ମୁମ୍ବାଇ,୫।୫: ସ୍ଥାନୀୟ ବ୍ରାବୋର୍ନ ଷ୍ଟାଡିୟମରେ ଗୁରୁବାର ଖେଳାଯାଇଥିବା ଏକ ହାଇ ସ୍କୋରିଂ ମ୍ୟାଚ୍ରେ ଦିଲ୍ଲୀ କ୍ୟାପିଟାଲ୍ସ ୨୧ ରନ୍ରେ ସନ୍ରାଇଜର୍ସ ହାଇଦ୍ରାବାଦ୍କୁ ହରାଇ ଦେଇଛି। ଓପନର ଡେଭିଡ୍ ଓ୍ବାର୍ନର (୯୨*) ଏବଂ ରୋଭମାନ ପାଓ୍ବେଲ(୬୭*)ଙ୍କ ଅପରାଜିତ ଅର୍ଦ୍ଧଶତକ ଯୋଗୁ ଦିଲ୍ଲୀ କ୍ୟାପିଟାଲ୍ସ ୨୦ ଓଭରରେ ୩ ଉଇକେଟ ହରାଇ ୨୦୭ ରନ୍ କରିଥିଲା। ଜବାବରେ ହାଇଦ୍ରାବାଦ୍ ୨୦ ଓଭରରେ ୮ ଉଇକେଟ ହରାଇ ୧୮୬ ରନ୍ କରିବାକୁ ସକ୍ଷମ ହୋଇଥିଲା। ଏହି ବିଜୟ ଯୋଗୁ ୧୦ ପଏଣ୍ଟ ସହ ଦିଲ୍ଲୀ ପଏଣ୍ଟ ତାଲିକାରେ ୫ମ ସ୍ଥାନକୁ ଉଠିଛି। ଅନ୍ୟପକ୍ଷରେ କ୍ରମାଗତ ତୃତୀୟ ପରାଜୟ ବରଣ କରିଛି ହାଇଦ୍ରାବାଦ୍।
ଟସ୍ ଜିତି କେନ ଓ୍ବିଲିୟମସନଙ୍କ ବୋଲିଂ ନିଷ୍ପତ୍ତିକୁ ପ୍ରଥମ ଓଭରରେ ସଠିକ୍ ପ୍ରମାଣ କରିଥିଲେ ଭୁବନେଶ୍ୱର କୁମାର। ସେ ପ୍ରଥମ ଓଭରରେ ବିନା କୌଣସି ରନ୍ ଦେଇ ମନଦୀପ ସିଂ(୦)ଙ୍କୁ ଆଉଟ୍ କରିଥିଲେ। ତାଙ୍କ ପଛକୁ ମିଚେଲ ମାର୍ଶ (୧୦) ମଧ୍ୟ ଶୀଘ୍ର ଆଉଟ୍ ହୋଇଥିଲେ। ୩ୟ କ୍ରମରେ ବ୍ୟାଟିଂ ଆସିଥିବା ଅଧିନାୟକ ରିଷଭ ପନ୍ତ ୩ ଛକା ଓ ୧ ଚୌକା ସହାୟତାରେ ୨୬ ରନ୍ କରି ଆଉଟ୍ ହୋଇଥିଲେ। ତା’ ପରେ ଓପନର ଓ୍ବାର୍ନରଙ୍କ ସହ ପାଓ୍ବେଲ ମିଶି ଦଳୀୟ ସ୍ଥିତି ସମ୍ଭାଳିଥିଲେ। ଦୁହେଁ ଚତୁର୍ଥ ଉଇକେଟ ପାଇଁ ୧୧ ଓଭରରେ ୧୨୨ ରନ୍ ଯୋଡ଼ିଥିଲେ। ଓ୍ବାର୍ନର ୫୮ ବଲରେ ୯୨ ରନ୍ କରିଥିଲେ। ତାଙ୍କ ଇନିଂସରେ ୧୨ ଚୌକା ଓ ୩ ଛକା ସାମିଲ ଥିଲା। ସେହିଭଳି ପାଓ୍ବେଲ ମାତ୍ର ୩୫ ବଲରେ ୩ ଚୌକା ଓ ୬ ଛକା ସହାୟତାରେ ୬୭ ରନ୍ କରି ଅପରାଜିତ ଥିଲେ। ଚଳିତ ଆଇପିଏଲରେ ତୃତୀୟ ଥର ପାଇଁ ଦିଲ୍ଲୀ ୨୦୦ ଅତିକ୍ରମ କରିଥିଲା। ହାଇଦ୍ରାବାଦ୍ ପକ୍ଷରୁ ଭୁବନେଶ୍ୱର କୁମାର, ସିନ ଆବଟ୍ଟ ଏବଂ ଶ୍ରେୟାସ ଗୋପାଲ ଗୋଟିଏ ଲେଖାଏ ଉଇକେଟ ନେଇଥିଲେ। ଜବାବରେ ଆରମ୍ଭରୁ ହାଇଦ୍ରାବାଦ୍ ବ୍ୟାଟିଂ ବିଫଳତାର ସମ୍ମୁଖୀନ ହୋଇଥିଲା। ୭ ଓଭର ମଧ୍ୟରେ ଦଳ ପ୍ରମୁଖ ୩ ଉଇକେଟ ହରାଇ ସାରିଥିଲା। ଏଭଳି ପରିସ୍ଥିତିରେ ଦଳକୁ ସମ୍ଭାଳିଥିଲେ ଏଡେନ ମାରକ୍ରାମ (୪୨ ରନ୍, ୪ ଚୌକା ଓ ୩ ଛକା) ଓ ନିକୋଲାସ ପୁରନ। ଦୁହେଁ ୩୫ ବଲରେ ୬୦ ରନ୍ ଯୋଡ଼ି ଦଳ ପାଇଁ ବିଜୟ ସମ୍ଭାବନା ସୃଷ୍ଟି କରିଥିଲେ। ତା’ପରେ ପୁରନ ଏକାକୀ ଦଳର ବିଜୟ ଆଶାକୁ ୧୮ତମ ଓଭର ପର୍ଯ୍ୟନ୍ତ ବଞ୍ଚାଇ ରଖିଥିଲେ। ସେ ୩୪ ବଲରେ ବିସ୍ଫୋରକ ୬୨ ରନ୍ କରିଥିଲେ। ତାଙ୍କ ଇନିଂସରେ ୨ ଚୌକା ଓ ୬ ଛକା ଥିଲା। ତାଙ୍କ ଉଇକେଟ ସହ ଦିଲ୍ଲୀ ମ୍ୟାଚ୍କୁ ଜିତି ନେଇଥିଲା। ହାଇଦ୍ରାବାଦ୍ ୨୦ ଓଭରରେ ୮ ଉଇକେଟ ହରାଇ ୧୮୬ ରନ କରିବାକୁ ସକ୍ଷମ ହୋଇଥିଲେ।
