କେନ୍ଦ୍ରାପଡ଼ା ଅଫିସ, ୧୮।୧୧: କେନ୍ଦ୍ରାପଡ଼ା ଜିଲା ମାର୍ଶାଘାଇ ବ୍ଲକ ମଣିକୁଣ୍ଡାଠାରେ ନିର୍ମାଣାଧୀନ ପାନୀୟ ଜଳ ପ୍ରକଳ୍ପରେ ଏକ ବଡଧରଣର ପରିବର୍ତ୍ତନ ହେବାକୁ ଯାଉଛି। ପ୍ରକଳ୍ପ ସ୍ଥାନ ଜଙ୍ଗଲ କିସମ ଦର୍ଶାଇ ନ୍ୟାଶନାଲ ଗ୍ରୀନ ଟ୍ରିବ୍ୟୁନାଲ (ଏନ୍ଜିଟି)ରେ ହୋଇଥିବା ମାମଲା ପରେ ଏହି ନିର୍ମାଣ କାର୍ଯ୍ୟ ବନ୍ଦ ରହିଥିଲା। ଏବେ ପ୍ରକଳ୍ପ ଜମି ବଦଳରେ ବଡପାଳଠାରେ ଜଙ୍ଗଲ ସୃଷ୍ଟି ପାଇଁ ଗ୍ରାମୀଣ ଜଳ ଯୋଗାଣ, ରାଜସ୍ବ ବିଭାଗଙ୍କ ଆବେଦନକୁ ରାଜ୍ୟ ବନ ଓ ପରିବେଶ ବିଭାଗ ସର୍ତ୍ତମୂଳକ ଅନୁମତି ଦେଇଛନ୍ତି। ତେବେ ପ୍ରକଳ୍ପ ସ୍ଥାନରେ ଗଛ କାଟିବା ଗ୍ରାମୀଣ ଜଳ ଯୋଗାଣ ବିଭାଗକୁ ମହଙ୍ଗା ପଡିଛି। ନୂତନ ଜଙ୍ଗଲର ୧୦ବର୍ଷର ରକ୍ଷଣାବେକ୍ଷଣ, ଚାରାର ମୂଲ୍ୟଠାରୁ ୩ ଗୁଣା ଅଧିକ ଜରିମାନା ଦେବାକୁ ପଡିବ। ଏହି ପ୍ରକଳ୍ପ ନିର୍ମାଣ ପରେ ମହାକାଳପଡ଼ା ବ୍ଲକର ୧୫୨ ଗ୍ରାମ ଓ ମାର୍ଶାଘାଇର ୪୮ ଗ୍ରାମକୁ ଟ୍ୟାପ ଯୋଗେ ପାନୀୟ ଜଳ ଯୋଗାଣ ପାଇଁ ଲକ୍ଷ୍ୟ ଧାର୍ଯ୍ୟ ହୋଇଛି।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମହାକାଳପଡ଼ା ବ୍ଲକ ସରୁମୁହିଁଠାରେ ୨୦୧୮ ନଭେମ୍ବର ୯ରେ ପ୍ରକଳ୍ପ ପାଇଁ ଘୋଷଣା କରିଥିଲେ। ମାର୍ଶାଘାଇ ବ୍ଲକ ମଣିକୁଣ୍ଡାଠାରେ ଜଳ ବିଶୋଧନ କେନ୍ଦ୍ର ନିର୍ମାଣ ଆରମ୍ଭ ହୋଇଥିଲା। ତେବେ ପ୍ରକଳ୍ପ ସ୍ଥାନ ଜଙ୍ଗଲ କିସମ ଥିବାରୁ ଏ ନେଇ ସ୍ଥାନୀୟ ଅଞ୍ଚଳର ସାମାଜିକ କର୍ମୀ ଆଳୟ ସାମନ୍ତରାୟ ଓ ସମ୍ପଦ ସ୍ବାଇଁ ଏନ୍ଜିଟିରେ ଅଭିଯୋଗ ପତ୍ର (ମାମଲା ନଂ. ୪/୧୯) ଦାଖଲ କରିଥିଲେ। ପ୍ରକଳ୍ପ ସ୍ଥାନଟି ଜଙ୍ଗଲ ଜମି ହୋଇଥିବାରୁ ଏନ୍ଜିଟିର ୩ ଜଣିଆ ବେଞ୍ଚ ନିର୍ମାଣ କାର୍ଯ୍ୟକୁ ବନ୍ଦ କରିବା ସହ ପରିବେଶ ବିଭାଗର ଅନୁମତି ନ ଥାଇ ଗଛ କାଟି ଥିବାରୁ ଜରିମାନା ପାଇଁ ଏକ ତଦନ୍ତ କମିଟି ଗଠନ କରିଥିଲେ। ଏହାକୁ ଦୃଷ୍ଟିରେ ରଖି ଜିଲା ପ୍ରଶାସନ ପକ୍ଷରୁ ପ୍ରକଳ୍ପ ସ୍ଥାନର ୧.