ଆରଡ଼ି,୧୭।୫ (ଡି.ଏନ.ଏ.) ଭଦ୍ରକ ଜିଲା ଆରଡ଼ି ଆଖଣ୍ଡଳମଣି ପୀଠରେ ଆସନ୍ତା ଜୁନ୍ ୪ରେ ଶୀତଳ ଷଷ୍ଠୀରେ ଦେବଦେବ ମହାଦେବ ଓ ଶୈଳ ନନ୍ଦିନୀ ମାତା ପାର୍ବତୀଙ୍କ ବିବାହ ଅନୁଷ୍ଠିତ ହେବ। ଏହି ଉପଲକ୍ଷେ ସୋମବାର ସମ୍ପୂର୍ଣ୍ଣ ଲୋକାଚାରରେ ଦେବଦମ୍ପତିଙ୍କ ଲଗ୍ନ ମହୋତ୍ସବ ଆଡ଼ମ୍ବରରେ ସମ୍ପନ୍ନ ହୋଇଛି। ଯୋଡ଼ି ମହୁରୀ, ସାହାନାଇ ଓ ଢୋଲର ତାଳେ ତାଳେ, କୁଳ ପୁରୋହିତଙ୍କ ମନ୍ତ୍ରୋଚ୍ଚାରଣ, ହରିବୋଲ, ହୁଳହୁଳି, ଓଁ ନମଃ ଶିବାୟ ଧ୍ୱନିରେ ଜ୍ୟୋତିଷ କନ୍ୟାପିତା ଚନ୍ଦ୍ରମଣି ପାଢ଼ୀଙ୍କ ଗୃହରେ ଲଗ୍ନ ଚିଟାଉ ଲେଖିଥିଲେ। ଚାନ୍ଦି ରେକାବୀରେ ଲଗ୍ନ ଚିଟାଉକୁ ରଖି ମଙ୍ଗଳ ପ୍ରତୀକ ଲାଲ କପଡ଼ାରେ ଏହାକୁ ବନ୍ଧା ଯାଇଥିଲା। ପଞ୍ଚ ଦେବତାଙ୍କ ପୂଜା ଉପକରଣ, ଖଟୁଲି ଇତ୍ୟାଦି ସହ ପୁରୋହିତ, ଜ୍ୟୋତିଷ, ଭଣ୍ଡାରୀ, ଶଙ୍ଖୁଆ ବରପିତା ଦୁଷ୍ମନ୍ତ ପାଢ଼ୀଙ୍କ ଗୃହକୁ ଆଗମନ କରିଥିଲେ। ସେବାୟତମାନେ ବିରାଟ ଶୋଭାଯାତ୍ରାରେ ଏହି ଲଗ୍ନ ନେଇ ବରପିତାଙ୍କ ଗୃହରେ ପହଞ୍ଚାଇଥିଲେ। ବରପିତା ସମସ୍ତଙ୍କୁ ଅଭ୍ୟର୍ଥନା ଜଣାଇ ନିଜ ଗୃହକୁ ପାଛୋଟି ନେଇଥିଲେ। ସେଠାରେ ପୁରୋହିତଙ୍କ ସମେତ ସମସ୍ତ ସେବାୟତଙ୍କୁ ଭୁରି ଭୋଜନରେ ଆପ୍ୟାୟିତ କରାଇଥିଲେ। ପରେ ବିଧି ପୂର୍ବକ ଲଗ୍ନ ପଠନ କରାଯାଇଥିଲା। ମନ୍ଦିର ପରିଚାଳକ ବିଦ୍ୟାଧର ପଲାଇ, ସହ ପରିଚାଳକ ସୁଧାକର ବିଶ୍ୱାଳ, ବରିଷ୍ଠ ସେବାୟତ ଅଧ୍ୟାପକ ବିଜୟ ଦାଶ, ଭୀମସେନ ପାଢ଼ୀ, ଆଶିଷ ପାଢ଼ୀ, ବାବାଜୀ ଶଙ୍କର ପାଢ଼ୀ, ଲଲାଟେନ୍ଦୁ ପାଢ଼ୀ, ମାନସ ପାଢ଼ୀ, ଆର୍ତ୍ତବନ୍ଧୁ ପାଢ଼ୀ, ଆରଡ଼ି ଫାଣ୍ଡି ଅଧିକାରୀ ବୈଦ୍ୟନାଥ ସୋରେନ, ରମେଶ ଚନ୍ଦ୍ର ରାଉତ ପ୍ରମୁଖ ଲଗ୍ନ ମହୋତ୍ସବରେ ଉପସ୍ଥିତ ଥିଲେ।
ଯୋଗୁ ଦୁଇବର୍ଷ ହେଲା ନିରାଡ଼ମ୍ବରରେ ଦେବଦମ୍ପତିଙ୍କ ଲଗ୍ନ ମହୋତ୍ସବ ଅନୁଷ୍ଠିତ ହୋଇଥିଲା। ଚଳିତବର୍ଷ କଟକଣା କୋହଳ ଯୋଗୁ ଆଡ଼ମ୍ବରରେ ଲଗ୍ନ ମହୋତ୍ସବ ସମ୍ପନ୍ନ ହୋଇଥିବାରୁ ସେବାୟତ, ଶ୍ରଦ୍ଧାଳୁ ଓ ସ୍ଥାନୀୟ ଅଞ୍ଚଳର ଅଧିବାସୀ ଉତ୍ସାହିତ ଥିବା ପରିଲକ୍ଷିତ ହୋଇଥିଲା।
