କୁଜଙ୍ଗ,୩ା୧୨(ଡି.ଏନ୍.ଏ.): କୁଜଙ୍ଗ ବଜାରସ୍ଥିତ କଟକ-ପାରାଦୀପ ରାଜ୍ୟ ରାଜପଥ କଡ଼ରେ ଥିବା ଏକ ସ୍ଥାୟୀ ଯାତ୍ରୀ ବିଶ୍ରାମାଗାରକୁ ବ୍ଲକ ପ୍ରଶାସନ ପକ୍ଷରୁ ଭାଙ୍ଗି ଦିଆଯାଇ ଦୋକାନ ଘର ନିର୍ମାଣ କାମ ଆରମ୍ଭ ହୋଇଛି। ଏହାକୁ ସ୍ଥାନୀୟ ଲୋକେ ବିରୋଧ କରିଛନ୍ତି। ଏନେଇ ଶୁକ୍ରବାର ଜିଲାପାଳଙ୍କ ନିକଟରେ ଅଭିଯୋଗ କରାଯାଇ ପୁନର୍ବାର ବିଶ୍ରାମାଗାର ନିର୍ମାଣ କରିବାକୁ ଦାବି କରାଯାଇଛି। ସେମାନଙ୍କ ଅଭିଯୋଗ ଅନୁଯାୟୀ, ବସ୍ଯାତ୍ରୀମାନଙ୍କର ସୁବିଧା ନିମନ୍ତେ ୨୦୦୫ରେ ଲକ୍ଷାଧିକ ଟଙ୍କା ବ୍ୟୟ ଅଟକଳରେ ଏଠାରେ ଏକ ସ୍ଥାୟୀ ଯାତ୍ରୀ ବିଶ୍ରାମାଗାର ନିର୍ମାଣ କରାଯାଇଥିଲା। ତତ୍କାଳୀନ ପଞ୍ଚାୟତିରାଜ ମନ୍ତ୍ରୀ ଡାକ୍ତର ଦାମୋଦର ରାଉତ ଏହାର ଉଦ୍ଘାଟନ କରିଥିଲେ। ଜଗତ୍ସିଂହପୁର ଜିଲାର କୁଜଙ୍ଗ ଏକ ଗୁରୁତ୍ୱପୂର୍ଣ୍ଣ ପ୍ରଶାସନିକ କେନ୍ଦ୍ର ଓ ବାଣିଜ୍ୟ କେନ୍ଦ୍ର । ଏଠାରେ ତହସିଲ, ବ୍ଲକ୍, ଟ୍ରେଜେରି ଅଫିସ୍, ସବ୍ ରେଜିଷ୍ଟ୍ରାର ଅଫିସ୍, ଡାକ୍ତରଖାନା ସମେତ ୩୦ରୁ ଊର୍ଦ୍ଧ୍ୱ ସରକାରୀ କାର୍ଯ୍ୟାଳୟ ଓ ୧୦ରୁ ଊର୍ଦ୍ଧ୍ୱ ସ୍କୁଲ୍ କଲେଜ, ଅତିରିକ୍ତ ଜିଲା ଓ ଦୌରାଜଜ୍ଙ୍କ ଅଦାଲତ ସମେତ ୫ଟି ଅଦାଲତ କାର୍ଯ୍ୟ କରୁଛି। ଏହା ଉପରେ ଜଗତ୍ସିଂହପୁର ଜିଲା ସମେତ କେନ୍ଦ୍ରାପଡ଼ା ଜିଲାର ମାର୍ଶାଘାଇ, ଗରଦପୁର ଓ ମହାକାଳପଡ଼ା ବ୍ଲକର ବହୁ ଲୋକ ନିର୍ଭରଶୀଳ। ଖାଲି ସେତିକି ନୁହେଁ. ପୁରୀ ଜିଲାର ବହୁ ଅଧିବାସୀ କୁଜଙ୍ଗରୁ ଦୈନିକ ପାରାଦୀପ ଯାତାୟାତ କରନ୍ତି । ସେହିପରି କଟକ, ଭୁବନେଶ୍ୱର ସମେତ ଅନ୍ୟ ଅଞ୍ଚଳକୁ ମଧ୍ୟ ଏଠାରୁ ବସ୍ ଓ ଅନ୍ୟ ଯାତ୍ରୀବାହୀ ଯାନ ଆଦି ମିଳିଥାଏ। ଏନେଇ ଶୀତ, ଖରା, ବର୍ଷା ସମୟରେ ଯାତ୍ରୀମାନେ ଉକ୍ତ ବିଶ୍ରାମାଗାରକୁ ଆସି ଯାତ୍ରୀବାହୀ ଯାନକୁ ଅପେକ୍ଷା କରନ୍ତି। ମାତ୍ର ଉକ୍ତ ବିଶ୍ରାମାଗାରକୁ ଭାଙ୍ଗି କେଉଁ ଉଦ୍ଦେଶ୍ୟରେ ସେଠାରେ ଦୋକାନଗୃହ ନିର୍ମାଣ କରାଯାଉଛି ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି ବୋଲି ସାମାଜିକ କର୍ମୀ ତଥା ମାଟି ସୁରକ୍ଷା ମଞ୍ଚ ସଂଯୋଜକ ହୃଷୀକେଶ ନାଥ କୁହନ୍ତି। ପ୍ରଶାସନ ପକ୍ଷରୁ ସେଠାରେ ଜୋରଜବରଦସ୍ତ ଦୋକାନ ଘର ନିର୍ମାଣ କରାଯାଉଛି ବୋଲି ସେ ଅଭିଯୋଗ କରିଛନ୍ତି । ଏ ନେଇ ଜିଲାପାଳଙ୍କୁ ଅବଗତ କରାଯାଇଛି। ଜିଲାପାଳ ଏନେଇ କୌଣସି ପଦକ୍ଷେପ ନ ନେଲେ ଆଗାମୀ ଦିନରେ ଜୋରଦାର ଆନ୍ଦୋଳନ କରାଯିବା ସହ ନ୍ୟାୟାଳୟର ଆଶ୍ରୟ ନିଆଯିବ ବୋଲି ନାଥ ଚେତାବନୀ ଦେଇଛନ୍ତି।
ଏ ସମ୍ପର୍କରେ ବିଡିଓ ସୌମ୍ୟଶ୍ରୀ ପାଣିଗ୍ରାହୀ କହିଛନ୍ତି, କୁଜଙ୍ଗର ବିକାଶ କରିବା ପ୍ରଶାସନର ମୂଳ ଲକ୍ଷ୍ୟ । ଏବେ ବିଶ୍ରାମାଗାର ଭଙ୍ଗାଯାଇ ଦୋକାନ ଘର କରାଯାଉଛି। ପରବର୍ତ୍ତୀ ସମୟରେ କଟକ ଅଭିମୁଖେ ଯାଉଥିବା ଯାତ୍ରୀଙ୍କ ନିମନ୍ତେ ଅନ୍ୟ ଏକ ବିଶ୍ରାମାଗାର ନିର୍ମାଣ କରିବାକୁ ଯୋଜନା ରହିଛି। ମାତ୍ର ଉକ୍ତ ଯୋଜନା କେବେ କାର୍ଯ୍ୟକାରୀ ହେବ ସେନେଇ ସ୍ପଷ୍ଟ ସୂଚନା ଦିଆଯାଇ ନ ଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
