ରଘୁନାଥପୁର,୧ା୩(ଡି.ଏନ୍.ଏ.): ରଘୁନାଥପୁର ବ୍ଲକ କାର୍ଯ୍ୟାଳୟରେ ଯନ୍ତ୍ରୀ ଓ କର୍ମଚାରୀଙ୍କ ଅସହଯୋଗ ଯୋଗୁ କାର୍ଯ୍ୟରେ ଅଚଳାବସ୍ଥା ଲାଗିରହିଛି। ଫଳରେ ଗତ ୬ମାସ ତଳୁ ଆରମ୍ଭ ହୋଇଥିବା ବିଭିନ୍ନ ପଞ୍ଚାୟତର ଉନ୍ନୟନମୂଳକ କାର୍ଯ୍ୟରେ ଅଗ୍ରଗତି ହୋଇପାରୁନାହିଁ। ଏହାବାଦ୍ ଦୀର୍ଘଦିନ ଧରି ଠିକାଦାରମାନେ କାର୍ଯ୍ୟ କରି ବିଲ୍ ପାଇନଥିବାରୁ ତୀବ୍ର ଅସନ୍ତୋଷ ପ୍ରକାଶ ପାଇଛି। ସେହିପରି ବାୟୋମେଟ୍ରିକ ଫିଙ୍ଗରପ୍ରିଣ୍ଟ ସିଷ୍ଟମ ନ ଥିବାରୁ କେତେକ କର୍ମଚାରୀ ବିଳମ୍ବରେ ଆସି ଶୀଘ୍ର ପଳାଇ ଯାଉଥିବା ଅଭିଯୋଗ ହୋଇଛି। ଗତବର୍ଷ ରଘୁନାଥପୁର ବ୍ଲକରେ ଆମ ଗଁା ଆମ ବିକାଶ ଯୋଜନାରେ ୧ କୋଟି ୬୨ ଲକ୍ଷ ଟଙ୍କାର ଦୁର୍ନୀତି ନେଇ ପୋଲିସ ସହକାରୀ ଯନ୍ତ୍ରୀଙ୍କୁ ଗିରଫ କରିଥିଲା। ଏହି ମାମଲା ଏବେ କୋର୍ଟରେ ବିଚାରାଧୀନ ରହିଛି। ତେବେ ଏହାର ପ୍ରଭାବ ସିଧାସଳଖ ଲୋକଙ୍କ ଉପରେ ପଡ଼ିଛି। ଯନ୍ତ୍ରୀମାନେ କାମ କରିବା ପାଇଁ ଅନିଚ୍ଛା ପ୍ରକାଶ କରୁଥିବା ଅଭିଯୋଗ ହେଉଛି। ପୂର୍ବରୁ ହୋଇଥିବା କାର୍ଯ୍ୟର ବିଲ୍ କରିବା ପାଇଁ ମଧ୍ୟ ସେମାନେ ସମୟ ଗଡ଼ାଇ ଚାଲିଛନ୍ତି। ବ୍ଲକର କ୍ୟାଶ ସେକ୍ସନରେ ମୋଟା ଅଙ୍କର କାରବାର ନ ହେଲେ ଦାୟିତ୍ୱରେ ଥିବା କର୍ମଚାରୀଙ୍କ ପାଖରୁ ଫାଇଲ ଅନ୍ୟ ଟେବୁଲକୁ ଯାଉନି ବୋଲି ଗୁରୁତର ଅଭିଯୋଗ ହେଉଛି। ବିଭିନ୍ନ କାରଣରୁ ବ୍ଲକରେ ଅଚଳାବସ୍ଥା ଲାଗି ରହିଥିବାବେଳେ ବିଡିଓ ଲମ୍ବୋଦର ଖୁଣ୍ଟିଆ ନିଜର ଅସହାୟତା ପ୍ରକାଶ କରିବା ସହ କାର୍ଯ୍ୟକୁ ତ୍ୱରାନ୍ବିତ କରିବା ପାଇଁ ବାରମ୍ବାର ବୈଠକ କରି କର୍ମଚାରୀଙ୍କୁ ତାଗିଦ କରି ଚାଲିଥିବା କହିଛନ୍ତି। କାର୍ଯ୍ୟରେ ବ୍ୟବହୃତ ସାମଗ୍ରୀର ଭାଉଚର ଦେଇପାରୁନଥିବାରୁ ବିଲ୍ ହେବାରେ ବିଳମ୍ବ ଘଟୁଛି ବୋଲି ସହକାରୀ ଯନ୍ତ୍ରୀ ସର୍ପିଲ ପ୍ରଧାନ କହିଛନ୍ତି। ତୁରନ୍ତ ବ୍ଲକରେ ବାୟୋମେଟ୍ରିକ ପଦ୍ଧତି ବ୍ୟବସ୍ଥା କରାଯିବା ସହ ଉନ୍ନୟନମୂଳକ କାର୍ଯ୍ୟରେ ଅଗ୍ରଗତି ଓ ଦୀର୍ଘଦିନରୁ ପଡିରହିଥିବା କାର୍ଯ୍ୟର ବିଲ୍ଗୁଡିକ ଦେବା ପାଇଁ ଅଞ୍ଚଳବାସୀ ନିର୍ବାହୀ ଅଧିକାରୀ ଜିଲାପରିଷଦ ଓ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି।
