ଛତ୍ରପୁର,୬ା୯(ଦିଲ୍ଲୀପ ସାମଲ/ଦ୍ଵାରକା ପଟ୍ଟନାୟକ) : ଗଞ୍ଜାମ ଜିଲା ସଦର ମହକୁମା ଛତ୍ରପୁର ଉପଖଣ୍ଡ ଚିକିତ୍ସାଳୟ ଉପରେ ଦୈନିକ ଶତାଧିକ ରୋଗୀ ନିର୍ଭର କରନ୍ତି । ପର୍ଯ୍ୟାପ୍ତ ସଂଖ୍ୟକ ଡାକ୍ତର ନିଯୁକ୍ତି, ଆଇସିୟୁ ସେବା, ଟ୍ରମା କେୟାର କେନ୍ଦ୍ର ଭଳି ଅତ୍ୟାବଶ୍ୟକ ସେବା ଉପଲବ୍ଧ ନଥିବାରୁ ଯେକୌଣସି ରୋଗୀଙ୍କ ସ୍ୱାସ୍ଥ୍ୟବସ୍ଥା ଗୁରୁତର ଥିବା ବେଳେ ଉନ୍ନତମାନର ଚିକିତ୍ସା ପାଇଁ ବ୍ରହ୍ମପୁର ବଡ଼ମେଡିକାଲ କିମ୍ବା ଭୁବନେଶ୍ଵରର ଡାକ୍ତରଖାନାକୁ ସ୍ଥାନାନ୍ତରିତ କରିବାକୁ ଆବଶ୍ୟକ ପଡ଼ିଥାଏ।
ଛତ୍ରପୁର ଉପଖଣ୍ଡ ଚିକିତ୍ସାଳୟ ଅଧିକ୍ଷକ ଡଃ ଅଲେଖ ପ୍ରଧାନଙ୍କ କହିବା ଅନୁଯାୟୀ, ଚିକିତ୍ସାଳୟର ନବୀକରଣ ପରେ ଅନେକ ପ୍ରକାରର ଆବଶ୍ୟକ ସୁବିଧା ଉପଲବ୍ଧ ହୋଇଛି । ମୋଟ ୫୧ଟି ଡାକ୍ତର ପଦବୀ ମଞ୍ଜୁରୀ ମିଳିଥିବା ବେଳେ କେବଳ ୧୦ଟି ଡାକ୍ତର ରୋଗୀଙ୍କ ଚିକିତ୍ସାରେ ନିଯୁକ୍ତ ରହିଛନ୍ତି ବୋଲି ଅଧିକ୍ଷକ କହିଛନ୍ତି। ସେହିପରି ନର୍ସିଂ ସେବା ପ୍ରଦାନ କରିବା ପାଇଁ ବି ମାତ୍ର ୧୦ ଜଣ ନିଯୁକ୍ତ ଅଛନ୍ତି। ଛତ୍ରପୁର ଉପଖଣ୍ଡ ଗଞ୍ଜାମ ଜିଲା ସହ ପୁରୀ ଜିଲାର କୃଷ୍ଣପ୍ରସାଦ ବ୍ଲକ ସହିତ ସଂଲଗ୍ନ ରହିଛି । କୃଷ୍ଣପ୍ରସାଦ ବ୍ଲକ ଅଞ୍ଚଳର ଲୋକେ ରୋଗୀଙ୍କୁ ଜରୁରୀକାଳୀନ ସ୍ୱାସ୍ଥ୍ୟ ସେବା ପାଇଁ ଚିଲିକା ହ୍ରଦ ପାର କରି ପୁରୀ ଜିଲା ମୁଖ୍ଯ ଚିକିତ୍ସାଳୟ କିମ୍ବା ଭୁବନେଶ୍ବରକୁ ନେବା ପରିବର୍ତ୍ତେ ବ୍ରହ୍ମପୁର ବଡ଼ମେଡିକାଲକୁ ନେଇ ଯାଉଛନ୍ତି । ଛତ୍ରପୁର ଉପଖଣ୍ଡ ଚିକିତ୍ସାଳୟ ନିକଟତର ହୋଇଥିଲେ ମଧ୍ୟ ଏଇଠି ଉଚ୍ଚମାନର ସ୍ୱାସ୍ଥ୍ୟ ସେବା ପାଇବାରେ ବଞ୍ଚିତ ହେଉଛନ୍ତି।
