କେନ୍ଦୁଝର, ୫।୪(ସ୍ବ.ପ୍ର.): କେନ୍ଦୁଝର ଜିଲାରେ ଷ୍ଟିଲ ପ୍ଲାଣ୍ଟ ପ୍ରତିଷ୍ଠା ଦାବିରେ ସୋମବାର ‘କେନ୍ଦୁଝର ଚାଲ’ ଡାକରା ଦିଆଯାଇଛି। ଏହି ଅବସରରେ ବିଭିନ୍ନ ଦଳ, ସଙ୍ଗଠନ, ଯୁବ ଗୋଷ୍ଠୀଙ୍କ ପକ୍ଷରୁ ବହୁ ସଂଖ୍ୟାରେ ପ୍ଲାକାର୍ଡ ଓ ବ୍ୟାନର ଧରି ଏକ ବିଶାଳ ରାଲି ଅନୁଷ୍ଠିତ ହୋଇଯାଇଛି। କାଳୀ ପଡିଆରେ ଏକ ସଭା ଆୟୋଜନ ପରେ ଜିଲାପାଳଙ୍କ କାର୍ଯ୍ୟାଳୟ ଦେଇ ସହର ପରିକ୍ରମା କରିଛନ୍ତି। କେନ୍ଦୁଝର ଏକତା ଜିନ୍ଦାବାଦ ଓ କେନ୍ଦୁଝରର ଷ୍ଟିଲ ପ୍ଲାଣ୍ଟ ଆମର ଆଦି ଦାବିରେ ପ୍ରକମ୍ପିତ ହୋଇଥିଲା। ଏହି ପରିପେକ୍ଷୀରେ, ପ୍ରମୁଖ ରାଜନୈତିକ ଦଳ ବିଜେଡି, ଭାଜପା, କଂଗ୍ରେସ ତଥା ଅନ୍ୟ ଦଳର ପ୍ରତିନିଧିମାନେ ସାମିଲହୋଇ ଇସ୍ପାତ କାରଖାନାର ଆବଶ୍ୟକତା ଓ ଜିଲାର ହକ ଉପରେ ମତ ରଖିଥିଲେ। ଜିଲାରେ ଖଣିଜ ସମ୍ପଦ ଥାଇ ଇସ୍ପାତ କାରଖାନା ସ୍ଥାପନ ନ ହେବା ଏବଂ ଜିଲାରୁ ଖଣିଜ ସମ୍ପଦ ନେଇ ଅନ୍ୟ ଜିଲା ଓ ରାଜ୍ୟରେ ଇସ୍ପାତ କାରଖାନା ସ୍ଥାପନ କରି ସେ ଅଞ୍ଚଳର ବିକାଶ କରିବା ନେଇ ଉଦ୍ବେଗ ପ୍ରକାଶ ପାଇଥିଲା। ଜିଲାକୁ ସବୁବେଳେ ଅବହେଳା କରାଯାଉଥିବାରୁ ଆଉ ବରଦାସ୍ତ କରାଯିବ ନାହିଁ ବୋଲି ନେତାମାନେ କହିଥିଲେ।