୮୦୯ ହେକ୍ଟର ଜମି ପାଇଁ ଏହି ବ୍ଲକ ଅଧୀନ ବଡପାଳଠାରେ ଥିବା ୧.୮୬୨ ହେକ୍ଟର ଜମିକୁ ବଦଳ କରି ଜଙ୍ଗଲ ସୃଷ୍ଟି କରିବାକୁ ବନ ଓ ପରିବେଶ ବିଭାଗର ଅନୁମତି ମାଗିଥିଲେ। ଗତ ସେପ୍ଟେମ୍ବର ୧୬ରେ ଏହି ପ୍ରକଳ୍ପ ନିର୍ମାଣ ପାଇଁ ବନ ଓ ପରିବେଶ ବିଭାଗ ପକ୍ଷରୁ ସର୍ତ୍ତମୂଳକ ଅନୁମତି ଦିଆଯାଇଛି। ନୂତନ ଜଙ୍ଗଲ ଜମିରେ କୌଣସି ନିର୍ମାଣ କାର୍ଯ୍ୟ ନ କରିବା, ପ୍ରକଳ୍ପ ସ୍ଥାନର ଗଛକୁ ସୁରକ୍ଷିତ ରଖିବା, ୧୦ବର୍ଷ ପାଇଁ ନୂତନ ଜଙ୍ଗଲ ସୃଷ୍ଟି ଓ ସୁରକ୍ଷିତ ରଖିବା ଆଦି ୫୦ରୁ ଊର୍ଦ୍ଧ୍ୱ ସର୍ତ୍ତ ଏହି ଚିଠି ନଂ. ୫ ଓଆରବି/ ୪୪୫/୨୦୨୧/ବିଏଚୟୁ)ରେ ଉଲ୍ଲେଖ ହୋଇଛି। ଏହାକୁ ଦୃଷ୍ଟିରେ ରଖାଯାଇ କେନ୍ଦ୍ରାପଡ଼ା ଜିଲା ଗ୍ରାମୀଣ ଜଳ ଯୋଗାଣ ଓ ପରିମଳ ବିଭାଗ ପକ୍ଷରୁ କଟକ ସର୍କଲର ବିଭାଗୀୟ ସହକାରୀ ମୁଖ୍ୟଯନ୍ତ୍ରୀଙ୍କୁ ଜଙ୍ଗଲ ସୃଷ୍ଟି ଓ ଜରିମାନା ବାବଦ ୮୪,୫୨,୬୦୪ ଟଙ୍କା କାମ୍ପା ଆକାଉଣ୍ଟରେ ଜମା କରିବାକୁ ମଙ୍ଗଳବାର ଚିଠି (ନଂ. ୫୯୩୫) କରିଛନ୍ତି। ଏହି ଚିଠି ଅନୁଯାୟୀ କଟକ ବନଖଣ୍ଡ ଅଧୀନ ବଡପାଳଠାରେ ନୂତନ ଗଛ ଚାରା ଓ ୧୦ ବର୍ଷର ସଂରକ୍ଷଣ ଖର୍ଚ୍ଚ ବାବଦ ୧୬,୫୮,୦୦୦ ଟଙ୍କା ହୋଇଥିବା ବେଳେ ପ୍ରକଳ୍ପ ସ୍ଥାନରେ କଟା ହୋଇଥିବା ଗଛ ବାବଦ ୧୧,୩୨,୪୩୪ ଟଙ୍କା ଓ ୫୬,୬୨,୧୭୦ ଟଙ୍କା ଜରିମାନା ବାବଦ ବୋଲି ଦର୍ଶାଯାଇଛି। ସୂଚନାଯୋଗ୍ୟ, ପ୍ରକଳ୍ପ କାର୍ଯ୍ୟ ୪୦ ପ୍ରତିଶତ ସରିଛି। ଜଙ୍ଗଲ ସୃଷ୍ଟି ପାଇଁ ଜମି ଓ ଟଙ୍କା ପ୍ରଦାନ ପରେ ଏ ନେଇ ଥିବା ଅନୁମତିକୁ ଏନ୍ଜିଟିରେ ଦାଖଲ ହେବ।
