କେନ୍ଦୁଝର,୮ା୫(ସ୍ବ.ପ୍ର.): କେନ୍ଦୁଝର ଜିଲା ଯୋଡ଼ା ଖଣି ମଣ୍ଡଳ ଅଞ୍ଚଳରେ ବହୁ ବର୍ଷ ଧରି ବିଭିନ୍ନ କ୍ରଶର ଏବଂ ରେଲବାଇ ସାଇଡିଂରେ ଗଚ୍ଛିତ ଥିବା ଲୁହାପଥର ବିକ୍ରି ପାଇଁ ଖଣି ବିଭାଗ ତପତ୍ରତା ଦେଖାଇଛି। ଖଣିଜ ପଥର ଚୋରି ହୋଇ ଯାଉଥିବାରୁ ସରକାରଙ୍କ ବ୍ୟାପକ ରାଜସ୍ବ ହାନି ଘଟୁଛି। କମ୍ପାନୀଗୁଡ଼ିକ ଖଣି ବିଭାଗ ନିକଟରେ ଗଚ୍ଛିତ ଲୁହାପଥର ଗୁଣ୍ଡ ଚାଲାଣ କରିବା ପାଇଁ ଆବେଦନ କରୁଛନ୍ତି। ଏହାର ଚାଲାଣ ପାଇଁ ଖଣି ବିଭାଗ ପକ୍ଷରୁ ଅନୁମତି ପ୍ରଦାନ ନେଇ ପଦକ୍ଷେପକୁ ସାଧାରଣରେ ସ୍ବାଗତ କରାଯାଇଛି। ମାତ୍ର ଅନୁମତି ଦେବା ପୂର୍ବରୁ ଖଣିଜର ଠିକ୍ ଷ୍ଟକ ଯାଞ୍ଚ କରିବାକୁ ପୂର୍ବତନ ବିଧାୟକ ସୁବର୍ଣ୍ଣ ନାୟକ ଦାବି କରିଛନ୍ତି।
ସୂଚନାଯୋଗ୍ୟ, ଖଣି ମହାଦୁର୍ନୀତି ସମୟରେ ହିସାବୁରୁ ରେଲବାଇ ସାଇଡିଂରୁ ବ୍ୟାପକ ଖଣି ଚୋରା କାରବାର ହୋଇଥିଲା। ତେବେ ଉକ୍ତ ସାଇଡିଂକୁ ଭିଜିଲାନ୍ସ ବିଭାଗ ତଦନ୍ତ ପରିସରଭୁକ୍ତ କରି ନ ଥିଲା। ଲୁହାପଥର ଗୁଣ୍ଡ ମହାଦୁର୍ନୀତିର ଖୋଳତାଡ଼ ସମୟରୁ ଅର୍ଥାତ୍ ୨୦୦୯ ପରଠାରୁ ଚାଲାଣ ନ ହୋଇପାରି ପଡ଼ିରହିଛି। ଲୁହାପଥର ଗୁଣ୍ଡର ଜଗାରଖା ରେଳ ମନ୍ତ୍ରଣାଳୟ କରିଆସୁଥିଲେ ହେଁ ବିଭିନ୍ନ ସମୟରେ ଚୋରି ହୋଇଯାଉଛି। ଏବେ ଲୁହାପଥର ଚାଲାଣ ନେଇ ଖଣି ବିଭାଗ ଅନୁମତି ପ୍ରଦାନ ନେଇ ତତ୍ପରତା ଦେଖାଇଛି। ନିୟମ ଅନୁସାରେ ଖଣି ବିଭାଗ ମହଜୁଦକାରୀଙ୍କ ରିଟର୍ଣ୍ଣ, ଷ୍ଟକ୍ ରେଜିଷ୍ଟର, ଯାହାଠାରୁ କିଣିଛନ୍ତି ତାହାର ସେଲ୍ ଇନଭଏସ ସହ ମହଜୁଦକାରୀ କେଉଁ ଖଣିରୁ ଲୁହାପଥର ଆଣିଛନ୍ତି ଏବଂ କେତେ ବିକ୍ରି କରିଛନ୍ତି, ତାହାର ହିସାବ ଯାଞ୍ଚ କରିବା କଥା। କାଗଜପତ୍ର ଠିକ୍ ଥିଲେ ମହଜୁଦକାରୀଙ୍କୁ ବିକ୍ରି ପାଇଁ ଅନୁମତି ମିଳିଥାଏ। ଅନିୟମିତତା ଜଣାପଡ଼ିଲେ ଖଣି ବିଭାଗ ଲୁହାପଥର ଜବତ କରି ଓଡ଼ିଶା ଖଣି ନିଗମ ଦ୍ୱାରା ନିଲାମ କରିବ। ଉକ୍ତ ନୀତିନିୟମ ପାଳନ ହେଉଛି କି ନାହିଁ ଏବଂ ଚାଲାଣ ଅନୁମତି ପୂର୍ବରୁ ଯାଞ୍ଚ ହେବା ଜରୁରୀ ବୋଲି ପୂର୍ବତନ ବିଧାୟକ ନାୟକ କହିଛନ୍ତି। ଏ ନେଇ ଯୋଡ଼ା ଖଣି ଉପନିର୍ଦ୍ଦେଶକ ଦିନେଶ ଅଗ୍ରୱାଲ କହିଛନ୍ତି, ଏକ କମ୍ପାନୀ ବହୁ ଗୁଣ୍ଡ ଚାଲାଣ ପାଇଁ ଆଗରୁ ଆବେଦନ କରିଥିଲା। ତାଙ୍କର ଷ୍ଟକ୍ ଯାଞ୍ଚ କରି ତାଙ୍କଠାରୁ କମ୍ପାଣ୍ଡିଂ କରି ୫ ଲକ୍ଷ ଟଙ୍କା ଫାଇନ ଆଦାୟ ପରେ ଅନୁମତି ଦିଆଯାଇଛି। ଏଥିସହ ସବୁ ଗଚ୍ଛିତ ଲୁହାପଥର ଷ୍ଟକ୍ ଯାଞ୍ଚ କରାଯାଉଛି।
ଖଣି ବିଭାଗ ରିପୋର୍ଟ ଅନୁଯାୟୀ, ଜୁରୁଡ଼ି ରେଲ ସାଇଡିଂରେ ୬୫ ହଜାର ମେଟ୍ରିକ ଟନ୍, ବିଲକୁଣ୍ଡି ରେଳ ସାଇଡିଂରେ ୮ ହଜାର ମେଟ୍ରିକ ଟନ୍, ହିସାବୁର ରେଳ ସାଇଡିଂରେ ୪ ହଜାର ମେଟ୍ରିକ ଟନ୍, ବାଂଶପାଣି ରେଳ ସାଇଡିଂରେ ୬୨ ହଜାର ମେଟ୍ରିକ ଟନ୍, ବଲାଣି ରେଳ ସାଇଡିଂରେ ୧ ହଜାର ମେଟ୍ରିକ ଟନ୍ ଏବଂ ବଡ଼ବିଲ ରେଳ ସାଇଡିଂରେ ୧୬ ହଜାର ମେଟ୍ରିକ ଟନ୍ ଲୁହାପଥର ଷ୍ଟକ୍ ରହିଛି।
