ଯାଜପୁର ଅଫିସ,୯ା୬: ଯାଜପୁର-କେନ୍ଦୁଝର ରୋଡ ଷ୍ଟେଶନ ନିକଟରେ ବୁଧବାର ଅପରାହ୍ନରେ ମାଲବାହୀ ବଗିରେ କଟି ୬ ଜଣଙ୍କ ମୃତ୍ୟୁ ଓ ୨ ଜଣ ଗୁରୁତର ଆହତ ଘଟଣାର ବିଭାଗୀୟ ତଦନ୍ତ ଆରମ୍ଭ ହୋଇଛି। ଖୋର୍ଦ୍ଧା ପୂର୍ବତଟ ରେଳ ଡିଭିଜନ ସୁରକ୍ଷା ବିଭାଗର ଏକ ୪ ଜଣିଆ ଟିମ୍ ଗୁରୁବାର ଘଟଣାସ୍ଥଳକୁ ଏକାଧିକ ଥର ଯାଇ ତଦନ୍ତ କରି ଫେରିଛନ୍ତି। ତେବେ ଏହି ଘଟଣାକୁ ଡିଆର୍ଏମ୍ ସିଙ୍କେଶ ରୟ ଅତି ହାଲୁକା ଭାବେ ନେଇ କେହି ଜଣେ ହ୍ୟାଣ୍ଡିଲ ପୂର୍ବରୁ ଖୋଲି ଦେଇଥିବାରୁ ଏଭଳି ପରିସ୍ଥିତି ସୃଷ୍ଟି ହେଲା ବୋଲି କହିଛନ୍ତି। ଯଦି ଏହା ସତ୍ୟ, ତେବେ ସୁରକ୍ଷା ବିଭାଗ କର୍ମଚାରୀମାନେ କାହିଁକି ନିୟମିତ ଭାବେ ତଦାରଖ କରୁ ନ ଥିଲେ ବୋଲି ସାଧାରଣରେ ପ୍ରଶ୍ନ ଉଠିଛି। ତେବେ ଅଚଳ ଲାଇନର ଶେଷ ଭାଗରେ ଥିବା ପାଚେରିକୁ ଲାଗି ଅନ୍ୟ ଏକ ଭଙ୍ଗା ବଗି ଚକରେ ପବନରେ ଗଡି ଯାଇଥିବା ମାଲବାହୀ ବଗିଗୁଡିକ ପିଟି ହେବା ଫଳରେ ସମ୍ମୁଖ ବଗି ସାମାନ୍ୟ ଲାଇନଚ୍ୟୁତ ହୋଇ ଡାହାଣକୁ ବଙ୍କି ଯାଇଛି। ଯଦି ନିକଟସ୍ଥ ରେଳଲାଇନରେ ଉକ୍ତ ବଗି ପଡି ଯାଇଥାନ୍ତା, ତେବେ ପୁଣି ଏକ ବଡ଼ ରେଳ ଦୁର୍ଘଟଣା ହେବାର ଆଶଙ୍କାକୁ ଏଡାଇ ଦିଆଯାଇ ପାରି ନ ଥାଆନ୍ତା ବୋଲି ମତପ୍ରକାଶ ପାଇଛି। ଅନ୍ୟପକ୍ଷେ ମୃତକଙ୍କ ପରିବାରବର୍ଗଙ୍କୁ ରାଜ୍ୟ ସରକାର ୫ଲକ୍ଷ ଟଙ୍କା ଲେଖାଏ ଅନୁକମ୍ପାମୂଳକ ସହାୟତା ଘୋଷଣା କରିଥିବାବେଳେ ଏଯାଏ କେନ୍ଦ୍ର ସରକାର ନୀରବ ରହିଥିବା ଘଟଣାକୁ ଜିଲାବାସୀ ସହଜେ ଗ୍ରହଣ କରି ପାରିନାହାନ୍ତି। ତେଣୁ ବିଭିନ୍ନ ସାମାଜିକ ସଙ୍ଗଠନ ମୃତକଙ୍କ ପରିବାରବର୍ଗଙ୍କୁ ସହାୟତା ଘୋଷଣା କରିବାକୁ ଦାବି କରିଛନ୍ତି। ନଚେତ୍ ଆଗାମୀ ଦିନରେ ବ୍ୟାପକ ଆନ୍ଦୋଳନ ହେବ ବୋଲି ଚେତାବନୀ ଦେଇଛନ୍ତି ା ବାହାନଗା ଟ୍ରେନ ଦୁର୍ଘଟଣାରେ ୨ ଜଣ କେନ୍ଦ୍ରମନ୍ତ୍ରୀ ଉପସ୍ଥିତ ରହି ପରିଚାଳନା କରିଥିବା ସହ ମୃତକଙ୍କ ପରିବାରବର୍ଗଙ୍କୁ ୧୦ ଲକ୍ଷ ଟଙ୍କା ଲେଖାଏଁ ସହାୟତା ଘୋଷଣା କରିଛନ୍ତି। କିନ୍ତୁ ଯାଜପୁର ଜିଲାର ୬ ଜଣ ଶ୍ରମିକ ବଗି ଚକରେ କଟି ମୃତ୍ୟୁ ହୋଇଥିଲେ ମଧ୍ୟ କାହିଁକି ନୀରବ ରହିଛନ୍ତି ତାହା ଅନେକଙ୍କ ମନରେ ପ୍ରଶ୍ନବାଚୀ ସୃଷ୍ଟି କରିଛି। ଏହି ଘଟଣାରେ ସମସ୍ତ ମୃତକ ଯାଜପୁର ଜିଲାର । ଏଥିରେ ଗୋଟିଏ ପରିବାରର ୩ ଜଣ ରହିଛନ୍ତି। ସେମାନେ ହେଲେ କୋରେଇ ବ୍ଲକ ବାଲିଆପାଳ ଗ୍ରାମର ସୁଶାନ୍ତ କୁମାର ଜେନା, ପ୍ରଶାନ୍ତ କୁମାର ଜେନା ଓ ଭୀମସେନ ଜେନା। ସେହିପରି ଗମ୍ଭାରିଆ ଗ୍ରାମର ମାନସ ସାମଲ, ଗୌତମ ସାମଲ, ମୁକୁନ୍ଦପୁର ଗ୍ରାମର ଦୋଳଗୋବିନ୍ଦ ପ୍ରଧାନ ଅନ୍ତର୍ଭୁକ୍ତ । ଭଦ୍ରକ ଜିଲା ଭଣ୍ଡାରିପୋଖରୀ ଥାନା ବାହାପୁର ଗ୍ରାମର ନବଘନ ବାରିକ ଓ ଗମ୍ଭାରିଆ ଗ୍ରାମର ଅମର କୁମାର ସାହୁ ଗୁରୁତର ଆହତ ହୋଇ କଟକ ବଡ଼ ମେଡିକାଲରେ ଚିକିତ୍ସାଧୀନ ରହିଛନ୍ତି।
