ନୂଆଦିଲ୍ଲୀ,୫।୯: ଦିଲ୍ଲୀରେ ଆମ ଆଦମୀ ପାର୍ଟି(ଏଏପି) ଓ ଉପରାଜ୍ୟପାଳ ମଧ୍ୟରେ ଜାରି ରହିଥିବା ବିବାଦ ବର୍ତ୍ତମାନ ଏକ ଆଇନଗତ ନୋଟିସରେ ପହଞ୍ଚିଛି। ନିକଟରେ ଦିଲ୍ଲୀରେ ଏହାକୁ ନେଇ ରାଜନୈତିକ ଉତ୍ତେଜନା ଦେଖାଦେଇଥିବା ବେଳେ ସୋମବାର ଆଉ ଏକ ଘଟଣା ସାମ୍ନାକୁ ଆସିଛି। ଦିଲ୍ଲୀ ଉପରାଜ୍ୟପାଳ ବିନୟ କୁମାର ସକ୍ସେନା ଏଏପିର ନେତାମାନଙ୍କୁ ସୋମବାର ଏକ ଆଇନଗତ ନୋଟିସ ପଠାଇଛନ୍ତି। ଉକ୍ତ ନୋଟିସ୍ରେ ସେମାନଙ୍କୁ ୪୮ଘଣ୍ଟା ମଧ୍ୟରେ ଜବାବ ରଖିବାକୁ ନିର୍ଦ୍ଦେଶ ଦିଆଯାଇଛି। ନଚେତ୍ ସେମାନଙ୍କ ଉପରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏଏପି ନେତା ଅତିିଶୀ, ସୌରଭ ଭରଦ୍ୱାଜ, ଦୁର୍ଗେଶ ପାଠକ, ସଞ୍ଜୟ ସିଂ ଏବଂ ଜଶ୍ମିନ ଶାହାଙ୍କୁ ଏହି ଆଇନଗତ ନୋଟିସ୍ ପଠାଯାଇଛି। ଏହି ନେତାମାନେ ଉପରାଜ୍ୟପାଳଙ୍କ ଉପରେ ୧୪ଶହ କୋଟି ଟଙ୍କା ଠକେଇ କରିଥିବା ଅଭିଯୋଗ କରିଥିଲେ। ଏଏପି ନେତାମାନେ ଅଭିଯୋଗ କରିଛନ୍ତି ଯେ, ଖଦିି ଗ୍ରାମ ଉଦ୍ୟୋଗର ଚେୟାରମେନ ଥିବା ବେଳେ ବିନୟ ସକ୍ସେନା ବିମୁଦ୍ରୀକରଣ ସମୟରେ ନୋଟ ବଦଳାଇବା ଦୁର୍ନୀତି କରିଥିଲେ।
