ସମ୍ବଲପୁର,୫।୪: ଓଡ଼ିଶା ରାଜନୀତିର ହଟସ୍ପଟ ପାଲଟିଥିବା ସମ୍ବଲପୁରରେ ଆରମ୍ଭ ହେଲା ଲଢ଼େଇ। ଭୋଟ ପାଇଁ ମଇଦାନରେ ଦୁଇ ହେଭିୱେଟ। ପ୍ରଚାର ଆରମ୍ଭ କରିଛନ୍ତି ବିଜେଡି ପ୍ରାର୍ଥୀ ପ୍ରଣବ ପ୍ରକାଶ ଦାସ(ବବି ଦାସ) ଓ ଭାଜପାର ଧର୍ମେନ୍ଦ୍ର ପ୍ରଧାନ । ଶ୍ରୀ ମଦନମୋହନ ଜୀଉଙ୍କ ଆଶୀର୍ବାଦ ନେଇ ଆଠମଲ୍ଲିକ ନିର୍ବାଚନମଣ୍ଡଳୀରେ ‘ମୋଦି ବିଜୟ ପ୍ରଚାର’ର ଶୁଭାରମ୍ଭ କରିଛନ୍ତି ଧର୍ମେନ୍ଦ୍ର । ସେହିପରି ଦେବଗଡ ଅଧିଷ୍ଠାତ୍ରୀ ମାଆ ପ୍ରଧାନପାଟେଶ୍ୱରୀଙ୍କ ଆଶୀର୍ବାଦ ନେଇ ପ୍ରଚାର ଆରମ୍ଭ କରିଛନ୍ତି ପ୍ରଣବ ।
ବିରାଟ ପଟୁଆର ସହ ଶହ ଶହ କର୍ମୀ ନେଇ ଦୁଇ ହେଭିଓ୍ବେଟ ନେତା ପ୍ରଚାର [ଆରମ୍ଭ କରିଛନ୍ତି। କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଅନୁଗୁଳ ପୁରୁଣାଗଡରୁ ଆରମ୍ଭ କରିଛନ୍ତି ପ୍ରଚାର। କେନ୍ଦ୍ରମନ୍ତ୍ରୀଙ୍କୁ ପାଛୋଟି ନେଇଛନ୍ତି ସ୍ଥାନୀୟ ସମର୍ଥକ ଓ କର୍ମୀ। ଶ୍ରୀ ମଦନମୋହନ ଜୀଉଙ୍କ ଆଶୀର୍ବାଦ ନେଇ ଆଠମଲ୍ଲିକ ନିର୍ବାଚନମଣ୍ଡଳୀରେ ‘ମୋଦି ବିଜୟ ପ୍ରଚାର’ର ଶୁଭାରମ୍ଭ କରିଛନ୍ତି। ଭୋଟ ଅଭିଯାନ ଆରମ୍ଭ କରି ଧର୍ମେନ୍ଦ୍ର କହିଛନ୍ତି, ପୁରୁଣାଗଡ ସ୍ବାଭିମାନ, ବଳିଦାନ, ସମର୍ପଣ ଓ ଆଧ୍ୟାତ୍ମିକତାର ପବିତ୍ର ଭୂମି। ଏଭଳି କ୍ଷେତ୍ରରେ ଶତାବ୍ଦୀ ଶତାବ୍ଦୀ ପୂର୍ବରୁ ପ୍ରତିଷ୍ଠା ହୋଇଥିବା ପ୍ରଭୁ ଶ୍ରୀ ମଦନମୋହନ ଜୀଉ ମନ୍ଦିରରେ ଦର୍ଶନ କରିବା ତାଙ୍କର ସୌଭାଗ୍ୟ ବୋଲି କହିଛନ୍ତି। ଏହି ବଳିଦାନ ଓ ସଂଗ୍ରାମୀ ଭୂମିରୁ ଆଠମଲ୍ଲିକ ନିର୍ବାଚନମଣ୍ଡଳୀରେ ‘ମୋଦି ବିଜୟ ପ୍ରଚାର’ ଅଭିଯାନ ଆରମ୍ଭ କରିବା ଗୌରବର ବିଷୟ ବୋଲି କହିଛନ୍ତି କେନ୍ଦ୍ରମନ୍ତ୍ରୀ ।
ସମ୍ବଲପୁର ଲୋକସଭା ଆସନ ପାଇଁ ବିଜେଡିର ପ୍ରାର୍ଥୀ ଘୋଷଣା ପରେ ପ୍ରଚାର ଆରମ୍ଭ କରିଛନ୍ତି ବବି ଦାସ। ପ୍ରଥମେ ଦେବଗଡ ଅଧିଷ୍ଠାତ୍ରୀ ମାଆ ପ୍ରଧାନପାଟେଶ୍ୱରୀଙ୍କ ଆଶୀର୍ବାଦ ନେଇଛନ୍ତି ପ୍ରଣବ। ତେବେ କୌଣସ ନେତାଙ୍କ ନାଁ ନନେଇ ଭାଜପାକୁ ଟାର୍ଗେଟ କରିଛନ୍ତି ପ୍ରଣବ। କହିଛନ୍ତି, ଯାହାଙ୍କୁ ନିର୍ବାଚିତ କରିଥିଲେ, କେବେ ବି ସ୍ବର ଉଠାଇ ନାହାଁନ୍ତି। ତେଣୁ ଏବେ ଜବାବ ଦେବାର ସମୟ ଆସିଛି । ୨୪ ନିର୍ବାଚନରେ ବଡ ଫାଇଟ ଦେଖିବ ଓଡିଶା।
