ନୂଆଦିଲ୍ଲୀ,୪ ।୯: କରୋନା ସମୟରେ ଦିଲ୍ଲୀର ଶିକ୍ଷକମାନେ ଗୁରୁତ୍ୱପୂର୍ଣ୍ଣ ଭୂମିକା ତୁଲାଇଛନ୍ତି । ଏବେ ଏଭଳି କେତେଜଣ ଶିକ୍ଷକଙ୍କୁ ଦିଲ୍ଲୀ ସରକାର ସମ୍ମାନୀତ କରିବାକୁ ଯାଉଛନ୍ତି । ଦିଲ୍ଲୀର ଉପ ମୁଖ୍ୟମନ୍ତ୍ରୀ ମନିଷ ସିସୋଡିଆ ଏହା ଘୋଷଣା କରିଛନ୍ତି । ସିସୋଡିଆ କହିଛନ୍ତି କରୋନା ସମୟରେ ଶିକ୍ଷକମାନେ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇଛନ୍ତି । କ୍ୱାରାଣ୍ଟାଇନ ସେଣ୍ଟରରେ ଡ୍ୟୁଟି କରିବା ସହ ସ୍କୁଲରେ ରାଶନ ବାଣ୍ଟିବା, ଟିକା ଲଗାଇବାରେ ସାହାଯ୍ୟ କରିବା, ଇନଫୋର୍ସମେଣ୍ଟ ସବୁକାମ ଶିକ୍ଷକମାନେ କରିଛନ୍ତି । କେବଳ ଏତିକି ନୁହେଁ ଯେଉଁମାନେ କରୋନା ସମୟରେ ଅନ୍ଲାଇନ୍ କ୍ଲାସ ବି କରିଛନ୍ତି । ଶିକ୍ଷକମାନେ ମନଦେଇ ପିଲାଙ୍କ୍ୁ ଦିଲ୍ଲୀ ବାହାରକୁ ଯିବାକୁ ଦେଇ ନାହାଁନ୍ତି । ଅନଲାଇନ୍ କ୍ଲାସ ନବା ସହ ଯେଉଁ ପିଲାଙ୍କର ଅର୍ଥର ଅଭାବ ରହିଛି ସେମାନଙ୍କ ମୋବାଇଲ ବି ରିଚାର୍ଜ କରିଛନ୍ତି ଏହି ଶିକ୍ଷକ । ତେଣୁ ଚଳିତ ବର୍ଷ ଯେଉଁ ଶିକ୍ଷକ ସମ୍ମାନ ହେବ ତାହା ସବୁଠାରୁ ଅଲଗା ହେବ । କେବଳ ସରକାରୀ ନୁହେଁ ବେସରକାରୀ ସ୍କୁଲର ଶିକ୍ଷକ ତଥା ଅତିଥି ଶିକ୍ଷକଙ୍କୁ ବି ଏଥିରେ ସାମିଲ କରାଯାଇଥିବା ସିସୋଡିଆ କହିଛନ୍ତି । ପୂର୍ବରୁ ୧୫ ବର୍ଷର ଅନୁଭବ ଥିବା ଶିକ୍ଷକଙ୍କୁ ସମ୍ମାନୀତ କରାଯାଉଥିବା ବେଳେ ଏବେ ଏହାକୁ କମାଇ ୩ ବର୍ଷ କରି ଦିଆଯାଇଛି । ସୂଚନାଯୋଗ୍ୟ, ରବିବାର ଗୁରୁଦିବସ ପଡୁଥିବା ବେଳେ ଏହା ପୂର୍ବରୁ ଦିଲ୍ଲୀ ସରକାର ଏଭଳି ଘୋଷଣା କରିଛନ୍ତି ।
