ପୁରୀ ଅଫିସ,୧୬।୧୨: ମହାପ୍ରଭୁ ଶ୍ରୀଜଗନ୍ନାଥଙ୍କ ପହିଲି ଭୋଗ ନୀତି ମଙ୍ଗଳବାର ଅନୁଷ୍ଠିତ ହୋଇଛି। ଚଳିତଥର ନୀତିରେ ସାମାନ୍ୟ ବିଳମ୍ବ ହୋଇଥିବା ଲକ୍ଷ୍ୟ କରାଯାଇଛି। ସାଧାରଣରେ ପହିଲି ଭୋଗ ସମୟ ୬ଟା ୨୦ରୁ ୬ଟା ୫୦ ମିନିଟ୍ ମଧ୍ୟରେ ଶେଷ ହେବ ବୋଲି କୁହାଯାଇଥିବା ବେଳେ ଏହା ୭ଟା ୩୦ ମିନିଟ୍ରେ ଶେଷ ହୋଇଛି। ଏଥିରେ ପ୍ରାୟ ୪୦ମିନିଟ୍ ବିଳମ୍ବ ହୋଇଛି। ତେବେ ପହିଲି ଭୋଗ ନୀତି ଧନୁ ସଂକ୍ରାନ୍ତିଠାରୁ ଆରମ୍ଭ ହୋଇ ମକର ସଂକ୍ରାନ୍ତି ପର୍ଯ୍ୟନ୍ତ ମାସେ ବ୍ୟାପୀ ଅନୁଷ୍ଠିତ ହେବ।
ଶ୍ରୀମନ୍ଦିର ଦ୍ୱାରଫିଟା ରାତ୍ର ୩ଟା ୪୦ମିନିଟ୍ରେ ହୋଇଥିବା ବେଳେ ଭିତର ଶୋଧ ପ୍ରକ୍ରିୟା ୪ଟା ୨୫ମିନିଟ୍ରେ କରାଯାଇଛି। ମଙ୍ଗଳ ଆଳତି ୪ଟା ୩୦ମିନିଟ୍, ମଇଲମ ୪ଟା ୩୫, ରୋଷ ହୋମ ଓ ତଡ଼ପ ଲାଗି ୪ଟା ୫୫, ଅବକାଶ ପୂଜା ୫ଟା ୨୦ମିନିଟ୍ରେ ସରିଛି। ୬ଟା ୨୫ମିନିଟ୍ରେ ମହାପ୍ରଭୁଙ୍କ ବେଶ ଶେଷ ହୋଇଥିବା ବେଳେ ସୂର୍ଯ୍ୟ ପୂଜା ୬ଟା ୩୦ମିନିଟ୍ରେ ସରିଛି। ସେହିପରି ଦ୍ୱାରପାଳ ପୂଜା ସକାଳ ୬ଟା ୪୫, ଗୋପାଳ ବଲ୍ଲବ ଏବଂ ପହିଲି ଭୋଗ ଡାକିଗଲେ ୭ଟାରେ ଅନୁଷ୍ଠିତ ହୋଇଛି। ପହିଲି ଭୋଗ ଛେକ ସକାଳ ୭ଟା ୧୦ ଏବଂ ବୟ ଆସିବା ୭ଟା ୧୫ମିନିଟ୍ରେ ଅନୁଷ୍ଠିତ ହୋଇଛି। ପହିଲି ଭୋଗ ପୂଜା ୭ଟା ୨୦ମିନିଟ୍ ଏବଂ ଭୋଗ ଶେଷ ୭ଟା ୩୦ମିନିଟ୍ରେ ସରିଛି। ପହିଲି ଭୋଗ ବାହାରି ୭ଟା୪୦ରେ ପାଣି ପଡିଛି। ସକାଳ ଧୂପ ଡାକିଗଲେ ୭ଟା ୫୫, ସକାଳ ଧୂପ ଛେକ ଆସିବା ୮ଟା ୫ମିନିଟ୍, ସକାଳ ଧୂପ ପୂଜା ୮ଟା ୨୦ମିନିଟ୍ରେ ଏବଂ ସକାଳଧୂପ ଟେରା ୯ଟା ୦୫ମିନିଟ୍ରେ ଶେଷ ହୋଇଛି। ସକାଳ ଧୂପ ପ୍ରସାଦ ବାହାରି ପାଣି ୯ଟା ୪୫ମିନିଟ୍ରେ ପଡିଛି। ସେହିପରି ଭୋଗମଣ୍ଡପ ପୂଜା ୧୧ଟା ୩୫ମିନିଟ୍ରେ ଶେଷ ହୋଇଛି। ମଧ୍ୟାହ୍ନ ଧୂପ ପୂଜା ୧୨ଟା ୧୫ମିନିଟ୍ରେ ସରିଛି। ୨ୟ ଭୋଗମଣ୍ଡପ ୧ଟା ୧୦ମିନିଟ୍ ମଧ୍ୟାହ୍ନ ଧୂପ ପ୍ରସାଦ ବାହାରି ପାଣି ପଡିବା ୧ଟା ୧୫ମିନିଟ୍ରେ ସରିଛି। ୨ୟ ଭୋଗମଣ୍ଡପ ପୂଜା ୨ଟା ୧୫ରେ ଆରମ୍ଭ ହୋଇ ୨ଟା ୨୫ରେ ଶେଷ ହୋଇଥିବାବେଳେ ଦକ୍ଷିଣୀ ଘର ଭୋଗ ୨ଟା ୫ମିନିଟରେ ହୋଇଛି। ଏହାପରେ ଶ୍ରାଦ୍ଧ ବେଶ ହୋଇ ଶେଷରେ ସନ୍ଧ୍ୟା ଆଳତି ହୋଇଥିଲା।