ପ୍ରାକ୍ତନ ବିଧାୟକ ଅଶୋକ ଚୌଧୁରୀ ଜନସାଧାରଣମାନେ ଉପଭୋଗ କରୁଥିବା ବିଭିନ୍ନ ସମସ୍ୟା ସମ୍ପର୍କରେ ଆଲୋକପାତ କରିଛନ୍ତି। ଛତ୍ରପୁର ଉପଖଣ୍ଡ ଚିକିତ୍ସାଳୟରେ ଆଇସିୟୁ ଏବଂ ଟ୍ରମା କେୟାର ଭଳି ଅତ୍ୟାବଶ୍ୟକୀୟ ସେବା ଯୋଗାଇଦେବା ଅତ୍ୟନ୍ତ ଜରୁରୀ ରହିଛି । ଚିକିତ୍ସାଳୟ ପରିସରରେ କେବଳ ୪ଟି ସ୍ଵତନ୍ତ୍ର କକ୍ଷ ଅଛି। ଏହାର ମରାମତି କାର୍ଯ୍ୟ କରିବା ଏବଂ କକ୍ଷ ସଂଖ୍ୟା ବୃଦ୍ଧି କରିବା ଉପରେ ମଧ୍ଯ ଧ୍ୟାନ ଦେବା ପାଇଁ ସେ ପରାମର୍ଶ ଦେଇଛନ୍ତି। ସହର ମଝିରେ ଥିବା ପୁରୁଣା ତହସିଲ କାର୍ଯ୍ଯାଳୟ ଜମି ଚିକିତ୍ସାଳୟକୁ ହସ୍ତାନ୍ତର କରାଗଲେ ପରିସରର କ୍ଷେତ୍ରଫଳରେ ବୃଦ୍ଧି ହେବ ବୋଲି ସେ ମତ ଦେଇଛନ୍ତି।
ସହରର ବରିଷ୍ଠ ଆଇନଜୀବୀ ରାଜେନ୍ଦ୍ର ଦାଶ କହିଛନ୍ତି ଯେ, ସମଗ୍ର ରାଜ୍ୟରେ ୩୦ଟି ଜିଲା ମଧ୍ୟରୁ ଗଞ୍ଜାମ ଜିଲା ଏକମାତ୍ର ଜିଲା ଯେଉଁଠାରେ ଜିଲା ସଦର ମହକୁମା ଚିକିତ୍ସାଳୟ ନାହିଁ ବରଂ ତାହା ବ୍ରହ୍ମପୁର ଠାରେ ସିଟି ହସ୍ପିଟାଲ ଭାବେ ପରିଚିତ ଅଛି । ମାତୃ ଓ ଶିଶୁ ଯତ୍ନ କେନ୍ଦ୍ର ଅତି ଗୁରୁତ୍ୱପୂର୍ଣ୍ଣ ବିଭାଗ ଏବଂ ଏହାକୁ ତୁରନ୍ତ କାର୍ଯ୍ୟକାରୀ କରାଯିବା ଉଚିତ ବୋଲି ସେ ମତ ବ୍ୟକ୍ତ କରିଛନ୍ତି।
ବିଶିଷ୍ଠ ଶିକ୍ଷାବିତ୍ ତଥା ଆଇନଜୀବୀ ରଞ୍ଜନ ମହାପାତ୍ର ଉପଖଣ୍ଡ ଚିକିତ୍ସାଳୟ ପରିପ୍ରେକ୍ଷୀରେ ସହର ବାସୀଙ୍କ ଦିର୍ଘଦିନର ଦାବି ଉପରେ ଦୃଷ୍ଟି ଆକର୍ଷଣ କରିଛନ୍ତି। ବ୍ରହ୍ମପୁର ସାଂସଦ ଡ. ପ୍ରଦୀପ କୁମାର ପାଣିଗ୍ରାହୀ ଏବଂ ଛତ୍ରପୁର ବିଧାୟକ କୃଷ୍ଣ ଚନ୍ଦ୍ର ନାୟକ ସରକାରୀ ଦଳର ହୋଇଥିବାରୁ ସେ ଉଭୟଙ୍କୁ ଅନୁରୋଧ କରିଛନ୍ତି ଯେ ଏହି ଚିକିତ୍ସାଳୟର ମାନ୍ୟତା ବୃଦ୍ଧି କରିବା ଉପରେ ଗୁରୁତ୍ଵ ଦିଅନ୍ତୁ। ଏହା ଜନସାଧାରଣଙ୍କ ବହୁ ମାତ୍ରାରେ କଲ୍ୟାଣକାରୀ କାର୍ଯ୍ୟ ହୋଇପାରିବ ବୋଲି ଆଶା ପ୍ରକାଶ କରିଛନ୍ତି।
ଯଦି ମାନବସମ୍ବଳ ବୃଦ୍ଧି କରିବା କ୍ଷେତ୍ରରେ ଯଥା ଆବଶ୍ୟକ ଅନୁଯାୟୀ ଡାକ୍ତର ଓ ନର୍ସଙ୍କ ନିଯୁକ୍ତି ହୁଏ, ତା ହେଲେ ସ୍ୱାସ୍ଥ୍ୟସେବା ସେବା ପ୍ରଦାନ କ୍ଷେତ୍ରରେ ଛତ୍ରପୁର ଉପଖଣ୍ଡ ଚିକିତ୍ସାଳୟ ରାଜ୍ୟର ଉନ୍ନତମାନ ଚିକିତ୍ସାଳୟ ମଧ୍ୟରେ ଗଣାଯାଇପରିବ ବୋଲି ଅଧିକ୍ଷକ ଡଃ ଅଲେଖ ପ୍ରଧାନ ଦୃଢ଼ ବିଶ୍ବାସ ରଖିଛନ୍ତି।
