ଲାଠୋର, ୧୯।୫(ଭୁବନେଶ୍ୱର ବାରିକ):ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଲାଠୋର ଗ୍ରାମରେ ଥିବା ମେଡ଼ିକାଲ ଷ୍ଟୋରଗୁଡ଼ିକ ସନ୍ଧ୍ୟା ୭ଟା ପରେ ବନ୍ଦ ରହୁଛି। ସାଧାରଣ ଲୋକ ମେଡ଼ିସିନ ପାଇଁ ଷ୍ଟୋରକୁ ଯାଇ ବନ୍ଦ ଥିବା ଦେଖି ତାର ଭିଡ଼ିଓ କରି ସୋସିଆଲ ମିଡ଼ିଆରେ ଭାଇରାଲ କରୁଥିବା ଦେଖାଯାଉଛି। ଲାଠୋର ଗ୍ରାମର ଭୁତେଶ୍ୱର ଶବର ନାମକ ଜଣେ ଯୁବକ ନିଜ ଝିଅ ପାଇଁ ରବିବାର ରାତି ୮ ଟାରେ ଗ୍ରାମରେ ଥିବା ସମୁଦାୟ ୮ଟି ମେଡ଼ିକାଲ ଷ୍ଟୋରକୁ ମେଡ଼ିସିନ କିଣିବା ପାଇଁ ଯାଇଥିଲେ। ହେଲେ ଉକ୍ତ ୮ଟି ମେଡ଼ିକାଲ ଷ୍ଟାର ବନ୍ଦ ଥିବା ଦେଖିବାକୁ ପାଇଥିଲେ। ଏଥିରେ ସେ ବିରକ୍ତି ହୋଇ ଏକ ଭିଡ଼ିଓ ପ୍ରସ୍ତୁତ କରିଥିଲେ। ସେହି ଭିଡ଼ିଓ ସୋସିଆଲ ମିଡ଼ିଆରେ ଘୁରି ବୁଲୁଛି। ଭିଡ଼ିଓରେ ନିଜେ ଭୁତେଶ୍ୱର ଅଭିଯୋଗ କରି କହୁଛନ୍ତି ରାତି ୧୦ଟା ପର୍ଯ୍ୟନ୍ତ ମଦ ଦୋକାନ ଖୋଲା ରହୁଥିବାବେଳେ ମେଡ଼ିକାଲ ଷ୍ଟୋର ବନ୍ଦ ରହୁଛି। ଲୋକ ସାଧାରଣ ମେଡ଼ିସିନ କିଣିବାକୁ ଗଲେ ମେଡ଼ିକାଲ ଷ୍ଟୋର ବନ୍ଦ ଦେଖାଯାଉଛି। ଜୀବନ ବିନାଶକାରୀ ଦୋକାନ ଖୋଲା ରହୁଥିବାବେଳେ ଜୀବନ ରକ୍ଷାକାରୀ ଦୋକାନ ବନ୍ଦ ରହିବା ଦୁଃଖର କଥା। ମେଡ଼ିକାଲ ଷ୍ଟୋରଗୁଡ଼ିକ ଉପରେ ସ୍ଥାନୀୟ ରାଜନେତାମାନଙ୍କ ସହ ସରପଞ୍ଚ ଏବଂ ୱାର୍ଡ଼ମେମ୍ବରମାନଙ୍କର ଦୃଷ୍ଟି ପଡ଼ୁ ବୋଲି ସେ ଅଭିଯୋଗ କରିଛନ୍ତି। ପ୍ରକୃତରେ ଦେଖିବାକୁ ଗଲେ ନିତିଦିନ ସଂଖ୍ୟାଧିକ ଲୋକ ଏପରି ଘଟଣାର ସମ୍ମୁଖିନ ହୋଇ ନାନା ସମସ୍ୟା ଭୋଗୁଛନ୍ତି। ଏଥିପ୍ରତି ବଲାଙ୍ଗୀର ଜିଲା ଔଷଧ ନିରୀକ୍ଷକ (ଡ଼୍ରଗ ଇନ୍ସପେକ୍ଟର) ସ୍ବତନ୍ତ୍ର ଦୃଷ୍ଟି ଦେବାକୁ ସାଧାରଣରେ ଦାବି ହେଉଛି।
Dharitri – Odisha’s No.1 Odia Daily
