ଥୁଆମୂଳ ରାମପୁର, ୧୨/୦୬ (କୀର୍ତ୍ତି ଚନ୍ଦ୍ର ଦୁର୍ଗା): ଗରିବର ଅଶ୍ରୁ ପୋଛିଲା ପ୍ରଶାସନ, ସାର୍ଥକ ହେଲା ‘ଧରିତ୍ରୀ’ର ସମ୍ବାଦ। କାଳବୈଶାଖୀ ଝଡ଼ରେ ଭାଙ୍ଗି ଚୁରମାର୍ ହୋଇଯାଇଥିବା ଗୁଣୁପୁର ପଞ୍ଚାୟତ କାଠଘରା ଗ୍ରାମର ଦାଦନ ଶ୍ରମିକ ଗଜେନ୍ଦ୍ର ନାଏକଙ୍କ ପରିବାରର ବିକଳ ଚିତ୍ର ପ୍ରକାଶ ପାଇବା ପରେ ସ୍ଥାନୀୟ ପ୍ରଶାସନ ତୁରନ୍ତ ତତ୍ପରତା ପ୍ରକାଶ କରିଛି। ଗୁଣୁପୁର ଗ୍ରାମ ପଞ୍ଚାୟତ ପରିସରରେ ରାଜ୍ୟ ସରକାରଙ୍କ ଦୁଇ ବର୍ଷ ପୂତ୍ତି ଅବସରରେ ଶୁକ୍ରବାର ଆୟୋଜିତ “ବିକାଶର ଧାରା ଓଡ଼ିଶା ସାରା” ନାଗରିକ ସହଭାଗିତା କାର୍ଯ୍ୟକ୍ରମରେ ବିପନ୍ନ ଗଜେନ୍ଦ୍ର ନାଏକଙ୍କୁ ‘ଅନ୍ତ୍ୟୋଦୟ ଗୃହ ଯୋଜନା’ର ସରକାରୀ କାର୍ଯ୍ୟାଦେଶ ପ୍ରଦାନ କରାଯାଇଛି। ଏଥିସହ ତାଙ୍କ ସହିତ ଅନ୍ୟ ୯ ଜଣଙ୍କୁ ଗୃହ ଏବଂ ୮ ଜଣଙ୍କୁ ନୂତନ ରାସନ କାର୍ଡ ମଧ୍ୟ ବଣ୍ଟନ କରାଯାଇଛି। ଏହି କାର୍ଯ୍ୟକ୍ରମରେ ଥୁଆମୂଳ ରାମପୁର ବିଡ଼ିଓ ଧ୍ରୁବ ଚରଣ ମୁଦୁଲି, ସରପଞ୍ଚ ସୁଜାତା ମାଝୀ, ଅତିରିକ୍ତ ମୁଖ୍ୟ ଯନ୍ତ୍ରୀ ସାଲଖୁ ହେମ୍ବ୍ରମ, ମେଡିକାଲ ଅଫିସର ଡାକ୍ତର ପ୍ରଦ୍ୟୁଶ କୁମାର ପଣ୍ଡା, ବିପିସି ଆର.ଏଚ୍. ରାଜେନ୍ଦ୍ର ନାରାୟଣ ଦେବ, ସିଡିପିଓ ମଧୁମାଲା ବାଗ, ପିଇଓ ମୁକେଶ କୁମାର ପଟେଲ, ଏଡିଇଓ ଫକୀର ବେହେରା, ଏସ.ସି. ସେଲ୍ ସଭାପତି ବିଷ୍ଣୁ ନାଏକ, ଯୁବନେତା ରାଧାକୃଷ୍ଣ ନାଏକ, ସୁଶାନ୍ତ ନାଏକ ଓ ମହାଦେବ ସିଂଙ୍କ ସମେତ ଅନେକ ଅଧିକାରୀ ଉପସ୍ଥିତ ରହି ଗଜେନ୍ଦ୍ରଙ୍କୁ ଏହି କାର୍ଯ୍ୟାଦେଶ ହସ୍ତାନ୍ତର କରିଛନ୍ତି। ସରକାରୀ ନିର୍ଦ୍ଦେଶନାମା ଅନୁଯାୟୀ, ହିତାଧିକାରୀ ଗଜେନ୍ଦ୍ର ନାଏକଙ୍କୁ ୧୨୦ ବର୍ଗଫୁଟ ପରିମିତ ଢଳେଇ ଛାତ ବିଶିଷ୍ଟ ସୁରକ୍ଷିତ ଗୃହ ନିର୍ମାଣ ନିମନ୍ତେ ମୋଟ ୧,୨୦,୦୦୦ ଟଙ୍କାର ଆର୍ଥିକ ସହାୟତା ରାଶି ସିଧାସଳଖ ବ୍ୟାଙ୍କ ଖାତାକୁ ଯୋଗାଇ ଦିଆଯିବ। ଏହି ରାଶି ତିନୋଟି ପର୍ଯ୍ୟାୟରେ (କାର୍ଯ୍ୟାଦେଶ ସହିତ ପ୍ରଥମ କିସ୍ତି ୪୦,୦୦୦ ଟଙ୍କା, ଛାତ ସ୍ତରରେ ଦ୍ୱିତୀୟ କିସ୍ତି ୭୫,୦୦୦ ଟଙ୍କା ଏବଂ ଗୃହ ନିର୍ମାଣ ସମାପ୍ତ ପରେ ତୃତୀୟ କିସ୍ତି ୧୫,୦୦୦ ଟଙ୍କା) ପ୍ରଦାନ କରାଯିବ। ‘ଧରିତ୍ରୀ’ର ସମ୍ବାଦ ପ୍ରଭାବରୁ ମିଳିଥିବା ଏହି ତ୍ୱରିତ ସରକାରୀ ସହାୟତା ଯୋଗୁଁ ଗଜେନ୍ଦ୍ରଙ୍କ ପରିବାର ଓ ଗ୍ରାମବାସୀ ପ୍ରଶାସନକୁ ଧନ୍ୟବାଦ ଜଣାଇଛନ୍ତି।
