ପଟ୍ଟାଙ୍ଗି,୨୪।୩(ଶରତ ଧଳ): କୋର୍ଟରୁ ଆସୁଥିଲା ସମନ। ହେଲେ ବାରମ୍ବାର ଏହାକୁ ଅବମାନନା କରି ଆଇନ୍ ଉଲ୍ଲଘଂନ କରୁଥିବା ବ୍ୟକ୍ତିଙ୍କ ବିରୋଧରେ ପୋଲିସ ଗାଁରେ ପହଞ୍ଚି ସମ୍ପୃକ୍ତ ବ୍ୟକ୍ତିଙ୍କ ଘର ସମୁଖରେ ଡାକବାଜି ମାଧ୍ୟମରେ ଜାରି ହୋଇଥିବା ଗିରଫ ପରୱାନା ପଢି ଶୁଣାଇଛି। ଏପରି କି ପୋଲିସ ଘର ସମୁଖରେ ଏକ୍ ନୋଟିସ ଲଗାଇଛି। ଏହି ଘଟଣା ଅଞ୍ଚଳରେ ଚର୍ଚ୍ଚାର ବିଷୟ ହୋଇଛି। ଏହା ଦେଖିବାକୁ ମିଳିଛି କୋରାପୁଟ ଜିଲା ପଟ୍ଟାଙ୍ଗି ଥାନା ଅଧୀନ ପୁକାଲି ପଞ୍ଚାୟତ ସଦର ଗ୍ରାମର ରାଜୁସାହିରେ ।
ସୁନାବେଡା ଏସ୍ଡିପିଓ ମନବ୍ରତା ଶତପଥୀଙ୍କ ନିର୍ଦ୍ଦେଶ କ୍ରମେ ପଟ୍ଟାଙ୍ଗି ପୋଲିସର ଏକ ଟିମ୍ ଗାଁରେ ପହଞ୍ଚି ଥିଲା। ପରେ ଉପସ୍ଥିତ ପୋଲିସ ଅଧିକାରୀ ଟି.ପି. ମୁରଲୀ ରାଜୁଙ୍କ ଘର ସମୁଖରେ ସାହି ବାସିନ୍ଦାଙ୍କ ଉପସ୍ଥିତରେ ଗିରଫ ପରୱାନା ପଢି ଥିଲେ।
୨୦୧୫ରେ ନକଲି ନୋଟ କାରବାରରେ ସମ୍ପୃକ୍ତ ଥିବା ଟି.ପି. ମୁରଲୀ ରାଜୁ ରାୟଗଡ଼ା ଜିଲା ଟାଉନ୍ ପୋଲିସ ଦ୍ୱାରା ଗିରଫ ହୋଇ କୋର୍ଟ ଚାଲାଣ ହୋଇଥିଲେ । ପରେ ସେ ଜେଲ୍ରୁ ବାହାର ଗାଁକୁ ଫେରିଥିଲେ। ହେଲେ ତାଙ୍କ ନାମରେ ରାୟଗଡ଼ା କୋର୍ଟ ପକ୍ଷରୁ ବାରମ୍ବାର ସମନ ଜାରି କରାଯାଇଥିଲା। ଏହାକୁ ସେ ଅଣଦେଖା କରି ଚାଲିଥିଲେ। ଫଳରେ କୋର୍ଟ ତାଙ୍କ ନାମରେ ଜାମିନ ବିହୀନ ଗିରଫ ପରୱାନା ଜାରି କରିଥିଲେ। ହେଲେ ଅଭିଯୁକ୍ତ ରାଜୁ ଆତ୍ମସମର୍ପଣ ନ କରି ଆଇନ ଉଲ୍ଲଘଂନ କରିଥିଲେ । ଅଦାଲତଙ୍କ ପକ୍ଷରୁ ନୋଟିସ୍ ଜାରି କରି ଆସନ୍ତା ୩୦ ଦିନ ମଧ୍ୟରେ ଆତ୍ମସମର୍ପଣ ନ କଲେ ଅସ୍ତାବର ସମ୍ପତ୍ତି ବାଜ୍ୟାପ୍ତି କରାଯିବା ସହ ନିଲାମ କରାଯିବ ବୋଲି ନୋଟିସ୍ରେ ଉଲ୍ଲେଖ ରହିଛି। ଏପରିକି ଉକ୍ତ ନୋଟିସ ରାଜୁଙ୍କ ଘର କାନ୍ଥରେ ଲଗାଇଛି।
ନୋଟିସ୍ ଲଗାଇବା ବେଳେ ଥାନା ଏସ୍ଆଇ କୁଞ୍ଜଲତା ବେହେରା, ଏଏସ୍ଆଇ ନରସିଂଘ ଦୋରା, ମାନସ ରଞ୍ଜନ ସେଠିଙ୍କ ସମେତ ପୋଲିସ କର୍ମଚାରୀ ଉପସ୍ଥିତ ରହିଥିଲେ। ସୂଚନା ଥାଉକି ଅଭିଯୁକ୍ତ ରାଜୁଙ୍କ ନାମରେ ଅଦାଲତରେ କେସ ନମ୍ବର ସିଟି ୧୦୪ବି /୧୫ ରୁଜୁ ହୋଇଛି।
