ଯାଜପୁର ଟାଉନ/ବରୀ, ୧୨ା୮(ଡି.ଏନ.ଏ.): ନକଲି ସିମ୍ କାର୍ଡ ବିକ୍ରି ଅଭିଯୋଗରେ ଯାଜପୁର ଜିଲା ବରୀ ରାମଚନ୍ଦ୍ରପୁର ଥାନା ଅଧୀନ ଭୁରୁଙ୍ଗା ଗ୍ରାମର ପ୍ରୀତମ୍ କର(୩୦)ଙ୍କୁ ମଙ୍ଗଳବାର ଦିଲ୍ଲୀ ପୋଲିସ ଗିରଫ କରିଥିଲା। ବୁଧବାର ତାଙ୍କୁ ଯାଜପୁର ସିଜେଏମ୍ କୋର୍ଟରେ ହାଜର କରିବା ପରେ ଟ୍ରାନ୍ଜିଟ୍ ରିମାଣ୍ଡରେ ନେଇଛି।
ସୂଚନା ଅନୁସାରେ, ପ୍ରୀତମ୍ କୋଲକାତା ଅଞ୍ଚଳରୁ ନକଲି କାଗଜପତ୍ର ଦେଇ ସିମ୍ କାର୍ଡ ଆଣୁଥିଲେ। ତାହାକୁ ଦିଲ୍ଲୀ, ରାଜସ୍ଥାନ, ପଞ୍ଜାବ, ହରିୟାଣା, ଉତ୍ତରପ୍ରଦେଶ ଆଦି ବିଭିନ୍ନ ଅଞ୍ଚଳର ସାଇବର ଠକମାନଙ୍କୁ ବିକ୍ରି କରୁଥିଲେ। ଏହି ସିମ୍ କିଣିବା ପରେ ସାଇବର ଠକମାନେ ବିଭିନ୍ନ ଲୋକଙ୍କଠାରୁ କୋଟିକୋଟି ଟଙ୍କା ଠକି ନେଉଥିଲେ। ପ୍ରୀତମ୍ ମଧ୍ୟ ଲକ୍ଷାଧିକ ଟଙ୍କା ରୋଜଗାର କରିବାରେ ସକ୍ଷମ ହୋଇଛନ୍ତି। ପ୍ରୀତମ୍ଙ୍କ ସହ ଦିଲ୍ଲୀର କେତେଜଣ ଯୁବକ ମଧ୍ୟ ଏହି କାର୍ଯ୍ୟରେ ନିୟୋଜିତ ଅଛନ୍ତି। ସେମାନଙ୍କ ମଧ୍ୟରୁ ଜଣେ ଗିରଫ ହୋଇଛନ୍ତି। ସେହି ଯୁବକଙ୍କୁ ଧରି ଦିଲ୍ଲୀ ପୋଲିସ ବରୀ ପୋଲିସ ସହାୟତାରେ ପ୍ରୀତମ୍ଙ୍କ ଘରେ ପହଞ୍ଚତ୍ଥିଲା। ଏହି ସିମ୍ ବିକ୍ରିରେ ବାଲେଶ୍ୱର ଅଞ୍ଚଳର ଜଣେ ଯୁବକ ମଧ୍ୟ ସମ୍ପୃକ୍ତ ଥିବା ଜଣାପଡ଼ିଛି। ତେବେ ସେ ଏବେ ଶଯ୍ୟାଶାୟୀ ହୋଇପଡ଼ିଥିବାରୁ ତାଙ୍କୁ ଦିଲ୍ଲୀ ପୋଲିସ ନୋଟିସ୍ କରିଛି। ସେହିପରି ଏହି ନକଲି ସିମ୍ ବିକ୍ରିରେ ରାଜ୍ୟର ବହୁ ଯୁବକ ସାମିଲ ଅଛନ୍ତି। ସେମାନଙ୍କ ଉପରେ ପୋଲିସ କଡ଼ା ନଜର ରଖିଛି ବୋଲି ସାଲିମାରବାଗ୍ ଥାନା ସବ୍ଇନ୍ସପେକ୍ଟର ହିମାଂଶୁ ବଲଙ୍ଗା ସୂଚନା ଦେଇଛନ୍ତି। ନକଲି ସିମ୍ କାର୍ଡରେ ଠକେଇ ହେଉଥିବା ନେଇ ସାଲିମାର୍ବାଗ୍ ଥାନାରେ ଅଭିଯୋଗ ହୋଇଥିଲା। ପୋଲିସ ଦଫା ୪୨୦/୪୬୮/୪୭୧/୩୪ ଆଇପିସିରେ ଏକ ମାମଲା ନଂ.୬୪୧/୨୧ ରୁଜୁ କରି ତଦନ୍ତ ଚଳାଇଥିଲା। ତଦନ୍ତବେଳେ ସିମ୍ କାର୍ଡ ଠକେଇରେ ପ୍ରୀତମ୍ଙ୍କ ଲିଙ୍କ୍ ଥିବା ଦିଲ୍ଲୀ ପୋଲିସ ଜାଣିବାକୁ ପାଇଥିଲା।
