହିଥିବା ବେଳେ ଧୋନୀଙ୍କ ଅବସର ପ୍ରସଙ୍ଗ ପୁଣି ଥରେ ଚର୍ଚ୍ଚାରେ। ତେବେ, ପଞ୍ଜାବ କିଙ୍ଗସ ବିପକ୍ଷରେ ମ୍ୟାଚ ପରେ ଧୋନୀ ଏକ ରୋମାଞ୍ଚକର ଉତ୍ତର ଦେଇ ପ୍ରଶଂସକଙ୍କ ମନରେ ଉତ୍ସାହ ଭରିଛନ୍ତି।
ଚଳିତ ଆଇପିଏଲ ସିଜନରେ ସିଏସକେର ପ୍ରଦର୍ଶନ ନିରାଶାଜନକ ରହିଛି। ୧୦ ଟି ଟିମ ମଧ୍ୟରୁ ସିଏସକେ ପଏଣ୍ଟ ତାଲିକାରେ ନବମ ସ୍ଥାନରେ ରହିଛି, ମାତ୍ର ଦୁଇଟି ମ୍ୟାଚରେ ଜିତିଛି। ଏହା ମଧ୍ୟରେ MS Dhoniଙ୍କୁ ନେଇ ପ୍ରଶ୍ନ ଉଠିଛି ଯେ, ଆଗାମୀ ସିଜନରେ ସେ ଖେଳିବେ କି ନାହିଁ? ଏକ ସାମ୍ବାଦିକ ସମ୍ମିଳନୀରେ ଧୋନୀଙ୍କୁ ଏହି ପ୍ରଶ୍ନ ପଚାରାଯାଇଥିଲା, ଏବଂ ତାଙ୍କର ଉତ୍ତର ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି।
MS Dhoni କହିଛନ୍ତି, “ମୁଁ ଏବେ ଏ ବିଷୟରେ ଅଧିକ ଚିନ୍ତା କରୁନାହିଁ… ମୋତେ ଖେଳିବାରେ ଆନନ୍ଦ ମିଳୁଛି, ଏବଂ ଆଗାମୀ ଦିନରେ କଣ ହେବ, ତାହା ସମୟ କହିବ।” ଧୋନୀ ଆହୁରି ମଧ୍ୟ ସିଏସକେର ଚଳିତ ସିଜନର ପ୍ରଦର୍ଶନ ବିଷୟରେ ମତ ରଖିଛନ୍ତି। ସେ କହିଛନ୍ତି, “ଆମେ ଘରୋଇ ମାଟିରେ ଭଲ ଖେଳି ପାରିନାହୁଁ, ଯାହା ଆମ ପାଇଁ ନିରାଶାଜନକ। ସାଧାରଣତଃ ଆମେ ଟିମରେ ଅଧିକ ପରିବର୍ତ୍ତନ କରୁନାହୁଁ, କିନ୍ତୁ ଏହି ସିଜନରେ ଆମେ ଅନେକ ପରିବର୍ତ୍ତନ କରିଛୁ। ଏହା କାରଣ ଆମ ଅଧିକାଂଶ ଖେଳାଳି ଭଲ ପ୍ରଦର୍ଶନ କରିପାରି ନାହାନ୍ତି।” ସେ ଆହୁରି ମଧ୍ୟ ନିଲାମୀ ପରେ ଟିମ ଗଠନରେ ହୋଇଥିବା କିଛି ତ୍ରୁଟିକୁ ମଧ୍ୟ ଉଲ୍ଲେଖ କରିଛନ୍ତି।
ଅନ୍ୟପକ୍ଷରେ, ସିଏସକେର ପୂର୍ବତନ ଖେଳାଳି ସୁରେଶ ରାଇନା ଦାବି କରିଛନ୍ତି ଯେ ଧୋନି ଆଇପିଏଲ ୨୦୨୬ରେ ମଧ୍ୟ ଖେଳିବେ। ରାଇନା କହିଛନ୍ତି, “MS Dhoni ଆଗାମୀ ସିଜନ ପାଇଁ ନିଶ୍ଚିତ ଭାବେ ଫେରିବେ। ସେ ଟିମକୁ ନେତୃତ୍ୱ ଦେବା ସହ ପ୍ରଶଂସକଙ୍କ ପାଇଁ ଖେଳ ଜାରି ରଖିବେ।” ରାଇନା ଆହୁରି ମଧ୍ୟ ସିଏସକେର ନିଲାମୀ ରଣନୀତି ଉପରେ ପ୍ରଶ୍ନ ଉଠାଇଛନ୍ତି, ଏବଂ ପରବର୍ତ୍ତୀ ସିଜନରେ ଟିମର ପୁନର୍ଗଠନ ପାଇଁ ପରାମର୍ଶ ଦେଇଛନ୍ତି।
MS Dhoniଙ୍କ ବୟସ ୪୩ ବର୍ଷ ହୋଇଥିଲେ ମଧ୍ୟ, ସେ ଉଇକେଟ କିପିଂ ଏବଂ ନେତୃତ୍ୱରେ ନିଜର ଦକ୍ଷତା ଦେଖାଇ ଚାଲିଛନ୍ତି। ସିଏସକେର ମୁଖ୍ୟ କାର୍ଯ୍ୟର୍ନିବାହୀ କାଶୀ ବିଶ୍ୱନାଥନ ମଧ୍ୟ ଧୋନିଙ୍କ ଫେରିବା ସମ୍ଭାବନା ଉପରେ ଆଶାବାଦୀ ଥିବା ପ୍ରକାଶ କରିଛନ୍ତି। ସେ କହିଛନ୍ତି, “ଧୋନିଙ୍କ ପାଇଁ ସିଏସକେର ଦ୍ୱାର ସବୁବେଳେ ଖୋଲା ରହିଛି। ଆମେ ତାଙ୍କ ନିଷ୍ପତ୍ତିର ଅପେକ୍ଷା କରୁଛୁ।”
