ନୂଆଦିଲ୍ଲୀ,୨୦।୧୧: ଅନୈତିକ ସମ୍ପର୍କକୁ ଲୁଚାଇବା ପାଇଁ ଦିଲ୍ଲୀରେ ଜଣେ ବ୍ୟକ୍ତି ତାଙ୍କ ସ୍ତ୍ରୀଙ୍କୁ ଯୋଜନାବଦ୍ଧ ଭାବେ ହତ୍ୟା କରିଛନ୍ତି। ଅଭିଯୁକ୍ତ ନବୀନ ଗୁଲେରିଆ ଓ ଦୁଇ ଜଣ କଣ୍ଟ୍ରାକ୍ଟ କିଲର (ସୋନୁ ଓ ରାହୁଲ)ଙ୍କୁ ଗିରଫ କରାଯାଇଥିବା ଦିଲ୍ଲୀର ମାଲଭିୟା ନଗର ଥାନା ପକ୍ଷରୁ ଗୁରୁବାର କୁହାଯାଇଛି।
ଦମ୍ପତିଙ୍କ ପୁଅକୁ ୪ଟା ୩୦ରେ ଘରେ ଛାଡ଼ିବାକୁ ଯାଇଥିବା ଅଭିଯୁକ୍ତଙ୍କ ଜଣେ କର୍ମଚାରୀ ପ୍ରଥମେ ରକ୍ତ ଜୁଡୁବୁଡ଼ୁ ଅବସ୍ଥାରେ ଦେଖିଥିଲେ ମାଲିକିଆଣିଙ୍କ ମୃତଦେହ। ତାଙ୍କ ପାଖରୁ ଖବର ପାଇ ମୃତଦେହକୁ ଧରି ଅଭିଯୁକ୍ତ ପହଞ୍ଚିଥିଲେ ହସ୍ପିଟାଲରେ। ସେଠାରେ ମହିଳାଙ୍କୁ ଡାକ୍ତର ମୃତ ଘୋଷଣା କରିବା ପରେ ପୋଲିସ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇଥିଲା। ବ୍ୟବଚ୍ଛେଦରୁ ଜଣାପଡ଼ିଥିଲା ଯେ, ମହିଳାଙ୍କୁ ୧୬ରୁ ୧୭ ଥର ଛୁରା ମାଡ଼ କରି ହତ୍ୟା କରାଯାଇଛି।
ତଦନ୍ତ ବେଳେ ପୋଲିସକୁ ମିଳିଥିଲା ଏକ ସିସିଟିଭି ଫୁଟେଜ। ସେଥିରେ ୨ ଜଣ ଲୋକ ଘରକୁ ଭିତରକୁ ଯାଉଥିବା ବେଳେ ୩ ଜଣ ଲୋକ ଘରୁ ବାହାରୁଥିବା ଦେଖିବାକୁ ମିଳିଥିଲା। ମୃତ ମହିଳାଙ୍କ ସ୍ବାମୀ ଫୋନ ଚେକ୍ କରିବାରୁ ଗୋବିନ୍ଦପୁରୀ ଅଞ୍ଚଳରେ ରହୁଥିବା ଜଣେ ମହିଳାଙ୍କ ସହ ତାଙ୍କର ଅନୈତିକ ସମ୍ପର୍କରେ ଥିବା ଜଣାପଡ଼ିଥିଲା। ଆଉ ଘଟଣା ଦିନ ସେମାନେ ଅନେକ ଥର କଥାବର୍ତ୍ତା ହୋଇଥିଲେ। ଅଭିଯୁକ୍ତଙ୍କ ଦୁଇ ଚକିଆ ଯାନରୁ ୫୦ ହଜାର ଟଙ୍କା ଓ ଏକ ମୋବାଇଲ ମିଳିଥିଲା। ସେହି ଫୋନ ଯୋଗେ ଅଭିଯୁକ୍ତ କଣ୍ଟ୍ରାକ୍ଟ କିଲରଙ୍କ ସହ ଯୋଗାଯୋଗ କରିଥିଲେ।
ପଚରାଉଚରା ବେଳେ ଅଭିଯୁକ୍ତ କହିଥିଲେ, ଅନ୍ୟ ଜଣେ ମହିଳାଙ୍କ ସହ ସେ ସମ୍ପର୍କ ରଖିଥିଲେ। ୪ ମାସ ତଳେ ଏ ବିଷୟରେ ଜଣିବା ପରେ ସ୍ତ୍ରୀ ସର୍ବଦା ସନ୍ଦେହ କରୁଥିଲେ। ଏଥିଯୋଗୁ ସେ ସ୍ତ୍ରୀଙ୍କୁ ହତ୍ୟା କରିବାକୁ ଯୋଜନା କରିଥିଲେ ବୋଲି ପୋଲିସ ପକ୍ଷରୁ କୁହାଯାଇଛି।
