କୁତ୍ରା,୩୧ା୫(ଦେବାଶିଷ ସାହୁ): ସୁନ୍ଦରଗଡ଼ ଜିଲା କୁତ୍ରା ବ୍ଲକ ଅଧୀନ କଟଙ୍ଗଝରିଆ ଗ୍ରାମରେ ରବିବାର ଅଖିଳ ଭାରତୀୟ ରାଉତିଆ ସମାଜର ଏକ ରାଜ୍ୟସ୍ତରୀୟ ବୈଠକ ଅନୁଷ୍ଠିତ ହୋଇଯାଇଛି। ବୈଠକରେ ସମାଜର ବିଭିନ୍ନ ଜିଲାର ପଦାଧିକାରୀ ଏବଂ ସଦସ୍ୟମାନେ ଯୋଗଦେଇ ରାଉତିଆ ସମାଜକୁ ଅନୁସୂଚିତ ଜନଜାତି ମାନ୍ୟତା ପ୍ରଦାନ କରିବାକୁ ସରକାରଙ୍କ ନିକଟରେ ଦୃଢ଼ ଦାବି ଉଠାଇଥିଲେ।
ସମାଜ ସଂରକ୍ଷକ ସମ୍ଭୁନାଥ ସିଂଙ୍କ ଅଧ୍ୟକ୍ଷତାରେ ଆୟୋଜିତ ବୈଠକରେ ରାଜ୍ୟ ସମ୍ପାଦକ ପରମପାଲି ସିଂ, ସୁନ୍ଦରଗଡ଼ ଜିଲା ସଭାପତି ଶଙ୍କର ସିଂ, ଜିଲା ସମ୍ପାଦକ ପ୍ରକାଶ ସିଂ, ସମ୍ବଲପୁର ଜିଲା ସଭାପତି ଜୟନାଥ ସିଂ, ଦେବଗଡ଼ ଜିଲା ସଭାପତି ରାଜୁ ସିଂ, କମଲ ସିଂ, ବିଶ୍ୱନାଥ ସିଂ ପ୍ରମୁଖ ଉପସ୍ଥିତ ଥିଲେ।
ସଂଗଠନର ମନ୍ତ୍ରୀ ସୁଦର୍ଶନ ସିଂ ସଭା କାର୍ଯ୍ୟ ପରିଚାଳନା କରିଥିଲେ। ବୈଠକରେ ବକ୍ତାମାନେ କହିଥିଲେ ଯେ, ରାଉତିଆ ସମାଜ ଦୀର୍ଘ ଦିନ ଧରି ସାମାଜିକ, ଶିକ୍ଷାଗତ ଓ ଆର୍ଥିକ ଦୃଷ୍ଟିରୁ ପଛୁଆ ଅବସ୍ଥାରେ ରହିଛି। ସମାଜର ସର୍ବାଙ୍ଗୀନ ବିକାଶ ଓ ସରକାରୀ ସୁବିଧା ସୁଯୋଗ ପାଇବା ନିମନ୍ତେ ଅନୁସୂଚିତ ଜନଜାତି ମାନ୍ୟତା ଅତ୍ୟନ୍ତ ଆବଶ୍ୟକ ବୋଲି ସେମାନେ ମତ ପ୍ରକାଶ କରିଥିଲେ।
ସମାଜର ପ୍ରତିନିଧିମାନେ ଅଭିଯୋଗ କରିଥିଲେ ଯେ, ପୂର୍ବତନ ସରକାରଠାରୁ ଆରମ୍ଭ କରି ବର୍ତ୍ତମାନର ଭାଜପା ସରକାର ପର୍ଯ୍ୟନ୍ତ ବାରମ୍ବାର ଦାବି ଜଣାଇ ଆସୁଥିଲେ ମଧ୍ୟ ସରକାର ପକ୍ଷରୁ କୌଣସି ଠୋସ ପଦକ୍ଷେପ ଗ୍ରହଣ କରାଯାଇନାହିଁ। ଏଥିପ୍ରତି ସରକାର ଦୃଷ୍ଟି ଦେଇ ରାଉତିଆ ସମାଜର ଦୀର୍ଘଦିନର ଦାବି ପୂରଣ କରିବାକୁ ସେମାନେ ଆହ୍ବାନ ଜଣାଇଥିଲେ।
ବୈଠକ ଶେଷରେ ସମାଜର ସଂଗଠନକୁ ଆହୁରି ସୁଦୃଢ଼ କରିବା, ଜନଜାଗରଣ କାର୍ଯ୍ୟକ୍ରମ ଜୋରଦାର କରିବା ଏବଂ ଦାବି ପୂରଣ ନ ହେଲେ ଆଗାମୀ ଦିନରେ ଆନ୍ଦୋଳନାତ୍ମକ କାର୍ଯ୍ୟକ୍ରମ ଗ୍ରହଣ କରାଯିବ ବୋଲି ସଂକଳ୍ପ ନିଆଯାଇଥିଲା।
