ଦୀର୍ଘ ୧୦ ବର୍ଷ ପରେ ଜମ୍ମୁ ଓ କଶ୍ମୀରରେ ନିର୍ବାଚନ ଅନୁଷ୍ଠିତ ହୋଇ ଏବେ ସେଠାରେ ଗଣତାନ୍ତ୍ରିକ ଉପାୟରେ ସରକାର ଗଠନ ହୋଇଛି। ନୂଆ ସରକାର ୧୬ ଅକ୍ଟୋବରରେ ଆସିବା ପରେ ଏହି କେନ୍ଦ୍ରଶାସିତ ଅଞ୍ଚଳରେ ପ୍ରାୟ ୪ଟି ଛୋଟବଡ଼ ଆତଙ୍କବାଦୀ ଆକ୍ରମଣ ଘଟି ସାଧାରଣ ଲୋକ ଓ ଯବାନଙ୍କୁ ମିଶାଇ ୧୩ ଜଣଙ୍କ ମୃତ୍ୟୁ ଘଟି ସାରିଲାଣି। ୨୮ ଅକ୍ଟୋବରରେ ଆତଙ୍କବାଦୀମାନେ ଜମ୍ମୁର ଅଖନୁର ସେକ୍ଟରରେ ସେନା ଗାଡ଼ି ଉପରକୁ ଆକ୍ରମଣ କରିଥିଲେ। ସେନା ପ୍ରତିଆକ୍ରମଣ କରିବାରୁ ଜଣେ ଆତଙ୍କବାଦୀଙ୍କ ମୃତ୍ୟୁ ଘଟିଛି। ଉଲ୍ଲେଖଯୋଗ୍ୟ ଯେ, କେନ୍ଦ୍ର ସରକାର ୫ ଅଗଷ୍ଟ ୨୦୧୯ରେ ଜମ୍ମୁ-କଶ୍ମୀରରୁ ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦ କରିବା ସହ ସେହି ରାଜ୍ୟକୁ ବିଭାଜନ କରି ଜମ୍ମୁ ଓ କଶ୍ମୀର ଏବଂ ଲଦାଖ ନାମରେ ଦୁଇଟି କେନ୍ଦ୍ରଶାସିତ ଅଞ୍ଚଳ କରିଥିଲେ। ତେବେ ସରକାରଙ୍କ ଏହି ନିଷ୍ପତ୍ତି ବିରୋଧରେ ସୁପ୍ରିମକୋର୍ଟରେ ଦାଖଲ ହୋଇଥିବା ପିଟିଶନଗୁଡ଼ିକର ଶୁଣାଣି କରି ଗତବର୍ଷ ସର୍ବୋଚ୍ଚ ଅଦାଲତ କେନ୍ଦ୍ର ସରକାରଙ୍କ ପଦକ୍ଷେପକୁ ବୈଧ ଘୋଷଣା କରିଥିଲେ ହେଁ ଜମ୍ମୁ ଓ କଶ୍ମୀର ରାଜ୍ୟ ମାନ୍ୟତା ପୁନଃ ସ୍ଥାପନ କରିବାକୁ ନିର୍ଦ୍ଦେଶ ଦେଇଥିଲେ। ତେବେ ସୁପ୍ରିମକୋର୍ଟଙ୍କ ନିର୍ଦ୍ଦେଶ କ୍ରମେ ୯୦ ଆସନ ବିଶିଷ୍ଟ ବିଧାନସଭା ପାଇଁ ସେପ୍ଟେମ୍ବର ୧୮ରୁ ଅକ୍ଟୋବର ୧ ପର୍ଯ୍ୟନ୍ତ ୩ଟି ପର୍ଯ୍ୟାୟରେ ନିର୍ବାଚନ ଅନୁଷ୍ଠିତ ହୋଇଥିଲା।
ଏବର ପରିସ୍ଥିତିକୁ ଦେଖିଲେ ଜମ୍ମୁ ଓ କଶ୍ମୀରରେ ଗଣତନ୍ତ୍ର ଫେରିଛି, ହେଲେ ସେଠାକାର ଲୋକଙ୍କ ମଧ୍ୟରେ ବିଶ୍ୱାସ ହେଉ ନାହିଁ ଯେ ନିର୍ବାଚନ ପରେ ସରକାର କେଉଁ ଧାରଣା ନେଇ କାର୍ଯ୍ୟ କରିବାକୁ ଯାଉଛନ୍ତି। କେନ୍ଦ୍ର ସରକାରଙ୍କ ଦୀର୍ଘବର୍ଷର ଦମନଲୀଳା ବିଫଳ ହୋଇଛି, ଯେଉଁଥିପାଇଁ ଆତଙ୍କବାଦ ସୁଦୃଢ଼ ହୋଇ ମୁଣ୍ଡ ଟେକିଛି। କେଉଁ ଜାଗାରେ ତ୍ରୁଟି ରହୁଛି ତାହା ଖୋଜି ବାହାର କରିବା ପାଇଁ କେହି ଇଚ୍ଛୁକ ଥିଲା ଭଳି ମନେ ହେଉନାହିଁ। ଜନସାଧାରଣଙ୍କ ଇଚ୍ଛାକୁ ପୋଲିସ ଓ ସେନା ବେଶି ଦିନ ପାଇଁ ଦମନ କରି ରଖିପାରିବେ ନାହିଁ। ସମ୍ଭବତଃ ଏବେ ଦେଖାଯାଉଥିବା ବିସ୍ଫୋରଣ ଆତଙ୍କବାଦର ଆଢ଼ୁଆଳରେ ଘଟୁଥାଇପାରେ। ମନେରଖିବାକୁ ହେବ ଯେ, ଆତଙ୍କବାଦୀଙ୍କୁ ସଫଳତା ମିଳିବା ସକାଶେ ସାଧାରଣ ନାଗରିକଙ୍କ ସମର୍ଥନ-ସକ୍ରିୟ କିମ୍ବା ମାନସିକ-ସବୁବେଳେ ଲୋଡ଼ା ଥାଏ। ଜମ୍ମୁ ଓ କଶ୍ମୀରରେ ସମସ୍ୟା ସୁଧୁରିଯାଇଛି ଏବଂ ଆୟତ୍ତ ହୋଇଯାଇଛି ବୋଲି ସରକାର କହିବା ଫଳରେ ତାହାର ପ୍ରତିକ୍ରିୟା ଦେଖିବାକୁ ମିଳୁଛି।
ଏବେକାର ଘଟଣାଗୁଡ଼ିକର ବିଶେଷତା ହେଲା ଯେ, ଆକ୍ରମଣଗୁଡ଼ିକ ମୁସଲମାନ ବହୁଳ ଅଞ୍ଚଳ କଶ୍ମୀର ଉପତ୍ୟକା ପରିବର୍ତ୍ତେ ହିନ୍ଦୁବହୁଳ ଜମ୍ମୁରେ ଘଟୁଛି। ପରିବର୍ତ୍ତିତ ସ୍ଥିତି ସହ ତାଳ ମିଳାଇ ଯେଉଁଭଳି ପଦକ୍ଷେପ ନିଆଯିବା ଦରକାର, ହୁଏତ କେନ୍ଦ୍ର ସରକାର ସେଥିପାଇଁ ସଜାଗ ନ ଥିବା ପରି ମନେହେଉଛି। ନିଜର ଏଜେଣ୍ଡା ବା ରାଜନୈତିକ କାର୍ଯ୍ୟକ୍ରମକୁ ଜୋରଜବରଦସ୍ତ ଲାଗୁ କରାଇବାକୁ ଯାଇ ଦେଶର ପ୍ରବଳ କ୍ଷତି ଘଟୁଛି। ସେଥିପାଇଁ ଜମ୍ମୁ ଓ କଶ୍ମୀରର ସମସ୍ୟା କେନ୍ଦ୍ର ସରକାରଙ୍କ ନେତୃତ୍ୱରେ କେବେ ନିୟନ୍ତ୍ରଣାଧୀନ ହୋଇପାରିଥିଲା ବୋଲି ଏବେ ବିଶ୍ୱାସ ହେଉ ନାହିଁ। ସ୍ଥାନୀୟ ଗଣମାଧ୍ୟମର କଣ୍ଠରୋଧ କରି ସରକାରୀ ବିବୃତିିଗୁଡ଼ିକ ବାସ୍ତବ ପରିସ୍ଥିତିଠାରୁ ଭିନ୍ନ ଦିଗକୁ ଦର୍ଶାଇ ଆସୁଥିଲା ଭଳି ମନେହୁଏ। ସେହିସବୁ ତ୍ରୁଟିପୂର୍ଣ୍ଣ କାର୍ଯ୍ୟକ୍ରମର କୁଫଳ ଏବେ ଦେଶକୁ ଭୋଗିବାକୁ ପଡ଼ିବ।
